ಮುಂಬೈ: ಬಾಲಿವುಡ್‌ನ ಜೋಡಿ ರಿಚಾ ಚಡ್ಡಾ (Richa Chadha) ಮತ್ತು ಅಲಿ ಫಜಲ್ (Ali Fazal) ದಂಪತಿ ಮೊದಲ ಮಗುವಿನ ನಿರೀಕ್ಷೆಯಲ್ಲಿದೆ. ಗರ್ಭಣಿಯಾದ ಬಳಿಕ ನಟಿ ರಿಚಾ ಚಡ್ಡಾ ಮೊದಲ ಬಾರಿ ಅಲಿ ಫಜಲ್ ಜತೆ ಸಾವರ್ಜನಿಕವಾಗಿ ಕಾಣಿಸಿಕೊಂಡಿದ್ದಾರೆ. ಮುಂಬೈಯ ರೆಸ್ಟೋರೆಂಟ್‌ ಒಂದರಲ್ಲಿ ಈ ಜೋಡಿ ಸೋಮವಾರ (ಫೆಬ್ರವರಿ 26) ಕ್ಯಾಮೆರಾ ಕಣ್ಣಿಗೆ ಬಿದ್ದಿದೆ.
ಹಸಿರು ಬಣ್ಣದ ಉಡುಪಿನಲ್ಲಿ ರಿಚಾ ಕಂಡು ಬಂದರೆ ಅಲಿ ಕೆಂಪು ಮತ್ತು ಬಿಳಿ ಜಾಕೆಟ್ ಮತ್ತು ನೀಲಿ ಜೀನ್ಸ್‌ ಧರಿಸಿದ್ದರು. ರಿಚಾ ರೆಸ್ಟೋರೆಂಟ್‌ನಿಂದ ಹೊರಬರುತ್ತಿದ್ದಂತೆ ಅಲಿ ಕೈ ಹಿಡಿದು ತನ್ನ ಪತ್ನಿಯನ್ನು ಜಾಗರೂಕತೆಯಿಂದ ಕರೆ ತಂದರು. ಅವರು ಅಲ್ಲಿಂದ ತೆರಳುವು ಮುನ್ನ ಜತೆಗಾಗಿ ಕ್ಯಾಮೆರಾಕ್ಕೆ ಫೋಸ್‌ ನೀಡಿದರು.
ಇನ್‌ಸ್ಟಾಗ್ರಾಮ್‌ ಮೂಲಕ ಮಾಹಿತಿ ಹಂಚಿಕೊಂಡಿದ್ದ ರಿಚಾ
ಇತ್ತೀಚೆಗೆ ರಿಚಾ ಮತ್ತು ಅಲಿ ದಂಪತಿ ತಾವು ಮೊದಲ ಮಗುವಿನ ನಿರೀಕ್ಷೆಯಲ್ಲಿರುವುದಾಗಿ ಇನ್‌ಸ್ಟಾಗ್ರಾಮ್‌ ಮೂಲಕ ತಿಳಿಸಿತ್ತು. ‘1+1=3’ ಎಂಬ ಪೋಸ್ಟ್‌ ಶೇರ್‌ ಮಾಡಿಕೊಂಡು ಇಬ್ಬರೂ ಜತೆಯಾಗಿ ಇರುವ ಫೊಟೊವನ್ನು ಹಂಚಿಕೊಂಡಿದ್ದರು. ಆ ಮೂಲಕ ರಿಚಾ ತಾವು ಗರ್ಭ ಧರಿಸಿರುವ ವಿಚಾರವನ್ನು ತಿಳಿಸಿದ್ದರು. “ಸಣ್ಣ ಹೃದಯದ ಬಡಿತವು ನಮ್ಮ ವಿಶ್ವದ ಅತ್ಯಂತ ದೊಡ್ಡ ಶಬ್ದವಾಗಿದೆ” ಎಂದು ಬರೆದುಕೊಂಡಿದ್ದರು. ಇದಕ್ಕೆ ಸ್ನೇಹಿತರು, ಅನೇಕ ಕಲಾವಿದರು ಮತ್ತು ಅಭಿಮಾನಿಗಳು ಶುಭಾಶಯಗಳನ್ನು ತಿಳಿಸಿದ್ದರು.
