ಮುಂಬಯಿ: ಬಾಲಿವುಡ್‌ನ ಈ ವರ್ಷದ ಬಹು ನಿರೀಕ್ಷಿತ ಚಿತ್ರಗಳ ಪೈಕಿ ರಣಬೀರ್ ಕಪೂರ್‌ (Ranbir Kapoor) ನಟನೆಯ ಅನಿಮಲ್ (Animal) ಕೂಡ ಒಂದು. ಇತ್ತೀಚೆಗೆ ಈ ಸಿನಿಮಾದ ಟೀಸರ್‌ ಬಿಡುಗಡೆಯಾಗಿ ಭಾರೀ ಸದ್ದು ಮಾಡಿತ್ತು. ಜತೆಗೆ ನಟಿ ರಶ್ಮಿಕಾ ಮಂದಣ್ಣ (Rashmika Mandanna) ಕ್ಯಾರೆಕ್ಟರ್‌ ಪೋಸ್ಟರ್ ಕೂಡ ರಿಲೀಸ್‌ ಆಗಿತ್ತು. ಇದಕ್ಕೆ ನಟಿಯ ಫ್ಯಾನ್ಸ್‌ ಫಿದಾ ಆಗಿದ್ದರು. ಇದೀಗ ಚಿತ್ರತಂಡ ಮತ್ತೊಂದು ಪೋಸ್ಟರ್ ರಿಲೀಸ್‌ ಮಾಡಿದೆ. ಸದ್ಯ ಇದು ವೈರಲ್‌ ಆಗಿದೆ.
ಲಿಪ್‌ ಕಿಸ್‌ ಮಾಡಿದ ರಣಬೀರ್-ರಶ್ಮಿಕಾ
ಸಿನಿಮಾದ ಹಾಡು ಬಿಡುಗಡೆಯಾಗಲಿರುವ ಕುರಿತು ಮಾಹಿತಿ ನೀಡುವ ಈ ಪೋಸ್ಟರ್‌ನಲ್ಲಿ ರಣಬೀರ್ ಕಪೂರ್‌ ಮತ್ತು ರಶ್ಮಿಕಾ ಮಂದಣ್ಣ ಲಿಪ್‌ಕಿಸ್‌ ಮಾಡಿರುವ ದೃಶ್ಯ ಸೆರೆಯಾಗಿದೆ. ಹೆಲಿಕಾಪ್ಟರ್‌ ಒಳಗೆ ಕುಳಿತಿರುವ ಇಬ್ಬರು ಕಿಸ್‌ ಮಾಡಿಕೊಳ್ಳುತ್ತಿರುವುದು ಕಂಡುಬಂದಿದೆ.
ಪ್ಯಾನ್‌ ಇಂಡಿಯಾ ಚಿತ್ರವಾಗಿ ಇದು ತೆರೆಗೆ ಬರಲಿದೆ. ಹಿಂದಿಯಲ್ಲಿ ʼಹುವಾ ಮೈನ್‌ʼ, ತೆಲುಗಿನಲ್ಲಿ ʼಅಮ್ಮಾಯಿʼ, ತಮಿಳಿನಲ್ಲಿ ʼನೀ ವಾಡಿʼ, ಮಲೆಯಾಳಂನಲ್ಲಿ ʼಪೆನ್ನಾಳೆʼ ಮತ್ತು ಕನ್ನಡದಲ್ಲಿ ʼಓ ಬಾಲೆʼ ಎನ್ನುವ ಹಾಡು ನಾಳೆ(ಅಕ್ಟೋಬರ್‌ 11) ರಿಲೀಸ್‌ ಆಗಲಿದೆ. ರಶ್ಮಿಕಾ ಈ ಪೋಸ್ಟರ್ ಅನ್ನು ಇಸ್ಟಾಗ್ರಾಮ್‌ನಲ್ಲಿ ರಿಲೀಸ್‌ ಮಾಡಿ ಮಾಹಿತಿ ಹಂಚಿಕೊಂಡಿದ್ದಾರೆ.
ಟೀಸರ್‌ನಲ್ಲಿ ತೋರಿಸಿದಂತೆ ʼಅನಿಮಲ್ʼ ಚಿತ್ರ ತಂದೆ-ಮಗನ ಸಂಬಂಧದ ಸುತ್ತ ಸುತ್ತದೆ. ರಣಬೀರ್ ಕಪೂರ್‌ ತಂದೆಯಾಗಿ ಅನಿಲ್‌ ಕಪೂರ್‌ ಕಾಣಿಸಿಕೊಂಡಿದ್ದಾರೆ. ಸನ್ನಿ ಡಿಯೋಲ್‌ ಮುಖ್ಯ ಖಳನ ಪಾತ್ರದಲ್ಲಿ ಅಬ್ಬರಿಸಿದ್ದಾರೆ. ʼʼಇದು ಕ್ರೈಮ್‌ ಡ್ರಾಮ ಮತ್ತು ತಂದೆ-ಮಗನ ಕಥೆ ಹೇಳುತ್ತದೆ. ಅಭಿಮಾನಿಗಳು ನಿರೀಕ್ಷಿಸದ ರೀತಿ ನನ್ನ ಪಾತ್ರ ಮೂಡಿ ಬಂದಿದೆ. ನನ್ನ ಪಾತ್ರಕ್ಕೆ ಸ್ವಲ್ಪ ನೆಗೆಟಿವ್‌ ಛಾಯೆಯೂ ಇದೆʼʼ ಎಂದು ರಣಬೀರ್ ಕಪೂರ್‌ ಹೇಳಿದ್ದು ಅಭಿಮಾನಿಗಳಲ್ಲಿ ನಿರೀಕ್ಷೆ ಹೆಚ್ಚಿಸಿದೆ.
