ಬೆಂಗಳೂರು: ಬಾಲಿವುಡ್‌ನ ಇಬ್ಬರು ಸ್ಟಾರ್ ಸಹೋದರಿಯರ (Bollywood Actress) ಫೋಟೊಗಳು ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಿವೆ. ಬ್ಲ್ಯಾಕ್‌ ಆಂಡ್ ವೈಟ್‌ ಫೋಟೊದಲ್ಲಿ ಚಿಕ್ಕ ಹುಡುಗಿಯೊಬ್ಬಳು ತಾಯಿಯ ಮಡಿಲಲ್ಲಿ ಕುಳಿತಿದ್ದಾಳೆ ಮತ್ತು ಅವಳ ಅಕ್ಕ ಅವಳ ಪಕ್ಕದಲ್ಲಿದ್ದಾಳೆ. ಈ ಇಬ್ಬರೂ ಸಹೋದರಿಯರು ಒಂದು ಕಾಲದಲ್ಲಿ ಬಾಲಿವುಡ್ ಸೂಪರ್‌ಸ್ಟಾರ್‌ಗಳಾಗಿದ್ದರು. ಅಷ್ಟೇ ಅಲ್ಲ, ಇಂದಿಗೂ ಚಿತ್ರರಂಗದಲ್ಲಿ ಸಕ್ರಿಯರಾಗಿದ್ದಾರೆ. ಫೋಟೋದಲ್ಲಿ ತಮ್ಮ ತಾಯಿಯೊಂದಿಗೆ ಕಾಣಿಸಿಕೊಂಡ ಹುಡುಗಿಯರು ಬೇರೆ ಯಾರೂ ಅಲ್ಲ, ಇಂದಿನ ಸೂಪರ್ ಸ್ಟಾರ್ ನಟಿ ಟಬು ಮತ್ತು ಅವರ ಅಕ್ಕ ಫರಹಾ ನಾಜ್.
ನಟಿಯ ಈ ಫೋಟೊ ಸೋಷಿಯಲ್ ಮೀಡಿಯಾದಲ್ಲಿ ಸಖತ್ ವೈರಲ್ ಆಗುತ್ತಿದ್ದು, ಜನರು ವಿವಿಧ ರೀತಿಯಲ್ಲಿ ಕಮೆಂಟ್ ಮಾಡುತ್ತಿದ್ದಾರೆ. ಕೆಲವರು ಫೋಟೋ ನೋಡಿ ತಮ್ಮ ನೆಚ್ಚಿನ ನಟಿ ಟಬು ಎಂದು ಸಂತೋಷ ವ್ಯಕ್ತಪಡಿಸುತ್ತಿದ್ದಾರೆ. ಟಬು ಅವರ ಪೂರ್ಣ ಹೆಸರು ತಬಸ್ಸುಮ್ ಫಾತಿಮಾ ಹಶ್ಮಿ. ಅವರು 4 ನವೆಂಬರ್ 1971ರಂದು ಹೈದರಾಬಾದ್‌ನಲ್ಲಿ ಜಮಾಲ್ ಹಶ್ಮಿ ಮತ್ತು ರಿಜ್ವಾನಾ ದಂಪತಿಗೆ ಜನಿಸಿದರು. ಟಬು ಅಕ್ಕ ಫರಹಾ ನಾಜ್ ಅವರು ಕೂಡಾ ಸಿನಿಮಾಗಳಲ್ಲಿ ಸಕ್ರಿಯರಾಗಿದ್ದರು. ಟಬು ಅವರ ಕುಟುಂಬದಿಂದ ಚಿತ್ರರಂಗದಲ್ಲಿ ಯಾರೂ ಇರಲಿಲ್ಲ. ಆದರೆ ಅವರ ಚಿಕ್ಕಮ್ಮ ಶಬಾನಾ ಅಜ್ಮಿ ಬಾಲಿವುಡ್‌ನ ಪ್ರಸಿದ್ಧ ನಟಿ. ಈಗ ಒಂದರ ಹಿಂದೆ ಒಂದರಂತೆ ಹಿಟ್ ಚಿತ್ರಗಳನ್ನು ನೀಡುತ್ತಿರುವ ಬಾಲಿವುಡ್ ನಟಿ ಟಬು ಸಖತ್ ಫ್ಯಾನ್ಸ್‌ ಹೊಂದಿದ್ದಾರೆ. ಟಬು ಬೋನಿ ಕಪೂರ್ ನಿರ್ಮಾಣದ ಚಿತ್ರ ‘ಪ್ರೇಮ್’ ಮೂಲಕ ಪದಾರ್ಪಣೆ ಮಾಡಿದರು. ಆದರೆ, ಈ ಚಿತ್ರ ತೆರೆಗೆ ಬರಲು ಬಹಳ ಸಮಯ ಹಿಡಿಯಿತು. ಚಿತ್ರದಲ್ಲಿ ಸಂಜಯ್ ಕಪೂರ್ ಅವರ ಜತೆ ನಟಿಸಿದ್ದರು.
ಇದನ್ನೂ ಓದಿ: ವಾರದ ವ್ಯಕ್ತಿಚಿತ್ರ : ಪಠಾಣ್‌ ಸಿನಿಮಾ ಮೂಲಕ ಗತವೈಭವ ಸೃಷ್ಟಿಸಲಿದ್ದಾರಾ ಬಾಲಿವುಡ್ ಬಾದ್‌ಶಾ ಶಾರುಖ್‌ ಖಾನ್‌?
ಇದನ್ನು ಓದಿ: Ajay Devgan | ಅಜಯ್ ದೇವಗನ್ ಅಭಿನಯದ ʻಭೋಲಾʼ ಟೀಸರ್‌ ರಿಲೀಸ್‌ ಡೇಟ್‌ ಅನೌನ್ಸ್‌
ಟಬು ಅಭಿನಯದ ʻಭೂಲ್ ಭುಲೈಯಾ 2 ʼಮತ್ತು ʻದೃಶ್ಯಂ 2ʼ ಚಿತ್ರಗಳು ಬಾಕ್ಸ್ ಆಫೀಸ್‌ನಲ್ಲಿ ಸೂಪರ್ ಹಿಟ್ ಆಗಿವೆ. ಇದೀಗ ನಟಿ ಅಜಯ್ ದೇವಗನ್ ಅವರೊಂದಿಗೆ ‘ಭೋಲಾ’ ಚಿತ್ರದಲ್ಲಿ ಪೊಲೀಸ್ ಅಧಿಕಾರಿಯ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.