ಬೆಂಗಳೂರು: ಇಂದು (ಅ.11) ಬಿಗ್ ಬಿ ಅಮಿತಾಭ್ ಬಚ್ಚನ್ (Amitabh Bachchan) ಅವರಿಗೆ ಜನುಮದಿನದ ಸಂಭ್ರಮ. ನಿನ್ನೆ ರಾತ್ರಿಯಿಂದಲೇ ಮುಂಬೈನ ಜುಹುದಲ್ಲಿರುವ ಅಮಿತಾಭ್ ಅವರ ಮನೆಯ ಹೊರಗೆ ಶುಭಾಶಯ ಕೋರಲು ಅಭಿಮಾನಿಗಳು ನೆರದಿದ್ದರು. ಅಮಿತಾಭ್ 81 ವರ್ಷದ ಸಂಭ್ರಮಾಚರಣೆಯಲ್ಲಿದ್ದಾರೆ. ಅಮಿತಾಭ್ ಕೂಡ ಮನೆಯಿಂದ ಹೊರಬಂದು ಅಭಿಮಾನಿಗಳಿಗೆ ಧನ್ಯವಾದ ಸೂಚಿಸಿದರು. ಇದೀಗ ಈ ಫೋಟೊಗಳು ವೈರಲ್ ಆಗಿವೆ.
81ರ ಹರೆಯದಲ್ಲೂ ಅಮಿತಾಭ್ ಬಚ್ಚನ್ ಅವರು ಸಿನಿರಂಗದಲ್ಲಿ ಸಕ್ರಿಯರಾಗಿದ್ದಾರೆ. ಅವರ ಬಳಿ ಹಲವಾರು ಸಿನಿಮಾಗಳೂ ಇವೆ. ಹುಟ್ಟುಹಬ್ಬದ ವಿಶೇಷ ಸಂದರ್ಭದಲ್ಲಿ, ಅಮಿತಾಭ್ ಬಚ್ಚನ್ ಅವರ ಅಭಿಮಾನಿಗಳು ಅವರ ಮುಂಬೈ ನಿವಾಸ ಜಲ್ಸಾದ ಹೊರಗೆ ಜಮಾಯಿಸಿ ಶುಭ ಹಾರೈಸಿದರು. ಕೆಲವು ಅಭಿಮಾನಿಗಳು ಈ ಫೋಟೊಗಳನ್ನು ಸೋಷಿಯಲ್‌ ಮೀಡಿಯಾದಲ್ಲಿ ಪೋಸ್ಟ್‌ ಮಾಡಿದ್ದಾರೆ. ಮನೆಯ ಮುಂದೆ ಅಭಿಮಾನಿಗಳು ಕುಣಿದು ಕುಪ್ಪಳಿಸಿದ್ದಾರೆ. 12:10ರ ಸುಮಾರಿಗೆ, ಅಮಿತಾಭ್ ಬಚ್ಚನ್ ಮನೆಯ ಮುಂಭಾಗದಲ್ಲಿ ಸುಮಾರು ಒಂದು ನಿಮಿಷ ಕಾಣಿಸಿಕೊಂಡರು ಎಂದು ವರದಿಯಾಗಿದೆ.
ಕೌನ್ ಬನೇಗಾ ಕರೋಡ್ಪತಿ ಮುಂಬರುವ ಸಂಚಿಕೆಯಲ್ಲಿ ಬಾಲಿವುಡ್ ನಟ ಅಮಿತಾಭ್ ಬಚ್ಚನ್ (Amitabh Bachchan) ತಮ್ಮ 81 ನೇ ಹುಟ್ಟುಹಬ್ಬವನ್ನು ಆಚರಿಸಿಕೊಳ್ಳಲಿದ್ದಾರೆ. ಈ ಸಂದರ್ಭವನ್ನು ಆಚರಿಸಲು ಇಡೀ ದೇಶವು ಒಂದಾಗುತ್ತದೆ ಎಂದು ಹೇಳಲಾಗಿದ್ದು, ಆ ಎಪಿಸೋಡ್ ಕೌತುಕ ಮೂಡಿಸಿದೆ. ಈ ಕಾರ್ಯಕ್ರಮದ ಪ್ರೋಮೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಬಿಡುಗಡೆಗೊಂಡಿದೆ. ಅದರಲ್ಲಿ ಶುಭಾಶಯಗಳನ್ನು ಸ್ವೀಕರಿಸಿದ ಅಮಿತಾಭ್ ಅವರು ಆನಂದಭಾಷ್ಟ ಸುರಿಸುವ ದೃಶ್ಯಗಳಿವೆ. ಹೀಗಾಗಿ ವಿಡಿಯೊ ವೈರಲ್ ಆಗಿದೆ.
