ಬೆಂಗಳೂರು: ಸ್ಯಾಂಡಲ್ವುಡ್ ನಟಿ ಹರಿಪ್ರಿಯಾ (Sandalwood Actor) ದೊಡ್ಡ ಅಭಿಮಾನಿ ಬಳಗ ಹೊಂದಿದ್ದಾರೆ. ಹೀಗಾಗಿ ಅವರ ಬದುಕಿನಲ್ಲಾಗುವ ಪ್ರತಿಯೊಂದು ಒಳಿತಿಗೂ ಅಭಿಮಾನಿಗಳ ಶುಭ ಹಾರೈಕೆಗಳ ಇದ್ದೇ ಇರುತ್ತವೆ. ಅಂತೆಯೇ ಕೆಲವು ದಿನಗಳ ಹಿಂದೆ ಹರಿಪ್ರಿಯಾ (Haripriaya) ಅವರು ನಿಮಗೊಂದು ಗುಡ್ನ್ಯೂಸ್ ಅಂಥ ಸೋಶಿಯಲ್ ಮೀಡಿಯಾಗಳಲ್ಲಿ ಪೋಸ್ಟ್ ಹಾಕಿದ್ದರು. ನಟಿ ಕೆಲವು ತಿಂಗಳ ಹಿಂದೆ ನಟ ವಸಿಷ್ಠ ಸಿಂಹ ಅವರನ್ನು ಮದುವೆಯಾಗಿ ಸಿಂಹ ಪ್ರಿಯೆ ಎನಿಸಿಕೊಂಡಿದ್ದರಿಂದ ಗುಡ್ ನ್ಯೂಸ್ ಅಂದಾಕ್ಷಣ ಎಲ್ಲರ ಕಿವಿ ಅರಳಿತ್ತು. ನಮ್ಮೆಲ್ಲರ ನೆಚ್ಚಿನ ನಟಿ ತಾಯಿಯಾಗುತ್ತಿದ್ದಾರೆ ಎಂದು ಚಂದದ ಮಾತುಗಳನ್ನಾಡಿದ್ದರು. ಆದರೆ, ಆ ನಿರೀಕ್ಷೆ ಸುಳ್ಳಾಗಿದೆ. ಹಾಗೆಂದು ಗುಡ್ ನ್ಯೂಸ್ ಕೊಟ್ಟಿಲ್ಲ ಎಂದರ್ಥವಲ್ಲ. ಕೊಟ್ಟಿದ್ದಾರೆ.
ನವ ದಂಪತಿಗಳು ಗುಡ್ ನ್ಯೂಸ್ ಅಂದಾಗ ತಲೆಯಲ್ಲಿ ಸುಳಿದಾಡುವ ಗುಡ್ ನ್ಯೂಸ್ ಇದಲ್ಲ ಎಂಬುದನ್ನು ಹರಿಪ್ರಿಯಾ ಮಂಗಳವಾರ (ಮಾರ್ಚ್ 21ರಂದು) ಬಹಿರಂಗ ಮಾಡಿದ್ದಾರೆ. ಆದರೆ, ಆ ದಿಸೆಯಲ್ಲಿ ಯೋಚನೆ ಮಾಡಿದವರಿಗೆ ಥ್ಯಾಂಕ್ಸ್ ಹೇಳುವುದಕ್ಕೂ ಮರೆತಿಲ್ಲ. ಅದರೊಟ್ಟಿಗೆ, ನಾನೊಂದು ಯೂಟ್ಯೂಬ್ ಚಾನೆಲ್ ಆರಂಭ ಮಾಡುತ್ತಿದ್ದೇನೆ ಎಂಬುದಾಗಿ ಘೋಷಿಸಿದ್ದಾರೆ. ಎಲ್ಲರಿಗೂ ಇಷ್ಟವಾಗವಂಥ ಅದ್ಭುತ ಕಂಟೆಂಟ್ ಜತೆ ಬರುವ ಭರವಸೆಯನ್ನೂ ನೀಡಿದ್ದಾರೆ. ಆದರೆ, ಯೂಟ್ಯೂಬ್ನ ಹೆಸರು ಏನು? ಅದರಲ್ಲಿ ಬರುವ ಕಂಟೆಂಟ್ ಯಾವುದಕ್ಕೆ ಸಂಬಂಧಿಸಿದ್ದು ಎಂಬುದನ್ನು ಪ್ರಕಟಿಸಿಲ್ಲ.
ಹರಿಪ್ರಿಯಾ ಮಾಡಿದ ಟ್ವೀಟ್ ಇಲ್ಲಿದೆ
ನಿಮ್ಮೆಲ್ಲರ ಊಹೆ ಮತ್ತು ಕಲ್ಪನೆಗಳಿಗೆ ಧನ್ಯವಾದಗಳು ಗೆಳೆಯರೇ, ಇಲ್ಲೊಂದು ಸುದ್ದಿಯಿದೆ. ನನ್ನದೊಂದು ಯೂಟ್ಯೂಚ್ ಚಾನೆಲ್ ಅನ್ನು ಆರಂಭಿಸುತ್ತಿದ್ದೇನೆ. ಹೆಚ್ಚಿನ ಮಾಹಿತಿಗಾಗಿ ಕಾಯುತ್ತಲೇ ಇರಿ. ನಿಮ್ಮೊಂದಿಗೆ ಅತ್ಯುತ್ತಮ ವಿಚಾರಗಳನ್ನು ಹಂಚಿಕೊಳ್ಳಲಿದ್ದೇನೆ ಎಂದು ಹರಿಪ್ರಿಯಾ ಬರೆದುಕೊಂಡಿದ್ದಾರೆ.
ಹರಿಪ್ರಿಯಾ ಹಾಗೂ ವಸಿಷ್ಠ ಸಿಂಹ ಜೋಡಿ ಕಳೆದ ಜನವರಿಯಲ್ಲಿ ಮದುವೆಯಾಗಿದ್ದರು. ಸ್ಯಾಂಡಲ್ವುಡ್ ಸ್ಟಾರ್ ನಟಿ ಹರಿಪ್ರಿಯಾ ಅವರನ್ನು ಪ್ರತಿಭಾವಂತ ನಟ ವಸಿಷ್ಠ ಮದುವೆಯಾಗುವುದು ದೊಡ್ಡ ಸುದ್ದಿಯಾಗಿತ್ತು. ಇದೀಗ ಅವರು ಸುಂದರ ಜೀವನ ನಡೆಸುತ್ತಿದ್ದಾರೆ. ಮದುವೆಯ ಬಳಿಕ ಹರಿಪ್ರಿಯಾ ಸಿನಿಮಾ ಕ್ಷೇತ್ರದಲ್ಲಿ ಮುಂದುವರಿಯುತ್ತಾರಾ ಎಂಬ ಅನುಮಾನವೊಂದು ಮೂಡಿತ್ತು. ಅದಕ್ಕೆ ಸ್ಪಷ್ಟ ಉತ್ತರ ಇನ್ನೂ ದೊರಕಿಲ್ಲ. ಆದರೆ, ಯೂಟ್ಯೂಬ್ ಚಾನೆಲ್ ಮೂಲಕ ಮತ್ತೆ ಜನರಿಗೆ ಹತ್ತಿರವಾಗುವ ಪ್ರಯತ್ನ ಮಾಡಿದ್ದಾರೆ.