ಮುಂಬೈ: ಅಮಿತಾಭ್‌ ಬಚ್ಚನ್‌ (Amitabh Bachchan) ಬಾಲಿವುಡ್‌ನ ಹಿರಿಯ ನಟ. ಅವರಿಗೆ ದೊಡ್ಡ ಮಟ್ಟದ ಅಭಿಮಾನಿ ಬಳಗವೇ ಇದೆ. ಅವರನ್ನು ಕಾಣಲೆಂದೇ ಮುಂಬೈನಲ್ಲಿರುವ ಅವರ ನಿವಾಸವಾದ ಜಲ್ಸಾ ಮುಂದೆ ಪ್ರತಿದಿನ ನೂರಾರು ಮಂದಿ ಸೇರುತ್ತಾರೆ. ಅಭಿಮಾನಿಗಳ ಪ್ರೀತಿಗೆ ಬೆಲೆ ಕೊಡುವ ಅಮಿತಾಭ್‌ ಪ್ರತಿ ಭಾನುವಾರ ಮನೆಯ ಗೇಟನ್ನು ತೆಗೆದು ಅಭಿಮಾನಿಗಳಿಗೆ ನಮಸ್ಕರಿಸುತ್ತಾರೆ. ಇದೀಗ ಅದರ ವಿಚಾರವಾಗಿಯೇ ಅವರು ವಿಡಿಯೊವೊಂದನ್ನು ಹಂಚಿಕೊಂಡಿದ್ದಾರೆ.
ಈ ಭಾನುವಾರದಂದು ತಮ್ಮನ್ನು ನೋಡಲೆಂದು ಮನೆ ಗೇಟಿನ ಬಳಿ ಬಂದಿದ್ದ ನೂರಾರು ಅಭಿಮಾನಿಗಳ ವಿಡಿಯೊವನ್ನು ಅಮಿತಾಭ್‌ ತಮ್ಮ ಇನ್‌ಸ್ಟಾಗ್ರಾಂ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ. ಅದರಲ್ಲಿ ಅಭಿಮಾನಿಗಳು ನಟನಿಗೆ ಪ್ರೀತಿ ತೋರಿಸಿದ ಬಗೆಯನ್ನೂ ಸೆರೆ ಹಿಡಿಯಲಾಗಿದೆ. ಹಾಗೆಯೇ ಮನೆಯ ಗೇಟನ್ನು ತೆರೆದು ಅಮಿತಾಭ್‌ ಅಭಿಮಾನಿಗಳತ್ತ ಕೈ ಬೀಸಿ, ನಮಸ್ಕರಿಸುವುದನ್ನೂ ತೋರಿಸಲಾಗಿದೆ.
ಇದನ್ನೂ ಓದಿ: Viral News: ಮಹಿಳಾ ಟೀಚರ್‌ ಜತೆ ಓಡಿ ಹೋದ 17 ವರ್ಷದ ಬಾಲಕಿ, ಇಲ್ಲೂ ಲವ್‌ ಜಿಹಾದ್‌ ಶಂಕೆ
ಈ ವಿಡಿಯೊವನ್ನು ಹಂಚಿಕೊಂಡಿರುವ ಅಮಿತಾಭ್‌, “ನಿಮ್ಮ ವಾತ್ಸಲ್ಯಕ್ಕೆ ನನ್ನ ಪ್ರೀತಿ. 1982ರಿಂದ ಪ್ರತಿ ಭಾನುವಾರ” ಎಂದು ಬರೆದುಕೊಂಡಿದ್ದಾರೆ. ಈ ವಿಡಿಯೊ ಸಾಮಾಜಿಕ ಜಾಲತಾಣಗಳ ತುಂಬೆಲ್ಲ ಹರಿದಾಡಿದೆ. ಸೋಮವಾರ ಹಂಚಿಕೊಳ್ಳಲಾಗಿರುವ ವಿಡಿಯೊವನ್ನು ಈಗಾಗಲೇ ಲಕ್ಷಾಂತರ ಮಂದಿ ವೀಕ್ಷಿಸಿದ್ದು, ಮೂರು ಲಕ್ಷಕ್ಕೂ ಅಧಿಕ ಮಂದಿ ವಿಡಿಯೊವನ್ನು ಲೈಕ್‌ ಮಾಡಿದ್ದಾರೆ. ಸಾವಿರಾರು ಮಂದಿ ವಿಡಿಯೊವನ್ನು ತಮ್ಮ ಸ್ನೇಹಿತರೊಂದಿಗೆ ಹಂಚಿಕೊಂಡಿದ್ದಾರೆ.
ನಟಿ ಶಿಲ್ಪಾ ಶೆಟ್ಟಿ ಅವರು ವಿಡಿಯೊಗೆ ʼಲೆಜೆಂಡ್‌ʼ ಎಂದು ಕಾಮೆಂಟ್‌ ಮಾಡಿದ್ದಾರೆ. ಹಾಗೆಯೇ ನಟಿ ಮೌನಿ ರಾಯ್‌ ಕೂಡ ಹಾರ್ಟ್‌ ಇಮೋಜಿಗಳನ್ನು ಕಾಮೆಂಟ್‌ನಲ್ಲಿ ಹಾಕಿದ್ದಾರೆ. ಅವರಲ್ಲದೆ ಹತ್ತಾರು ಮಂದಿ ಗಣ್ಯರು ಮತ್ತು ಸಾವಿರಾರು ಮಂದಿ ಅಭಿಮಾನಿಗಳು ವಿಡಿಯೊಗೆ ಕಾಮೆಂಟ್‌ಗಳನ್ನು ಮಾಡಿದ್ದಾರೆ. ಅಮಿತಾಭ್‌ ಅವರ ಬಗ್ಗೆ ತಮಗಿರುವ ಪ್ರೀತಿಯನ್ನು ಹಾಗೆಯೇ, ಅಮಿತಾಭ್‌ ಅವರು ಅಭಿಮಾನಿಗಳಿಗೆ ತೋರಿಸುವ ಪ್ರೀತಿಯನ್ನು ಕಾಮೆಂಟ್‌ನಲ್ಲಿ ಕೊಂಡಾಡಲಾಗಿದೆ.