ಆಂಧ್ರಪ್ರದೇಶ : ಬಾಲಿವುಡ್‌ ಬ್ಯೂಟಿ ನಟಿ ದೀಪಿಕಾ ಪಡುಕೋಣೆ ತಮ್ಮ ತಂದೆ ಪ್ರಕಾಶ್‌ ಪಡುಕೋಣೆ ಅವರ ಹುಟ್ಟುಹಬ್ಬದ ಹಿನ್ನೆಲೆಯಲ್ಲಿ ಆಂಧ್ರಪ್ರದೇಶದ ಪ್ರಸಿದ್ಧ ದೇಗುಲ ತಿರುಪತಿಗೆ ಇಂದು (ಶುಕ್ರವಾರ) ಕುಟುಂಬ ಸಮೇತರಾಗಿ ಆಗಮಿಸಿದ್ದಾರೆ.
ಮಾಜಿ ಬ್ಯಾಡ್ಮಿಂಟನ್‌ ಚಾಂಪಿಯನ್‌ ಪ್ರಕಾಶ್‌ ಪಡುಕೋಣೆ ಅವರಿಗೆ ಇಂದು 67ನೇ ವರ್ಷದ ಹುಟ್ಟುಹಬ್ಬ ಸಂಭ್ರಮ. ಈ ಹಿನ್ನೆಲೆಯಲ್ಲಿ ದೀಪಿಕಾ, ಪತಿ ರಣವೀರ್‌ ಸಿಂಗ್‌ ಹಾಗೂ ದೀಪಿಕಾ ಕುಟುಂಬಸ್ಥರು ತಿರುಪತಿಗೆ ಭೇಟಿ ನೀಡಿ ವೆಂಕಟೇಶ್ವರನ ದರ್ಶನ ಪಡೆದುಕೊಂಡಿದ್ದಾರೆ.
ಇದನ್ನು ಓದಿ| Cannesನಲ್ಲಿ ದೀಪಿಕಾ ಪಡುಕೋಣೆ ರಂಗು: ಜ್ಯೂರಿಯಾಗಿ ಮಿಂಚಿದ ಡಿಂಪಲ್‌ ಸುಂದರಿ
ದೇವಾಲಯದ ಆವರಣದಲ್ಲಿ ತಂದೆ ಮಗಳು ಇಬ್ಬರು ನೇರಳೆ ಬಣ್ಣದ ಶಾಲುಗಳನ್ನು ಧರಿಸಿ ದೇವರ ದರ್ಶನ ಪಡೆದುಕೊಂಡಿದ್ದಾರೆ. ಈ ಸಂದರ್ಭದಲ್ಲಿ ಪತಿ ರಣವೀರ್‌ ಸಿಂಗ್‌ ದೀಪಿಕಾ ಸಹೋದರಿ ಆನಿಶಾ ಪಡುಕೋಣೆ ಕೂಡ ಉಪಸ್ಥಿತರಿದ್ದರು.
ದೀಪಿಕಾ ಮತ್ತು ಕುಟುಂಬ ಈ ಹಿಂದೆ ತಮ್ಮ ಮೊದಲ ವಿವಾಹ ವಾರ್ಷಿಕೋತ್ಸವದ ಸಂದರ್ಭದಲ್ಲಿ ತಿರುಪತಿ ದೇವಸ್ಥಾನಕ್ಕೆ ಭೇಟಿ ನೀಡಿದ್ದರು. ಇದಾದ ಬಳಿಕ ಇಂದು (ಜೂನ್‌ 10) ತಮ್ಮ ತಂದೆಯ ಹುಟ್ಟುಹಬ್ಬದ ನಿಮಿತ್ತ ಕುಟುಂಬ ಸಮೇತವಾಗಿ ತಿಮ್ಮಪ್ಪನ ದರ್ಶನ ಪಡೆದುಕೊಂಡಿದ್ದಾರೆ. ದೇವಸ್ಥಾನದಲ್ಲಿ ಅರ್ಚಕರು ನೀಡಿದ ಶ್ರೀವಾರಿ ಚಿತ್ರವಿರುವ ರೇಷ್ಮೆ ಶಾಲುಗಳನ್ನು ಧರಿಸಿ ದೇಗುಲ ಪ್ರದಕ್ಷಿಣೆ ಹಾಕಿದ್ದಾರೆ.
