ಬೆಂಗಳೂರು: ಬಾಲಿವುಡ್ ನಟ ಅಜಯ್ ದೇವಗನ್ ಅವರಿಗೆ ಇಂದು ಹುಟ್ಟುಹಬ್ಬದ ಸಂಭ್ರಮ. ದೇಶದೆಲ್ಲೆಡೆಯ ಅಭಿಮಾನಿಗಳು ತಮ್ಮ ನೆಚ್ಚಿನ ನಟನ ಹುಟ್ಟುಹಬ್ಬಕ್ಕೆ ಶುಭ ಹಾರೈಸುತ್ತಿದ್ದಾರೆ. ಅಜಯ್ ದೇವಗನ್ (Ajay Devagan) ಮೂರು ದಶಕಗಳಿಗೂ ಹೆಚ್ಚು ಕಾಲದಿಂದ ಭಾರತೀಯ ಚಲನಚಿತ್ರೋದ್ಯಮದ ಪ್ರಮುಖ ಭಾಗವಾಗಿದ್ದಾರೆ. ಕಾಮಿಡಿ, ಆ್ಯಕ್ಷನ್, ಡ್ರಾಮಾ, ರೊಮ್ಯಾನ್ಸ್, ಗಂಭೀರ ವ್ಯಕ್ತಿತ್ವ ಹೀಗೆ ಎಲ್ಲ ಪಾತ್ರಗಳಲ್ಲೂ ಮನೋಜ್ಞ ಅಭಿನಯದಿಂದ ಸಿನಿರಸಿಕರ ಮೆಚ್ಚುಗೆ ಪಡೆದಿದ್ದಾರೆ. ಬಾಲಿವುಡ್‌ನ ಬಹುಮುಖ ನಟರಲ್ಲಿ ಒಬ್ಬರೆನಿಸಿಕೊಂಡಿರುವ ಅಜಯ್ ದೇವಗನ್ ಅನೇಕ ಹಿಟ್ ಚಿತ್ರಗಳನ್ನು ನೀಡಿದ್ದಾರೆ.ಇನ್ನು ಪ್ರತಿಷ್ಠಿತ ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿಯನ್ನು ಒಂದಲ್ಲ ಎರಡು ಬಾರಿ ತಮ್ಮ ಮುಡಿಗೇರಿಸಿಕೊಂಡಿದ್ದಾರೆ ಜೊತೆಗೆ ಪದ್ಮಶ್ರೀ ಪುರಸ್ಕೃತರು ಕೂಡ ಹೌದು.
ತಮ್ಮ ವೃತ್ತಿಜೀವನವನ್ನು ಆಕ್ಷನ್ ಹೀರೋ ಆಗಿ ಪ್ರಾರಂಭಿಸಿದ ಅಜಯ್ ದೇವಗನ್ ಬಳಿಕ ನಿರ್ದೇಶಕ ಮತ್ತು ನಿರ್ಮಾಪಕರಾಗಿಯೂ ಸಿನಿಕ್ಷೇತ್ರದಲ್ಲಿ ಸೈ ಎನಿಸಿಕೊಂಡಿದ್ದರು.
ಇದನ್ನೂ ಓದಿ:SS Rajamouli: ಹೆಂಡತಿ ಜತೆ ರಾಜಮೌಳಿ ಲವ್ಲಿ ಡ್ಯೂಯೆಟ್‌! ನೀವೆ ನೋಡಿ ಈ ಜೋಡಿಯ ಡ್ಯಾನ್ಸ್‌!
ಏಪ್ರಿಲ್ 2ರಂದು 55ನೇ ಹುಟ್ಟುಹಬ್ಬದ ಸಂಭ್ರಮದಲ್ಲಿರುವ ನಟನ ಬಗ್ಗೆ ಒಂದಷ್ಟು ಮಾಹಿತಿಗಳು ಇಲ್ಲಿವೆ ನೋಡಿ.
- 1969ರಲ್ಲಿ ಜನಿಸಿದ ಅಜಯ್ ದಿವಂಗತ ಸಾಹಸ ನಿರ್ದೇಶಕ ವೀರು ದೇವಗನ್ ಅವರ ಮಗ.
- ಅಜಯ್ ಅವರ ನಿಜವಾದ ಹೆಸರು ವಿಶಾಲ್. ತಮ್ಮ ಮೊದಲ ಚಿತ್ರದ ಬಿಡುಗಡೆಯ ಮೊದಲು ಹೆಸರು ಬದಲಾಯಿಸಿದರು. ವಿಶಾಲ್ ಎಂಬ ಹಲವಾರು ನಟರು ಒಂದೇ ಸಮಯದಲ್ಲಿ ಲಾಂಚ್ ಆಗಿದ್ದರಿಂದ ಅವರು ತಮ್ಮ ಹೆಸರನ್ನು ಬದಲಾಯಿಸಬೇಕಾಯಿತು.
