ಮುಂಬೈ: ಆಗಸ್ಟ್‌ ಮಾಸ ಆರಂಭವಾಗಿದೆ. ಈ ತಿಂಗಳಲ್ಲಿ ಹಾಲಿವುಡ್‌, ಬಾಲಿವುಡ್‌ನಲ್ಲಿ, ಹಾಗೆಯೇ ದಕ್ಷಿಣ ಭಾರತದ ಚಿತ್ರೋದ್ಯಮದಲ್ಲಿ ಹಲವು ಬಹುನಿರೀಕ್ಷಿತ ಸಿನಿಮಾಗಳು ಬಿಡುಗಡೆಯಾಗಲಿವೆ. ಅಕ್ಷಯ್‌ ಕುಮಾರ್‌ ಅವರ ಓಎಂಜಿ 2ಯಿಂದ ಹಿಡಿದು ಸೂಪರ್‌ಸ್ಟಾರ್‌ ರಜನಿಕಾಂತ್‌ ಅವರ ʼಜೈಲರ್ʼ ಮೂವಿಯವರೆಗೆ ಅನೇಕ ಸಿನಿಮಾಗಳು ಈಗಾಗಲೇ ತಮ್ಮ ಟ್ರೈಲರ್‌, ಹಾಡುಗಳ ಮೂಲಕ ಭಾರೀ ಸದ್ದು ಮಾಡಿವೆ. ಈ ತಿಂಗಳಲ್ಲಿ ಬಿಡುಗಡೆಯಾಗುತ್ತಿರುವ ಹತ್ತು ಬಹುನಿರೀಕ್ಷಿತ ಸಿನಿಮಾಗಳ ಬಗ್ಗೆ ಇಲ್ಲಿದೆ (August Movies) ಮಾಹಿತಿ.
OMG 2
ಅಕ್ಷಯ್‌ ಕುಮಾರ್‌ ನಾಯಕ ನಟನಾಗಿ ನಟಿಸಿರುವ ಈ ಸಿನಿಮಾವನ್ನು ಅಮಿತ್‌ ರಾಯ್‌ ಅವರು ಬರೆದು ನಿರ್ದೇಶನ ಮಾಡಿದ್ದಾರೆ. ಸಿನಿಮಾದಲ್ಲಿ ಪಂಕಜ್‌ ತ್ರಿಪಾಠಿ, ಯಾಮಿ ಗೌತಮ್‌ ಕೂಡ ನಟಿಸಿದ್ದಾರೆ. 2012ರಲ್ಲಿ ಬಿಡುಗಡೆಯಾದ OMG ಸಿನಿಮಾದ ಮುಂದುವರಿದ ಭಾಗ ಇದಾಗಿದ್ದು, ಇದರಲ್ಲಿ ಅಕ್ಷಯ್‌ ಕುಮಾರ್‌ ಶಿವನ ರೂಪದಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ಸಿನಿಮಾ ಆಗಸ್ಟ್‌ 11ರಂದು ಬಿಡುಗಡೆಯಾಗಲಿದೆ.
ಗದರ್ 2
ಅನಿಲ್‌ ಶರ್ಮಾ ನಿರ್ದೇಶನದ ಗದರ್ 2 ಸಿನಿಮಾದಲ್ಲಿ ಸನ್ನಿ ಡಿಯೋಲ್‌, ಅಮೀಶಾ ಪಟೇಲ್‌ ಮತ್ತು ಉತ್ಕರ್ಷ್‌ ಶರ್ಮಾ ಅವರು ಮುಖ್ಯ ಪಾತ್ರಗಳಲ್ಲಿ ನಟಿಸಿದ್ದಾರೆ. ಈ ಸಿನಿಮಾದಲ್ಲಿ ಸನ್ನಿ ಡಿಯೋಲ್‌ ಮತ್ತು ಅಮೀಶಾ ಅವರಿಗೆ ಮಗನಾಗಿರುವ ಉತ್ಕರ್ಷ್‌ ಪಾಕಿಸ್ತಾನದಲ್ಲಿ ಸೇನೆಯ ವಶವಾಗಿರುತ್ತಾನೆ. ಆತನನ್ನು ರಕ್ಷಿಸಲು ಸನ್ನಿ ಡಿಯೋಲ್‌ ಪಾಕಿಸ್ತಾನಕ್ಕೆ ಹೋಗುವ ಸುತ್ತ ಕಥೆ ಹೆಣೆಯಲಾಗಿದೆ. ಈ ಸಿನಿಮಾ ಕೂಡ ಆಗಸ್ಟ್‌ 11ರಂದೇ ತೆರೆ ಕಾಣುತ್ತಿದೆ.