ಸದ್ಯ ದೀಪಿಕಾ ಹಾಗೂ ಕುಟುಂಬಸ್ಥರು ದೇಗುಲಕ್ಕೆ ಆಗಮಿಸುವ ಹಿನ್ನೆಲೆಯಲ್ಲಿ ದೇಗುಲದ ಸುತ್ತ ಹೆಚ್ಚಿನ ಭದ್ರತೆ ಒದಗಿಸಲಾಗಿತ್ತು. ಯಾವುದೇ ಅಡಚಣೆ ಉಂಟಾಗದಂತೆ ದೀಪಿಕಾ ಹಾಗೂ ಅವರ ಕುಟುಂಬಸ್ಥರು ತಿಮ್ಮಪ್ಪನ ದರ್ಶನ ಪಡೆದು ವಾಪಾಸ್‌ ಆಗಿದ್ದಾರೆ. ಇನ್ನು ದೀಪಿಕಾ ನೋಡಲು ದೇವಸ್ಥಾನದ ಬಳಿ ನೂರಾರು ಅಭಿಮಾನಿಗಳು ಆಗಮಿಸಿದ್ದರು. ದೀಪಿಕಾ ದೇಗುಲಕ್ಕೆ ಆಗಮಿಸಿರುವ ವಿಡಿಯೋ ಹಾಗೂ ಪೊಟೋಗಳು ಆನ್‌ಲೈನ್‌ನಲ್ಲಿ ಸಖತ್‌ ವೈರಲ್‌ ಆಗುತ್ತಿದೆ.
ಇದನ್ನು ಓದಿ| ಮೊದಲ ಬಾರಿಗೆ ಮುಟ್ಟಿನ ಬಗ್ಗೆ ತಿಳಿದುಕೊಂಡ ಕ್ಷಣ ವಿವರಿಸಿದ ದೀಪಿಕಾ ಪಡುಕೋಣೆ
ಇತ್ತೀಚೆಗಷ್ಟೇ ಫ್ರಾನ್ಸ್‌ನಲ್ಲಿ ನಡೆದ ಕಾನ್‌ ಚಿತ್ರೋತ್ಸವದಲ್ಲಿ ಜ್ಯೂರಿ ಸದಸ್ಯೆಯಾಗಿ ಭಾಗಿಯಾಗಿದ್ದ ನಟಿ ದೀಪಿಕಾ ಪಡುಕೋಣೆ ಜಾಗತಿಕ ತಾರೆಯಾಗಿ ಗುರುತಿಸಿಕೊಂಡಿದ್ದರು. ಇಷ್ಟೇ ಅಲ್ಲದೆ ಕಾನ್‌ ಫೆಸ್ಟಿವಲ್‌ನಲ್ಲಿ ವಿಭಿನ್ನ ಶೈಲಿಯ ಉಡುಪುಗಳ ಮೂಲಕ ಸಾಮಾಜಿಕ ಜಾಲತಾಣದಲ್ಲಿ ಭಾರೀ ಸೆನ್ಸೆಷನ್‌ ಕ್ರಿಯೇಟ್‌ ಮಾಡಿದ್ದರು. ಅಲ್ಲದೆ ಕಾನ್‌ ಚಿತ್ರೋತ್ಸವದ ಅಂತಿಮ ದಿನದಲ್ಲೂ ಬಿಳಿ ಸೀರೆ ಹಾಗೂ ಅದ್ದೂರಿ ನೆಕ್ಲೇಸ್‌ ಧರಿಸಿ ಎಲ್ಲರ ಗಮನ ಸೆಳೆದಿದ್ದರು.
ಸದ್ಯಕ್ಕೆ ಸಿದ್ದಾರ್ಥ್‌ ಆನಂದ್‌ ನಿರ್ದೇಶನದ ಶಾರುಖ್‌ ಖಾನ್‌ ಅಭಿನಯದ ಪಠಾನ್‌ ಚಿತ್ರದಲ್ಲಿ ದೀಪಿಕಾ ಅಭಿನಯಿಸುತ್ತಿದ್ದಾರೆ. ಈಗಾಗಲೇ ಚಿತ್ರದ ಅರ್ಧಭಾಗ ಸ್ಪೇನ್‌ನಲ್ಲಿ ಚಿತ್ರಿಕರಿಸಲಾಗಿದ್ದು, ಸಿನಿಮಾದ ಕೆಲ ದೃಶ್ಯಗಳು ಆನ್‌ಲೈನ್‌ನಲ್ಲಿ ವೈರಲ್‌ ಆಗಿದ್ದವು. ಬಳಿಕ ಫೈಟರ್‌ ಸಿನಿಮಾದಲ್ಲಿ ಇದೇ ಮೊದಲ ಬಾರಿಗೆ ಹೃತಿಕ್‌ ರೋಷನ್‌ ಜೊತೆ ದೀಪಿಕಾ ನಟಿಸುತ್ತಿದ್ದು, ಈ ಸಿನಿಮಾ ಮುಂದಿನ ವರ್ಷ ಸೆಪ್ಟೆಂಬರ್‌ನಲ್ಲಿ ಬಿಡುಗಡೆಯಾಗಲು ಸಜ್ಜಾಗಿದೆ.