- ಅಜಯ್ 1991 ರಲ್ಲಿ ಫೂಲ್ ಔರ್ ಕಾಂಟೆ ಚಿತ್ರದ ಮೂಲಕ ನಟನೆಗೆ ಪಾದಾರ್ಪಣೆ ಮಾಡಿದರು. ಕುಕು ಕೊಹ್ಲಿ ಅವರ ನಿರ್ದೇಶನದ ಈ ಚಿತ್ರದಲ್ಲಿ ನಟಿ ಮಧು ಕೂಡ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು.
- ಫೂಲ್ ಔರ್ ಕಾಂಟೆಗಾಗಿ ಅಜಯ್ ಫಿಲ್ಮ್‌ಫೇರ್ ಬೆಸ್ಟ್ ಮೇಲ್ ಚೊಚ್ಚಲ ಪ್ರಶಸ್ತಿಯನ್ನು ಪಡೆದರು.
- ಅದರ ನಂತರ ಜಿಗರ್, ದಿಲ್ವಾಲೆ, ಸುಹಾಗ್, ವಿಜಯಪಥ್ ಮುಂತಾದ ಹಲವಾರು ದೊಡ್ಡ ಚಿತ್ರಗಳಲ್ಲಿ ಕಾಣಿಸಿಕೊಂಡರು.
- 1999 ರಲ್ಲಿ, ಅಜಯ್ ನಟಿ ಕಾಜೋಲ್ ಅವರೊಂದಿಗೆ ವಿವಾಹವಾದರು.
- ಅಜಯ್ ಮತ್ತು ಕಾಜೋಲ್ 2003 ರಲ್ಲಿ ನೈಸಾ ದೇವಗನ್ ಎಂಬ ಹೆಣ್ಣು ಮಗುವನ್ನು ಪಡೆದರು ಮತ್ತು ಮಗ ಯುಗ್ 2010 ರಲ್ಲಿ ಜನಿಸಿದರು.
- 2009 ರಲ್ಲಿ, ಅಜಯ್ ತನ್ನ ಕುಟುಂಬದ ಸದಸ್ಯರ ಕೋರಿಕೆಯ ಮೇರೆಗೆ ತನ್ನ ಉಪನಾಮವನ್ನು ದೇವಗನ್ ನಿಂದ ದೇವಗ್ನ್ ಎಂದು ಬದಲಾಯಿಸಿದರು.
- ಅಜಯ್ ದೇವಗನ್ ಶಿವನ ಅತ್ಯಂತ ದೊಡ್ಡ ಭಕ್ತ.
- 2008 ರಲ್ಲಿ, ಅಜಯ್ ಯು, ಮಿ ಔರ್ ಹಮ್ ಚಿತ್ರದ ಮೂಲಕ ನಿರ್ದೇಶಕರಾಗಿ ಪಾದಾರ್ಪಣೆ ಮಾಡಿದರು ನಂತರ ಶಿವಾಯ್ (2016), ರನ್ ವೇ 34 (2022) ಮತ್ತು ಭೋಲಾ (2023) ಚಿತ್ರಗಳನ್ನು ನಿರ್ದೇಶಿಸಿದರು.
ಹಿಂದಿ ಚಿತ್ರರಂಗದಲ್ಲಿ ಸಾಕಷ್ಟು ಶ್ರೀಮಂತ ನಟರಲ್ಲಿ ಅಜಯ್ ಕೂಡ ಒಬ್ಬರು. ಅವರ ಆಸ್ತಿ ಮೌಲ್ಯ 534 ಕೋಟಿ ರೂಪಾಯಿಗೂ ಹೆಚ್ಚು. ಇನ್ನು ಅಜಯ್ ದೇವಗನ್ ಗೆ ಕಾರುಗಳೆಂದರೆ ಬಹಳ ಇಷ್ಟವಂತೆ. ಇವರ ಬಳಿ ದುಬಾರಿ ಕಾರುಗಳ ಸಂಗ್ರಹವಿದೆ. ಹೆಚ್ಚು ಕಾರುಗಳನ್ನು ಹೊಂದಿರುವ ಬಾಲಿವುಡ್ ಸ್ಟಾರ್ ಗಳ ಸಾಲಿಗೆ ಅಜಯ್ ಕೂಡ ಸೇರಿದ್ದಾರೆ.