ಇದನ್ನೂ ಓದಿ: Amitabh Bachchan : ಬರ್ತ್ಡೇ ಶುಭಾಶಯಗಳಿಗೆ ಮನಕರಗಿ ಆನಂದಭಾಷ್ಪ ಸುರಿಸಿದ ಬಿಗ್ ಬಿ ಅಮಿತಾಭ್
Birthday boy Amitabh Bachchan makes a surprise midnight appearance outside his home #BigB #AmitabhBachchanpic.twitter.com/oG2vGToXdr
— Azam Sajjad (@AzamDON) October 10, 2023
ಕೌನ್ ಬನೇಗಾ ಕರೋಡ್ಪತಿ ವಿಶೇಷ ಸಂಚಿಕೆ
ವರದಿಯ ಪ್ರಕಾರ, ಬಾಲಿವುಡ್ ಬಿಗ್ಬಿಗೆ ಸರಣಿ ಆಶ್ಚರ್ಯಗಳು ಸಾಲುಗಟ್ಟಿ ನಿಂತಿವೆ. ಇದರಲ್ಲಿ ಜನಪ್ರಿಯ ಸರೋದ್ ವಾದಕ ಪದ್ಮವಿಭೂಷಣ ಉಸ್ತಾದ್ ಅಮ್ಜದ್ ಅಲಿ ಖಾನ್ ಅವರ ಪ್ರದರ್ಶನವೂ ಸೇರಿದೆ ಎನ್ನಲಾಗಿದೆ. ಚಿರಂಜೀವಿ, ಅನುಪಮ್ ಖೇರ್, ವಿದ್ಯಾ ಬಾಲನ್, ವಿಕ್ಕಿ ಕೌಶಲ್, ಆರ್ ಮಾಧವನ್ ಮತ್ತು ಬೊಮನ್ ಇರಾನಿ ಸೇರಿದಂತೆ ಹಲವಾರು ಸೆಲೆಬ್ರಿಟಿಗಳು ಅಮಿತಾಭ್ಗೆ ವಿಶೇಷ ವೀಡಿಯೊ ಸಂದೇಶಗಳ ಮೂಲಕ ಶುಭಾಶಯಗಳನ್ನು ಕಳುಹಿಸಲಿದ್ದಾರೆ ಎಂದು ಹೇಳಲಾಗಿದೆ.
ಈ ಸಂಚಿಕೆಯಲ್ಲಿ ಹಿಂದಿನ ಕೆಬಿಸಿ ವಿಜೇತರಾದ ಸೀಸನ್ 11 ರ ಬಾಬಿಯು ತಾವ್ಡೆ ಮತ್ತು ಸೀಸನ್ 13ರ ಹಿಮಾನಿ ಬುಂದೇಲಾ ಭಾಗವಹಿಸಲಿದ್ದಾರೆ. ಈ ಋತುವಿನ ಮೊದಲ ಕೋಟ್ಯಧಿಪತಿ ವಿಜೇತ ಜಸ್ಕರನ್ ಸಿಂಗ್ ಕೂಡ ಆಚರಣೆಯ ಭಾಗವಾಗಲಿದ್ದಾರೆ. ಪ್ರೇಕ್ಷಕರಲ್ಲಿ ಅಭಿಮಾನಿಗಳು ಕಲೆ, ರೇಖಾಚಿತ್ರಗಳು ಸೇರಿದಂತೆ ಅಮಿತಾಭ್ ಅವರಿಗೆ ವಿಶೇಷ ಉಡುಗೊರೆಗಳನ್ನು ನೀಡಲಿದ್ದಾರೆ. ಈ ಸಂಚಿಕೆಯಲ್ಲಿ ಭಾರತೀಯ ಸೇನೆಯ ಸಾಮಾಜಿಕ ಸೇವೆಗಳ ತಂಡದಿಂದ ವಿಶೇಷ ಸಂದೇಶವನ್ನು ಸಹ ನುಡಿಸಲಾಗುತ್ತದೆ. ಅವರು ರಾಷ್ಟ್ರಕ್ಕೆ ನೀಡಿದ ಕೊಡುಗೆಗಳಿಗಾಗಿ ಅಮಿತಾಭ್ ಅವರಿಗೆ ಧನ್ಯವಾದ ಅರ್ಪಿಸಲಿದ್ದಾರೆ.