ಹಾರ್ಟ್ ಆಫ್ ಸ್ಟೋನ್
ಹಾಲಿವುಡ್‌ನ ಈ ಸಿನಿಮಾ ಆಗಸ್ಟ್‌ 11ರಂದು ನೆಟ್‌ಫ್ಲಿಕ್ಸ್‌ನಲ್ಲಿ ಬಿಡುಗಡೆಯಾಗಲಿದೆ. ಈ ಸಿನಿಮಾದಲ್ಲಿ ಬಾಲಿವುಡ್‌ ನಟಿ ಆಲಿಯಾ ಭಟ್‌ ಕೂಡ ನಟಿಸಿದ್ದಾರೆ. ಟಾಮ್‌ ಹಾಪರ್‌ ನಿರ್ದೇಶನದ ಈ ಸಿನಿಮಾದಲ್ಲಿ ಗಾಲ್‌ ಗಡೋಟ್‌ ಜೇಮೀ ಡೋರ್ನನ್‌ ಮುಖ್ಯ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಇದೊಂದು ಪತ್ತೆದಾರಿ ಸಿನಿಮಾವಾಗಿದೆ.
ಡ್ರೀಮ್ ಗರ್ಲ್ 2
ಆಯುಷ್ಮಾನ್ ಖುರಾನಾ ಮತ್ತು ಅನನ್ಯಾ ಪಾಂಡೆ ಅಭಿನಯದ ಈ ಸಿನಿಮಾ ಆಗಸ್ಟ್‌ 25ರಂದು ಬಿಡುಗಡೆಯಾಗುತ್ತಿದೆ. ಹಾಸ್ಯಮಯವಾಗಿರುವ ಈ ಸಿನಿಮಾದಲ್ಲಿ ಪರೇಶ್ ರಾವಲ್, ಅಸ್ರಾನಿ, ಅನ್ನು ಕಪೂರ್, ಅಭಿಷೇಕ್ ಬ್ಯಾನರ್ಜಿ, ಮನ್ಜೋತ್ ಸಿಂಗ್, ರಾಜ್ಪಾಲ್ ಯಾದವ್, ಮನೋಜ್ ಜೋಶಿ, ಸೀಮಾ ಪಹ್ವಾ, ಮತ್ತು ವಿಜಯ್ ರಾಜ್‌, ಆಯುಷ್ಮಾನ್ ಪೂಜಾ ಸೇರಿ ದೊಡ್ಡ ತಾರಾ ಬಳಗವಿದೆ. ರಾಜ್‌ ಕೌಂಡಿಲ್ಯ ನಿರ್ದೇಶನದ ಈ ಸಿನಿಮಾ 2019ರಲ್ಲಿ ಬಿಡುಗಡೆಯಾದ ಅತ್ಯಂತ ಯಶಸ್ವಿ ಚಲನಚಿತ್ರವಾದ ʼಡ್ರೀಮ್ ಗರ್ಲ್ʼನ ಮುಂದುವರಿದ ಭಾಗವಾಗಿದೆ.