ಡಿಸೆಂಬರ್‌ 1ರಂದು ತೆರೆಗೆ
ತೆಲುಗಿನ ಸಂದೀಪ್‌ ರೆಡ್ಡಿ ವಂಗಾ ನಿರ್ದೇಶನದ ʼಅನಿಮಲ್ʼ ಚಿತ್ರ ಡಿಸೆಂಬರ್‌ 1ರಂದು ತೆರೆಗೆ ಬರಲಿದೆ. ತೆಲುಗಿನ ʼಅರ್ಜುನ್‌ ರೆಡ್ಡಿʼ, ಹಿಂದಿಯ ʼಕಬೀರ್‌ ಸಿಂಗ್‌ʼ ಮುಂತಾದ ಚಿತ್ರಗಳನ್ನು ನಿರ್ದೇಶಿಸಿ ಗೆದ್ದ ಸಂದೀಪ್‌ ರೆಡ್ಡಿ ಹ್ಯಾಟ್ರಿಕ್‌ ಗೆಲುವಿನ ನಿರೀಕ್ಷೆಯಲ್ಲಿದ್ದಾರೆ.
ಇದನ್ನೂ ಓದಿ: Animal teaser: ಬರ್ತ್‌ಡೇ ದಿನವೇ ರಣಬೀರ್ ಕಪೂರ್‌ ಅಬ್ಬರ; ‘ಅನಿಮಲ್’ ಟೀಸರ್‌ ಔಟ್‌!
ʼವಾರಿಸುʼ ಚಿತ್ರದ ಮೂಲಕ ಈ ವರ್ಷಾರಂಭದಲ್ಲಿ ಗೆಲುವು ದಾಖಲಿಸಿದ್ದ ರಶ್ಮಿಕಾ ಮಂದಣ್ಣ ಕೂಡ ʼಅನಿಮಲ್ʼ ಮೂಲಕ ಮತ್ತೊಮ್ಮೆ ಮ್ಯಾಜಿಕ್‌ ಮಾಡುವ ನಿರೀಕ್ಷೆಯಲ್ಲಿದ್ದಾರೆ. ಕಳೆದ ವರ್ಷ ಅಮಿತಾಬ್‌ ನಟನೆಯ ʼಗುಡ್‌ ಬೈʼ ಸಿನಿಮಾ ಮೂಲಕ ಭರ್ಜರಿಯಾಗಿ ಬಾಲಿವುಡ್‌ ಪ್ರವೇಶಿಸಿದ್ದ ರಶ್ಮಿಕಾಗೆ ಆ ಚಿತ್ರದ ಮೂಲಕ ನಿರೀಕ್ಷಿತ ಗೆಲುವು ದಕ್ಕಿರಲಿಲ್ಲ. ಬಳಿಕ ಸಿದ್ಧಾರ್ಥ್‌ ಮಲ್ಹೋತ್ರಾ ಜತೆಗೆ ನಟಿಸಿದ್ದ ʼಮಿಷನ್‌ ಮಜ್ನುʼ ಒಟಿಟಿ ಮೂಲಕ ರಿಲೀಸ್‌ ಆಗಿತ್ತು. ಇತ್ತ ರಣಬೀರ್ ಕಪೂರ್‌ ಕೂಡ ದೊಡ್ಡದೊಂದು ಗೆಲುವಿಗೆ ಕಾಯುತ್ತಿದ್ದಾರೆ. ಕಳೆದ ವರ್ಷ ತೆರೆಕಂಡ ʼಬ್ರಹ್ಮಾಸ್ತ್ರ ʼ ಚಿತ್ರ ಸಾಧಾರಣ ಯಶಸ್ವಿಯಾಗಿತ್ತು. ಈ ವರ್ಷ ಬಿಡುಗಡೆಯಾದ ʼತು ಜೂಟಿ ಮೆ ಮಕ್ಕಾರ್‌ʼ ಚಿತ್ರ ಕೂಡ ಮಿಶ್ರ ಪ್ರತಿಕ್ರಿಯೆ ಪಡೆದುಕೊಂಡಿತ್ತು. ಲವ್‌ ರಂಜನ್‌ ನಿರ್ದೇಶನದ ಈ ಚಿತ್ರದಲ್ಲಿ ಶ್ರದ್ಧಾ ಕಪೂರ್‌ ನಾಯಕಿಯಾಗಿ ಕಾಣಿಸಿಕೊಂಡಿದ್ದರು.