ಬೆಂಗಳೂರು: ನಟ ಶಾರುಖ್ ಖಾನ್ (Shahrukh Khan) ಅವರು ಯುಎಇಯ ಶಾರ್ಜಾದಲ್ಲಿರುವ ಎಕ್ಸ್ಪೋ ಸೆಂಟರ್ನಲ್ಲಿ ಶಾರ್ಜಾ ಇಂಟರ್ನ್ಯಾಷನಲ್ ಬುಕ್ ಫೇರ್ (SIBF)2022ರ 41 ನೇ ಆವೃತ್ತಿಯ ಸಮಾರಂಭದಲ್ಲಿ ನವೆಂಬರ್‌ 11 ಶುಕ್ರವಾರ ಪಾಲ್ಗೊಂಡಿದ್ದಾರೆ. ʻಗ್ಲೋಬಲ್ ಐಕಾನ್ ಆಫ್ ಸಿನಿಮಾʼ ಮತ್ತು ʻಕಲ್ಚರಲ್ ನಿರೂಪಣೆʼ ಪ್ರಶಸ್ತಿಯನ್ನು ನಟ ಶಾರುಖ್ ಅವರಿಗೆ ನೀಡಲಾಗಿದೆ. ಕಾರ್ಯಕ್ರಮ ಮುಗಿಸಿಕೊಂಡು ಹಿಂತಿರುಗುವ ವೇಳೆ ಮುಂಬೈ ವಿಮಾನ ನಿಲ್ದಾಣದಲ್ಲಿ ನಟ ಶಾರುಖ್ ಖಾನ್ ಅವರನ್ನು ಕಸ್ಟಮ್ಸ್ ಅಧಿಕಾರಿಗಳು ತಡೆದಿದ್ದಾರೆ ಎಂದು ವರದಿಯಾಗಿದೆ.
ದುಬಾರಿ ವಾಚ್‌ಗಳಿಗೆ ಕಸ್ಟಮ್ಸ್ ಇಲಾಖೆ ತಡೆ
ವರದಿ ಪ್ರಕಾರ, ಶಾರುಖ್ ಅವರ ಕೆಲವು ದುಬಾರಿ ವಾಚ್‌ಗಳನ್ನು ಕಸ್ಟಮ್ಸ್ ಇಲಾಖೆ ತಡೆದಿದೆ. ವಿಮಾನ ನಿಲ್ದಾಣದಿಂದ ಹೊರಹೋಗಲು ಅನುಮತಿ ನೀಡುವ ಮೊದಲು ಶಾರುಖ್ 6.83 ಲಕ್ಷ ರೂ. ಕಸ್ಟಮ್ಸ್ ಸುಂಕವನ್ನು ಪಾವತಿಸಬೇಕಾಗಿತ್ತು ಎಂದು ಮೂಲಗಳು ತಿಳಿಸಿವೆ. ಶಾರ್ಜಾ ಅಂತಾರಾಷ್ಟ್ರೀಯ ಪುಸ್ತಕ ಮೇಳದಲ್ಲಿ ಪಾಲ್ಗೊಂಡಿದ್ದ ನಟ ಶಾರ್ಜಾದಿಂದ ಹಿಂತಿರುಗುತ್ತಿದ್ದರು. ನಟ ಖಾಸಗಿ ಜೆಟ್‌ನಲ್ಲಿ ಪ್ರಯಾಣಿಸುತ್ತಿದ್ದರು. ಎಸ್‌ಆರ್‌ಕೆ ಮತ್ತು ಅವರ ಪರಿವಾರದವರು ಟರ್ಮಿನಲ್‌ನಿಂದ ನಿರ್ಗಮಿಸುವಾಗ ಬ್ಯಾಗ್‌ಗಳಲ್ಲಿ ದುಬಾರಿ ವಾಚ್‌ಗಳು ಪತ್ತೆಯಾಗಿವೆ. ಸುಮಾರು 18 ಲಕ್ಷ ರೂ. ಮೌಲ್ಯದ ಆರು ಐಷಾರಾಮಿ ವಾಚ್‌ಗಳು ಶಾರುಖ್ ಮತ್ತು ಅವರ ತಂಡದ ಬ್ಯಾಗೇಜ್‌ನಲ್ಲಿ ಪತ್ತೆಯಾಗಿವೆ ಎಂದು ವರದಿಯಾಗಿದೆ.