ಘೂಮರ್
ಆರ್‌ ಬಾಲ್ಕಿ ಅವರು ನಿರ್ದೇಶನ ಮಾಡಿರುವ ʼಘೂಮರ್ʼ ಚಿತ್ರ ಆಗಸ್ಟ್‌ 18ರಂದು ತೆರೆ ಕಾಣುತ್ತಿದೆ. ಕ್ರೀಡೆಗೆ ಸಂಬಂಧಿಸಿರುವ ಈ ಸಿನಿಮಾದಲ್ಲಿ ಅಭಿಷೇಕ್ ಬಚ್ಚನ್‌ ಮತ್ತು ಸೈಯಾಮಿ ನಟಿಸಿದ್ದಾರೆ. ಸಿನಿಮಾದಲ್ಲಿ ಅಭಿಷೇಕ್ ಕ್ರಿಕೆಟ್‌ ಮಾರ್ಗದರ್ಶಕರಾಗಿದ್ದು, ಸೈಯಾಮಿ ಅಂಗವಿಕಲ ಕ್ರೀಡಾಪಟುವಾಗಿರಲಿದ್ದಾರೆ. ಈ ಸಿನಿಮಾದಲ್ಲಿ ಅಂಗದ್‌ ಬೇಡಿ ಮತ್ತು ಶಬಾನಾ ಅಜ್ಮಿ ಕೂಡ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ.
ಜೈಲರ್
ನೆಲ್ಸನ್ ದಿಲೀಪ್‌ಕುಮಾರ್ ಬರೆದು ನಿರ್ದೇಶಿಸಿರುವ ತಮಿಳು ಸಿನಿಮಾ ಜೈಲರ್. ಈ ಸಿನಿಮಾದಲ್ಲಿ ಸೂಪರ್‌ಸ್ಟಾರ್‌ ರಜನಿಕಾಂತ್‌ ಅವರು ಜೈಲರ್ ಪಾತ್ರದಲ್ಲಿ ಮಿಂಚಲಿದ್ದಾರೆ. ತಮನ್ನಾ ಕೂಡ ನಟಿಸಿರುವ ಈ ಸಿನಿಮಾ ಆಗಸ್ಟ್‌ 10ರಂದು ತೆರೆ ಕಾಣಲಿದೆ. ಈ ಸಿನಿಮಾದಲ್ಲಿ ಮೋಹನ್ ಲಾಲ್, ಜಾಕಿ ಶ್ರಾಫ್, ಡಾ ಶಿವ ರಾಜಕುಮಾರ್, ರಮ್ಯಾ ಕೃಷ್ಣನ್, ಯೋಗಿ ಬಾಬು, ವಸಂತ್ ರವಿ, ಮತ್ತು ವಿನಾಯಕನ್ ಬಣ್ಣ ಹಚ್ಚಿದ್ದಾರೆ.
ಭೋಲಾ ಶಂಕರ್
ಮೆಹರ್‌ ರಮೇಶ್‌ ಅವರು ನಿರ್ದೇಶನ ಮಾಡಿರುವ ಆಕ್ಷನ್ ಎಂಟರ್‌ಟೈನರ್ ಸಿನಿಮಾ ಭೋಲಾ ಶಂಕರ್. ಚಿರಂಜೀವಿ, ತಮನ್ನಾ ಭಾಟಿಯಾ ಮತ್ತು ಕೀರ್ತಿ ಸುರೇಶ್ ಮುಖ್ಯ ಪಾತ್ರಗಳಲ್ಲಿ ನಟಿಸಿರುವ ಈ ಸಿನಿಮಾ ಆಗಸ್ಟ್‌ 11ರಂದು ತೆರೆ ಕಾಣಲಿದೆ. ಇದರಲ್ಲಿ ತಮನ್ನಾ ನಾಯಕ ನಟಿಯಾಗಿದ್ದರೆ ಕೀರ್ತಿ ಸುರೇಶ್ ಅವರು ಚಿರಂಜೀವಿ ಅವರ ಸಹೋದರಿಯಾಗಿ ನಟಿಸಿದ್ದಾರೆ.