ರಿಚಾ ಚಡ್ಡಾ ಮತ್ತು ಅಲಿ ಫಜಲ್ 2022ರ ಅಕ್ಟೋಬರ್‌ನಲ್ಲಿ ವಿವಾಹವಾಗಿದ್ದರು. ಇವರು ವಿವಾಹವು ಲಕ್ನೋ, ದೆಹಲಿ ಮತ್ತು ಮುಂಬೈನ ಸಂಸ್ಕೃತಿಗಳಿಂದ ಸ್ಫೂರ್ತಿ ಪಡೆದು ಅದ್ಧೂರಿಯಾಗಿ ನೆರವೇರಿತ್ತು. 110 ವರ್ಷ ಇತಿಹಾಸವಿರುವ ಅತ್ಯಂತ ಹಳೆಯ ಕಟ್ಟಡದಲ್ಲಿ ಇವರು ವೈವಾಹಿಕ ಜೀವನಕ್ಕೆ ಅಡಿ ಇಟ್ಟಿದ್ದರು. ಮದುವೆಯನ್ನು ಸಾಕ್ಷ್ಯ ಚಿತ್ರವಾಗಿ ಪರಿವರ್ತಿಸಲಾಗಿದ್ದು, ರಾಹುಲ್ ಸಿಂಗ್ ದತ್ತಾ ನಿರ್ದೇಶಿಸಿದ್ದಾರೆ.
ಅಲಿ ಫಜಲ್ ಮತ್ತು ರಿಚಾ ಚಡ್ಡಾ ಮೊದಲ ಬಾರಿಗೆ ಭೇಟಿಯಾಗಿದ್ದು ‘ಫಕ್ರೇ’ ಬಾಲಿವುಡ್ ಸಿನಿಮಾದ ಚಿತ್ರೀಕರಣದ ವೇಳೆ. ಬಳಿಕ ಇಬ್ಬರ ಮಧ್ಯೆ ಪ್ರೀತಿ ಚಿಗುರೊಡೆದಿತ್ತು. ಮ್ರಿಂಗ್‌ದೀಪ್‌ ಸಿಂಗ್ ಲಂಬಾ ನಿರ್ದೇಶನದ ಈ ಚಿತ್ರ 2013ರಲ್ಲಿ ತೆರೆ ಕಂಡಿತ್ತು. ಪುಲ್ಕಿತ್‌ ಸಾಮ್ರಾಟ್‌, ಮನ್ಜೋತ್‌ ಸಿಂಗ್, ಅಲಿ ಫಜಲ್, ಪ್ರಿಯಾ ಆನಂದ್‌, ರಿಚಾ ಚಡ್ಡಾ ಮತ್ತಿತರರು ಈ ಸಿನಿಮಾದಲ್ಲಿ ಅಭಿನಯಿಸಿದ್ದರು. ಅಂದಹಾಗೆ ನಟಿ ರಿಚಾ ಚಡ್ಡಾಗೆ ಕನ್ನಡ ಸಿನಿರಂಗದ ಜತೆ ನಂಟು ಕೂಡ ಇದ್ದು, ಇಂದ್ರಜಿತ್ ಲಂಕೇಶ್ ನಿರ್ದೇಶನದ ‘ಶಕೀಲಾ’ ಹಿಂದಿ ಚಿತ್ರದಲ್ಲಿ ನಟಿಸಿದ್ದರು. ಸದ್ಯ ಅವರು ಸಂಜಯ್‌ ಲೀಲಾ ಬನ್ಸಾಲಿ ಅವರ ಬಹು ನಿರೀಕ್ಷಿತ ವೆಬ್‌ ಸರಣಿ ʼಹೀರಾಮಂಡಿʼಯಲ್ಲಿ ಅಭಿನಯಿಸುತ್ತಿದ್ದಾರೆ.
ಇದನ್ನೂ ಓದಿ: ಪಾಕ್ ಆಕ್ರಮಿತ ಕಾಶ್ಮೀರ ವಶಕ್ಕೆ ಸಿದ್ಧ ಎಂದಿದ್ದ ಸೇನಾ ಜನರಲ್ರನ್ನು ಅಪಹಾಸ್ಯ ಮಾಡಿದ ಬಾಲಿವುಡ್ ನಟಿ ರಿಚಾ ಚಡ್ಡಾ
ಹಿಂದಿ ಜತೆ ಹಾಲಿವುಡ್‌ ಚಿತ್ರಗಳಲ್ಲಿಯೂ ಸಕ್ರಿಯರಾಗಿರುವ ಅಲಿ ಫಜಲ್ ಅಭಿನಯದ ಮೂರು ಚಿತ್ರಗಳು ಕಳೆದ ವರ್ಷ ತೆರೆ ಕಂಡಿದ್ದವು. ಆ ಪೈಕಿ ಹಾಲಿವುಡ್‌ನ ʼಕಂದಹಾರ್‌ʼ ಮತ್ತು ಬಾಲಿವುಡ್‌ನ ʼಖುಫಿಯಾʼ ಸಿನಿಮಾಗಳು ಅವರಿಗೆ ಉತ್ತಮ ಹೆಸರು ತಂದುಕೊಟ್ಟಿದ್ದವು. ಸದ್ಯ ಅವರು ಯಾವುದೇ ಚಿತ್ರ ಘೋಷಿಸಿಲ್ಲ.
ಈ ಸಂಗತಿಯ ಕುರಿತು ನಿಮ್ಮ ಅನಿಸಿಕೆ ಏನು? ಕಾಮೆಂಟ್ ಮೂಲಕ ತಿಳಿಸಿ