ಇದನ್ನೂ ಓದಿ | Shahrukh khan ಕೊಟ್ಟಿದ್ದ ಆಫರ್‌ ತಿರಸ್ಕರಿಸಿದ್ದರು ಈ ಕೋಚ್‌
ಕಸ್ಟಮ್ಸ್ ಪ್ರಕ್ರಿಯೆ ಪೂರ್ಣಗೊಂಡ ನಂತರ ಶಾರುಖ್ ಖಾನ್ ಮತ್ತು ಅವರ ಮ್ಯಾನೇಜರ್‌ಗೆ ವಿಮಾನ ನಿಲ್ದಾಣದಿಂದ ಹೊರಡಲು ಅನುಮತಿ ನೀಡಲಾಗಿದೆ ಎಂದು ವರದಿಯಾಗಿದೆ. ಎಸ್‌ಆರ್‌ಕೆ ಬಾಡಿಗಾರ್ಡ್ಸ್‌ ಮತ್ತು ಅವರ ತಂಡದ ಇತರ ಕೆಲವು ಸದಸ್ಯರನ್ನು ಇಡೀ ರಾತ್ರಿ ವಿಚಾರಣೆಗೆ ಒಳಪಡಿಸಿದ್ದು, ಬೆಳಗ್ಗೆ ಹೊರಡಲು ಅನುಮತಿಸಲಾಗಿತ್ತು ಎಂದು ಹೇಳಲಾಗಿದೆ.
ಗ್ಲೋಬಲ್ ಐಕಾನ್ ಆಫ್ ಪ್ರಶಸ್ತಿ!
ಶಾರುಖ್ ಖಾನ್ ಅವರು ಯುಎಇ ಶಾರ್ಜಾದಲ್ಲಿರುವ ಎಕ್ಸ್ಪೋ ಸೆಂಟರ್ನಲ್ಲಿ ಶಾರ್ಜಾ ಇಂಟರ್ನ್ಯಾಷನಲ್ ಬುಕ್ ಫೇರ್(SIBF) 2022ರ 41 ನೇ ಆವೃತ್ತಿಯ ಸಮಾರಂಭದಲ್ಲಿ ಪಾಲ್ಗೊಂಡಿದ್ದರು. ನಟ ಶಾರುಖ್ ಖಾನ್ ಅವರಿಗೆ ಗ್ಲೋಬಲ್ ಐಕಾನ್ ಆಫ್ ಸಿನಿಮಾ ಮತ್ತು ಕಲ್ಚರಲ್ ನಿರೂಪಣೆ ಪ್ರಶಸ್ತಿಯನ್ನು ನೀಡಲಾಗಿದೆ. ಕಾರ್ಯಕ್ರಮದ ಫೋಟೊಗಳು ಮತ್ತು ವಿಡಿಯೊಗಳು ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್ ಆಗಿವೆ.
ನಾಲ್ಕು ವರ್ಷ ಸಿನಿಮಾದಿಂದ ದೂರ ಉಳಿದಿದ್ದರು ಶಾರುಖ್!
ಶಾರುಖ್ ಖಾನ್ ಅವರು ನಾಲ್ಕು ವರ್ಷ ಸಿನಿಮಾದಿಂದ ದೂರ ಉಳಿದಿದ್ದರು. ಈಗ ‘ಪಠಾಣ್’ ಸಿನಿಮಾದ ಮೂಲಕ ಕಂಬ್ಯಾಕ್ ಮಾಡಲಿದ್ದಾರೆ. ಈ ಚಿತ್ರದ ಟೀಸರ್ನಲ್ಲಿ ಶಾರುಖ್ ಸಿಕ್ಸ್ಪ್ಯಾಕ್ನೊಂದಿಗೆ ಕಾಣಿಸಿಕೊಂಡಿದ್ದಾರೆ. ಈ ಸಿನಿಮಾ ಜನವರಿ 25 ರಂದು ರಿಲೀಸ್ ಆಗಲಿದೆ. ಟೀಸರ್ ಈಗಾಗಲೇ ಬಿಡುಗಡೆಗೊಂಡಿದ್ದು 2018ರಲ್ಲಿ ʻಜೀರೋ’ ಚಿತ್ರ ತೆರೆಕಂಡ ಬಳಿಕ ಶಾರುಖ್ ಇದೇ ಮೊದಲ ಬಾರಿಗೆ ಹೊಸ ಅವತಾರದಲ್ಲಿ ಕಾಣಿಸಿಕೊಂಡಿದ್ದಾರೆ.
ಇದನ್ನೂ ಓದಿ | Shah Rukh Khan Fashion | ಬಾಲಿವುಡ್‌ ಕಿಂಗ್‌ ಖಾನ್ ಶಾರುಖ್ ರೀಲ್‌ ಫ್ಯಾಷನ್‌ Vs ರಿಯಲ್‌ ಫ್ಯಾಷನ್‌!