ಅಕೆಲ್ಲಿ
ನುಸ್ರುತ್‌ ಭರುಚ್ಚಾ ನಾಯಕ ನಟಿಯಾಗಿ ನಟಿಸಿರುವ ಈ ಸಿನಿಮಾ ಕುತೂಹಲಕಾರಿ ಸಿನಿಮಾವಾಗಿದೆ. ಪ್ರಣಯ್‌ ಮೇಶ್ರಾಮ್‌ ಅವರು ನಿರ್ದೇಶನ ಮಾಡಿರುವ ಸಿನಿಮಾವನ್ನು ದಶಮಿ ಸ್ಟುಡಿಯೋಸ್‌ನ ನಿತಿನ್ ವೈದ್ಯ, ನಿನಾದ್ ವೈದ್ಯ, ಅಪರ್ಣಾ ಪಡ್ಗಾಂವ್ಕರ್ ಜೊತೆಗೆ ವಿಕ್ಕಿ ಸಿದಾನ ಮತ್ತು ಶಶಾಂತ್ ಶಾ ನಿರ್ಮಾಣ ಮಾಡಿದ್ದಾರೆ. ನಿಶಾಂತ್ ದಹಿಯಾ, ತ್ಸಾಹಿ ಹಲೇವಿ, ಅಮೀರ್ ಬೌಟ್ರಸ್ ನಟಿಸಿರುವ ಈ ಸಿನಿಮಾ ಆಗಸ್ಟ್‌ 18ರಂದು ಬಿಡುಗಡೆಯಾಗುತ್ತಿದೆ.
ಟೀನೇಜ್ ಮ್ಯುಟೆಂಟ್ ನಿಂಜಾ ಟರ್ಟಲ್ಸ್
ಜೆಫ್‌ ರೋವ್‌ ನಿರ್ದೇಶಿಸಿರುವ ಈ ಸಿನಿಮಾ ಆಗಸ್ಟ್‌ 4ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಲಿದೆ. ಈ ಚಿತ್ರದಲ್ಲಿ ನಿಕೋಲಸ್ ಕ್ಯಾಂಟು, ಮೈಕಾ ಅಬ್ಬೆ, ಶಾಮನ್ ಬ್ರೌನ್ ಜೂನಿಯರ್, ಬ್ರಾಡಿ ನೂನ್, ಜಾಕಿ ಚಾನ್, ಅಯೋ ಎಡೆಬಿರಿ, ಸೇಥ್ ರೋಜೆನ್, ಜಾನ್ ಸೀನಾ ನಟಿಸಿದ್ದಾರೆ.
ದಿ ಲಾಸ್ಟ್ ವಾಯೇಜ್ ಆಫ್ ದಿ ಡಿಮೀಟರ್
ಹಾಲಿವುಡ್‌ನ ಈ ಸಿನಿಮಾವನ್ನು ಆಂಡ್ರೆ ಓವ್ರೆಡಾಲ್ ಅವರು ನಿರ್ದೇಶನ ಮಾಡಿದ್ದಾರೆ. ಈ ಸಿನಿಮಾ ಆಗಸ್ಟ್‌ 11ರಂದು ಬಿಡುಗಡೆಯಾಗಲಿದೆ. ಸಿನಿಮಾದಲ್ಲಿ ಕೋರೆ ಹಾಕಿನ್ಸ್, ಐಸ್ಲಿಂಗ್ ಫ್ರಾನ್ಸಿಯೋಸಿ, ಲಿಯಾಮ್ ಕನ್ನಿಂಗ್‌ಹ್ಯಾಮ್, ಡೇವಿಡ್ ದಸ್ಟ್ಮಲ್ಚಿಯನ್ ಮತ್ತು ಕ್ರಿಸ್ ವಾಲಿ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.