ಹೈದರಾಬಾದ್: ಮನಾಲಿ ಯಾರಿಗೆ ತಾನೆ ಇಷ್ಟವಿಲ್ಲ ಹೇಳಿ? ಜೀವನದಲ್ಲಿ ಒಮ್ಮೆಯಾದರೂ ಹೋಗಲೇಬೇಕು ಎಂದುಕೊಳ್ಳುವ ಸ್ಥಳಗಳಲ್ಲಿ ಅದೂ ಕೂಡ ಒಂದು. ಅದೇ ರೀತಿ ಆಸೆ ಇಟ್ಟುಕೊಂಡಿದ್ದ ನಟ ವಿಜಯ್ ದೇವರಕೊಂಡ (Actor Vijay Devarakonda) ಅಭಿಮಾನಿಗಳಿಗೆ ಈಗ ಅದೃಷ್ಟ ಒಲಿದುಬಂದಿದೆ. ನೆಚ್ಚಿನ ನಟನೇ ಅವರನ್ನು ಉಚಿತವಾಗಿ ಮನಾಲಿ ಟ್ರಿಪ್ ಮಾಡಿಸುತ್ತಿದ್ದಾರೆ.
ಇದನ್ನೂ ಓದಿ: Liger Movie | ಲೈಗರ್ ಸಿನಿಮಾದಲ್ಲಿ ವಿಜಯ್ ದೇವರಕೊಂಡ ಎದರು ಅಬ್ಬರಿಸಲಿರುವ ಖಳನಾಯಕ ಇವರೇ!
ಹೌದು. ವಿಜಯ್ ದೇವರಕೊಂಡ ಅವರು ಪ್ರತಿ ವರ್ಷ ಅಭಿಮಾನಿಗಳಿಗೋಸ್ಕರ ವಿಶೇಷವಾದದ್ದು ಏನಾದರೂ ಮಾಡುತ್ತಾ ಬಂದಿದ್ದಾರೆ. ಅದೇ ರೀತಿ ಈ ವರ್ಷ ನೂರು ಅಭಿಮಾನಿಗಳ ಮನಾಲಿ ಪ್ರವಾಸದ ಸಂಪೂರ್ಣ ವೆಚ್ಚವನ್ನು ಅವರು ಭರಿಸಿದ್ದಾರೆ.
ವಿಜಯ್ ದೇವರಕೊಂಡ ಅವರು ತಮ್ಮನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಿಂಬಾಲಿಸುತ್ತಿರುವ ಅಭಿಮಾನಿಗಳ ಪೈಕಿ 100 ಮಂದಿಯನ್ನು ಆಯ್ಕೆ ಮಾಡಿ ಫೆ.3ರಂದು ಪಟ್ಟಿ ಬಿಡುಗಡೆ ಮಾಡಿದ್ದರು. ಅವರೆಲ್ಲರನ್ನು ಫೆ. 17ರಂದು ಮನಾಲಿ ಪ್ರವಾಸಕ್ಕೆ ವಿಮಾನದಲ್ಲಿ ಕಳುಹಿಸಿಕೊಟ್ಟಿದ್ದಾರೆ. ಫೆ.17ರಿಂದ ಫೆ.20ರವರೆಗೆ ಅವರ ಪ್ರವಾಸ ನಡೆಯಲಿದೆ. ಅಭಿಮಾನಿಗಳು ಮನಾಲಿಗೆ ಹೊರಟಾಗ ವಿಮಾನದಿಂದ ಮಾಡಿ ಕಳುಹಿಸಿರುವ ವಿಡಿಯೊ ಹಂಚಿಕೊಂಡಿರುವ ವಿಜಯ್, “ಇವರು ಇಂದು ಬೆಳಿಗ್ಗೆ ವಿಮಾನದಿಂದ ನನಗೆ ವಿಡಿಯೊವನ್ನು ಕಳುಹಿಸಿದ್ದಾರೆ. ಅವರು ರಜಾದಿನಗಳಲ್ಲಿ ಪರ್ವತಗಳಿಗೆ ತೆರಳಿದ್ದಾರೆ! ದೇಶದಾದ್ಯಂತದಿಂದ ಒಟ್ಟು 100 ಮಂದಿಯನ್ನು ಈ ರೀತಿ ಕಳುಹಿಸುತ್ತಿರುವುದು ಸಂತೋಷ ತಂದಿದೆ” ಎಂದು ಬರೆದುಕೊಂಡಿದ್ದಾರೆ.
ವಿಜಯ್ ಅವರು ಮೊದಲನೇ ವರ್ಷದಲ್ಲಿ ಮಸಾಬ್ ಟ್ಯಾಂಕ್‌ನಲ್ಲಿರುವ ಜವಾಹರಲಾಲ್ ನೆಹರು ಆರ್ಕಿಟೆಕ್ಚರ್ ಮತ್ತು ಫೈನ್ ಆರ್ಟ್ಸ್ ವಿಶ್ವವಿದ್ಯಾಲಯಕ್ಕೆ ಭೇಟಿ ಅಲ್ಲಿ ತಮ್ಮನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಹಿಂಬಾಲಿಸುತ್ತಿರುವ 50 ಅಭಿಮಾನಿಗಳನ್ನು ಆಯ್ಕೆ ಮಾಡಿದ್ದರು. ಅವರಿಗೆ ವಿಶೇಷ ಉಡುಗೊರೆಗಳನ್ನು ಕೊಡಲಾಗಿತ್ತು. ಮತ್ತೊಂದು ವರ್ಷ ಅವರು ಹ್ಯಾಷ್ ಟ್ಯಾಗ್ ದೇವರಸಂತ ಎಂದು ಪೋಸ್ಟ್ ಮಾಡಿದ 100 ಅಭಿಮಾನಿಗಳನ್ನು ಆಯ್ಕೆ ಮಾಡಿ ಅವರಿಗೆ ತಲಾ 10,000 ರೂ. ಕೊಟ್ಟಿದ್ದರು.