ಸೌತ್‌ ಸಿನಿಮಾದಲ್ಲಿಯೂ ಬಿಗ್ ಬಿ ಹವಾ!
ಅಮಿತಾಭ್ ಅವರು ಪ್ರಭಾಸ್ ಮತ್ತು ದೀಪಿಕಾ ಪಡುಕೋಣೆ ಅವರೊಂದಿಗೆ ‘ಪ್ರಾಜೆಕ್ಟ್ ಕೆ’ ಚಿತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಅಷ್ಟೇ ಅಲ್ಲದೇ ಟೈಗರ್ ಶ್ರಾಫ್ ಅವರ ‘ಗಣಪತ್’ ಮತ್ತು ‘ದಿ ಇಂಟರ್ನ್’ ಹಿಂದಿ ರಿಮೇಕ್‌ನಲ್ಲಿಯೂ ಕಾಣಿಸಿಕೊಳ್ಳಲಿದ್ದಾರೆ.
ಇದನ್ನೂ ಓದಿ: Amitabh Bachchan: ಫ್ಲಿಪ್‌ಕಾರ್ಟ್, ಅಮಿತಾಭ್ ಬಚ್ಚನ್ ವಿರುದ್ಧ ದೂರು ದಾಖಲಿಸಿದ CAIT; ಏನಿದು ಕೇಸ್?
ಸೂಪರ್‌ಸ್ಟಾರ್‌ಗಳಾದ ಶಾರುಖ್ ಖಾನ್ ಮತ್ತು ಅಮಿತಾಭ್ ಬಚ್ಚನ್ 17 ವರ್ಷಗಳ ಬಳಿಕ ಶೀಘ್ರದಲ್ಲೇ ಒಂದು ಪ್ರಾಜೆಕ್ಟ್‌ಗಾಗಿ ಒಟ್ಟಿಗೆ ತೆರೆಗೆ ಬರುತ್ತಿದ್ದಾರೆ. 2006ರಲ್ಲಿ ಬಿಡುಗಡೆಯಾದ ‘ಕಭಿ ಅಲ್ವಿದಾ ನಾ ಕೆಹನಾ’ದಲ್ಲಿ (Kabhi Alvida Naa Kehna) ಕೊನೆಯ ಬಾರಿಗೆ ಈ ಜೋಡಿ ಒಟ್ಟಿಗೆ ತೆರೆ ಹಂಚಿಕೊಂಡಿತ್ತು. ಈ ಸುದ್ದಿ ವೈರಲ್ ಆಗುತ್ತಿದ್ದಂತೆ ಸೋಷಿಯಲ್‌ ಮೀಡಿಯಾದಲ್ಲಿ ಇವರಿಬ್ಬರ ಫ್ಯಾನ್ಸ್‌ ಖುಷಿ ಹಂಚಿಕೊಳ್ಳುತ್ತಿದ್ದಾರೆ.
ಪ್ರಭಾಸ್, ದೀಪಿಕಾ ಪಡುಕೋಣೆ ಮತ್ತು ಕಮಲ್ ಹಾಸನ್ ನಟಿಸಿರುವ ಸೌತ್‌ ಸಿನಿಮಾ ‘ಕಲ್ಕಿ 2898 AD’ ನಲ್ಲಿಯೂ ಕಾಣಿಸಿಕೊಳ್ಳಲಿದ್ದಾರೆ. ‘ತಲೈವರ್ 170’ ಚಿತ್ರದಲ್ಲಿ ಅಮಿತಾಭ್ ಅವರು ರಜನಿ ಜತೆ ಪ್ರಮುಖ ಪಾತ್ರದಲ್ಲಿ ನಟಿಸುತ್ತಿದ್ದಾರೆ.