ಬೆಂಗಳೂರು: ಅರ್ಜುನ್ರೆಡ್ಡಿ ಸಿನಿಮಾದ ಮೂಲಕ ಜನಪ್ರಿಯತೆ ಪಡೆದು ಇತ್ತೀಚಿನ ಲೈಗರ್ ಸಿನಿಮಾದ ತನಕವೂ ಯವ ಜನಾಂಗದ ಅಚ್ಚು ಮೆಚ್ಚಿನ ನಟನಾಗಿರುವ ಟಾಲಿವುಡ್ ಸ್ಟಾರ್ ವಿಜಯ್ ದೇವರಕೊಂಡ (Vijay Deverakonda) ಅವರು ತಮ್ಮ 100 ಅಭಿಮಾನಿಗಳಿಗೆ ಉಚಿತ ಪ್ರವಾಸದ ಉಡುಗೊರೆ ಕೊಡಲು ನಿರ್ಧರಿಸಿದ್ದಾರೆ. ಇದು ಕಳೆದ ಐದು ವರ್ಷಗಳಿಂದ ಕ್ರಿಸ್ಮಸ್ ಅಂಗವಾಗಿ ಅಭಿಮಾನಿಗಳಿಗೆ ಗಿಫ್ಟ್ ಕೊಡುವ ಅವರ ಸಂಪ್ರದಾಯದ ಭಾಗವಾಗಿದೆ.
ಸುಂದರಾಂಗ ವಿಜಯ್ ದೇವರಕೊಂಡ ಅವರಿಗೆ ಅಪಾರ ಸಂಖ್ಯೆ ಅಭಿಮಾನಿಗಳಿದ್ದಾರೆ. ಅವರಿಗೆ ಕಳೆದ ಐದು ವರ್ಷಗಳಿಂದ ಕ್ರಿಸ್ಮಸ್ ಗಿಫ್ಟ್ ಕೊಡುತ್ತಿದ್ದಾರೆ. ಅದಕ್ಕವರು “ದೇವರ ಸಾಂತಾ’ ಎಂದು ಹೆಸರಿಟ್ಟಿಕೊಂಡಿದ್ದಾರೆ. ಅಂತೆಯೇ ಅವರು ಈ ಬಾರಿ 100 ಅಭಿಮಾನಿಗಳನ್ನು ಎಲ್ಲ ಖರ್ಚು, ವೆಚ್ಚಗಳನ್ನು ತಾವೆ ಭರಿಸಿ ಪ್ರವಾಸಕ್ಕೆ ಕರೆದುಕೊಂಡು ಹೋಗಲು ನಿರ್ಧರಿಸಿದ್ದಾರೆ.
ಭಾನುವಾರ ಸಂಜೆ ಅವರು ಈ ಕುರಿತು ಟ್ವೀಟ್ ಮಾಡಿದ್ದಾರೆ. ಅಲ್ಲದೆ ಯಾವ ಜಾಗಕ್ಕೆ ಸೂಕ್ತ ಎಂಬ ವೋಟಿಂಗ್ ಕೂಡ ನಡೆಸಿದ್ದಾರೆ. ಅದರಲ್ಲಿ ಅವರು ಭಾರತದ ಗಿರಿಧಾಮಗಳು, ಭಾರತದ ಬೀಚ್ಗಳು, ಭಾರತದ ಸಾಂಸ್ಕೃತಿಕ ಪ್ರದೇಶಗಳು ಹಾಗೂ ಭಾರತದ ಮರಭೂಮಿ ಎಂಬ ಆಯ್ಕೆಯನ್ನು ನೀಡಿದ್ದಾರೆ. ಸೋಮವಾರ ಸಂಜೆಯ ವೇಳೆ ಗಿರಿಧಾಮಗಳಿಗೆ 42.5 ರಷ್ಟು ಮತಗಳು ಬಿದ್ದಿವೆ.
ವಿಜಯ್ ದೇವರಕೊಂಡ ಅವರ ಟ್ವೀಟ್ ನೋಡಿ ಅಭಿಮಾನಿಗಳು ಥ್ರಿಲ್ ಆಗಿದ್ದಾರೆ. ನಾನಾ ಸ್ಥಳಗಳನ್ನು ಸೂಚಿಸುವ ಜತೆಗೆ ನಮ್ಮನ್ನೂ ಕರೆದುಕೊಂಡು ಹೋಗಿ ಎಂದು ಬೇಡಿಕೆ ಸಲ್ಲಿಸಿದ್ದಾರೆ.
ಇದನ್ನೂ ಓದಿ | Vijay Deverakonda | ಇ.ಡಿ ವಿಚಾರಣೆಗೆ ಹಾಜರಾದ ನಟ ವಿಜಯ್ ದೇವರಕೊಂಡ, ಕಾರಣ ಏನು?