ಚೆನ್ನೈ: ದಕ್ಷಿಣ ಭಾರತ ಚಿತ್ರರಂಗದ ಜನಪ್ರಿಯ ನಾಯಕಿ ತ್ರಿಶಾ (Actresses Trisha). ಅತೀ ಹೆಚ್ಚು ಸಂಭಾವನೆ ಪಡಯುವ ನಾಯಕಿಯರಲ್ಲಿ ಇವರೂ ಒಬ್ಬರು. ಚಿತ್ರರಂಗ ಪ್ರವೇಶಿಸಿ 2 ದಶಕ ಕಳೆದರೂ ಅವರ ಬೇಡಿಕೆ ಇನ್ನೂ ಕಡಿಮೆಯಾಗಿಲ್ಲ. ಸ್ಯಾಂಡಲ್‌ವುಡ್‌ ನಟ ಪುನೀತ್‌ ರಾಜ್‌ಕುಮಾರ್‌ (Puneeth Rajkumar) ಅವರಿಂದ ಹಿಡಿದು ಮಾಲಿವುಡ್‌ ಸ್ಟಾರ್‌ ಮೋಹನ್‌ಲಾಲ್‌ವರೆಗೆ (Mohanlal) ದಕ್ಷಿಣ ಭಾರತದ ಬಹುತೇಕ ಎಲ್ಲ ಸ್ಟಾರ್‌ ನಾಯಕರೊಂದಿಗೆ ಅಭಿನಯಿಸಿದ ಖ್ಯಾತಿ ತ್ರಿಶಾ ಅವರಿಗಿದೆ. ಇದೀಗ ಅವರು ಎರಡನೇ ಬಾಲಿವುಡ್‌ ಚಿತ್ರದಲ್ಲಿ ನಟಿಸಲು ಸಜ್ಜಾಗಿದ್ದಾರೆ ಎಂದು ಮೂಲಗಳು ತಿಳಿಸಿವೆ.
ಯಾರಿಗೆ ಜೋಡಿ?
ತ್ರಿಶಾ ಈ ಹಿಂದೆಯೂ ಹಿಂದಿ ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದರು. 2010ರಲ್ಲಿ ತೆರೆಕಂಡ ʼಕಟ್ಟಾ ಮೀಟಾʼ ಚಿತ್ರದಲ್ಲಿ ತ್ರಿಶಾ ನಾಯಕಿಯಾಗಿದ್ದರು. ಪ್ರಿಯದರ್ಶನ್‌ ನಿರ್ದೇಶನದ ಈ ಚಿತ್ರದಲ್ಲಿ ಅಕ್ಷಯ್‌ ಕುಮಾರ್‌ಗೆ ಜೋಡಿಯಾಗಿ ತ್ರಿಶಾ ಕಾಣಿಸಿಕೊಂಡಿದ್ದರು. ಆ ಮೂಲಕ ಬಾಲಿವುಡ್‌ನಲ್ಲಿ ಅದೃಷ್ಟ ಪರೀಕ್ಷೆಗೆ ಇಳಿದಿದ್ದರು. ಆದರೆ ಲಕ್‌ ಸರಿ ಇರಲಿಲ್ಲ. ಸಿನಿಮಾ ಅಂದುಕೊಂಡಷ್ಟು ಹಿಟ್‌ ಆಗಲಿಲ್ಲ. ಆ ಬಳಿಕ ದಕ್ಷಿಣ ಭಾರತ ಚಿತ್ರರಂಗದಲ್ಲೇ ತ್ರಿಶಾ ಬ್ಯುಸಿಯಾದರು. ಇದೀಗ ಮತ್ತೆ ಸುಮಾರು 13 ವರ್ಷಗಳ ಬಳಿಕ ಹಿಂದಿ ಸಿನಿಮಾದತ್ತ ಮುಖ ಮಾಡಿದ್ದಾರೆ. ನಿರ್ದೇಶಕ ವಿಷ್ಣುವರ್ಧನ್‌ ಆ್ಯಕ್ಷನ್‌ ಕಟ್‌ ಹೇಳಲಿರುವ ಮುಂಬರುವ ಹಿಂದಿ ಚಿತ್ರದಲ್ಲಿ ನಾಯಕಿಯಾಗಿ ತ್ರಿಶಾ ನಟಿಸಲಿದ್ದಾರೆ ಎನ್ನಲಾಗಿದೆ. ಬಾಲಿವುಡ್‌ ಸೂಪರ್‌ ಸ್ಟಾರ್‌ ಸಲ್ಮಾನ್‌ ಖಾನ್‌ ಈ ಸಿನಿಮಾದಲ್ಲಿ ನಾಯಕನಾಗಿ ನಟಿಸಲಿದ್ದಾರೆ. ಸದ್ಯದಲ್ಲೇ ಚಿತ್ರದ ಕುರಿತಾದ ಅಧಿಕೃತ ಪ್ರಕಟಣೆ ಹೊರ ಬೀಳಲಿದೆ. ಈ ಚಿತ್ರದ ಮೂಲಕ ತ್ರಿಶಾ ಬಾಲಿವುಡ್‌ನಲ್ಲಿ ಗಟ್ಟಿಯಾಗಿ ನೆಲೆಯೂರಲಿದ್ದಾರೆ ಎಂದು ಅಭಿಮಾನಿಗಳು ಈಗಾಗಲೇ ಲೆಕ್ಕಾಚಾರದಲ್ಲಿ ತೊಡಗಿದ್ದಾರೆ.
ನಯನತಾರಾ ಮಿಂಚು
ದಕ್ಷಿಣ ಭಾರತದ ಮತ್ತೊಬ್ಬ ಪ್ರಮುಖ ನಾಯಕಿ ನಯನತಾರಾ ಈ ವರ್ಷ ಬಾಲಿವುಡ್‌ಗೆ ಯಶಸ್ವಿಯಾಗಿ ಪಾದರ್ಪಣೆ ಮಾಡಿದ್ದಾರೆ. ಅಟ್ಲೀ ನಿರ್ದೇಶನದ ʼಜವಾನ್‌ʼ ಚಿತ್ರದ ಮೂಲಕ ಅವರು ಶಾರುಖ್‌ ಖಾನ್‌ಗೆ ಜೋಡಿಯಾಗಿ ಹಿಂದಿ ಚಿತ್ರರಂಗ ಪ್ರವೇಶಿಸಿದ್ದರು. ಬಾಕ್ಸ್‌ ಆಫೀಸ್‌ನಲ್ಲಿ ಈ ಸಿನಿಮಾ 1,000 ಕೋಟಿ ರೂ.ಗಿಂತ ಹೆಚ್ಚು ಕಲೆಕ್ಷನ್‌ ಮಾಡಿತ್ತು. ಆ ಮೂಲಕ ಲೇಡಿ ಸೂಪರ್‌ ಸ್ಟಾರ್‌ ಹಿಂದಿ ಚಿತ್ರ ಪ್ರೇಮಿಗಳಿಗೂ ಮೋಡಿ ಮಾಡಿದ್ದರು. ಇದೀಗ ತ್ರಿಶಾ ಕೂಡ ಇದೇ ರೀತಿಯ ಮ್ಯಾಜಿಕ್‌ ಮಾಡುತ್ತಾರಾ ಎನ್ನುವ ಕುತೂಹಲ ಮೂಡಿದೆ.
ಇದನ್ನೂ ಓದಿ: Mansoor Ali Khan: ಅಸಭ್ಯ ಹೇಳಿಕೆ ನೀಡಿದ್ದಲ್ಲದೆ ತ್ರಿಶಾ ವಿರುದ್ಧವೇ ಮೊಕದ್ದಮೆ; ನಟನಿಗೆ ಕೋರ್ಟ್‌ ತಪರಾಕಿ
ಕೈ ತುಂಬಾ ಚಿತ್ರಗಳು
ಸದ್ಯ ತ್ರಿಶಾ ಕೈ ತುಂಬಾ ಚಿತ್ರಗಳಿವೆ. ತಮಿಳು ಚಿತ್ರ ನಿರ್ದೇಶಕ ಮಣಿರತ್ನಂ ಅವರ ʼಪೊನ್ನಿಯಿನ್‌ ಸೆಲ್ವನ್‌ʼ ಸರಣಿ ಚಿತ್ರದಲ್ಲಿ ತ್ರಿಶಾ ಗಮನ ಸೆಳೆದಿದ್ದರು. ಈ ಸಿನಿಮಾದಲ್ಲಿ ಹಲವು ಘಟಾನುಘಟಿ ತಾರೆಗಳಿದ್ದರೂ ತ್ರಿಶಾ ಪಾತ್ರ ಗಮನ ಸೆಳೆದಿತ್ತು. ಅಲ್ಲದೆ ದಳಪತಿ ವಿಜಯ್‌ ಜತೆ ನಟಿಸಿದ್ದ ʼಲಿಯೋʼ ಚಿತ್ರ ಕೂಡ ಬಾಕ್ಸ್‌ ಆಫೀಸ್‌ನಲ್ಲಿ ಉತ್ತಮ ಕಲೆಕ್ಷನ್‌ ಮಾಡಿದೆ. ಸದ್ಯ ತ್ರಿಶಾ ಅಜಿತ್‌ ಜತೆ ತಮಿಳಿನ ʼವಿಡ ಮುಯರ್ಚಿʼ, ಮಲೆಯಾಳಂನಲ್ಲಿ ಮೋಹನ್‌ಲಾಲ್‌ ಅವರೊಂದಿಗೆ ʼರಾಮ್‌ʼ, ಟೊವಿನೋ ಥಾಮಸ್‌ ಜತೆ ʼಐಡೆಂಟಿಟಿʼ ಮುಂತಾದ ಸಿನಿಮಾದಲ್ಲಿ ಅಭಿನಯಿಸುತ್ತಿದ್ದಾರೆ.
ಈ ಸಂಗತಿಯ ಕುರಿತು ನಿಮ್ಮ ಅನಿಸಿಕೆ ಏನು? ಕಮೆಂಟ್ ಮೂಲಕ ತಿಳಿಸಿ