ಬೆಂಗಳೂರು: ತಮಿಳಿನ ಚಂದ್ರಮುಖಿ ಸಿನಿಮಾದ ಎರಡನೇ ಭಾಗವಾದ ಚಂದ್ರಮುಖಿ 2 (Chandramukhi 2) ಸಿನಿಮಾ ಬಿಡುಗಡೆಗೆ ಸಿದ್ಧತೆ ಮಾಡಿಕೊಳ್ಳುತ್ತಿದೆ. ರಾಘವ್‌ ಲಾರೆನ್ಸ್‌ ಮತ್ತು ನಟಿ ಕಂಗನಾ ರಣಾವತ್ ಅವರು ಪ್ರಮುಖ ಪಾತ್ರಗಳಲ್ಲಿ ನಟಿಸಿರುವ ಈ ಸಿನಿಮಾದ ಮೊದಲ ಹಾಡು ಬಿಡುಗಡೆಗೊಂಡಿದೆ. ‘ಸ್ವಾಗತಾಂಜಲಿʼ (Swagatanjali) ಹಾಡಿಗೆ ಕಂಗನಾ ಸ್ಟೆಪ್ ಹಾಕಿದ್ದಾರೆ. ಕಂಗನಾ ಅವರ ಲುಕ್ ಚಿತ್ರತಂಡ ಆಗಸ್ಟ್‌ 5ರಂದು ಬಿಡುಗಡೆ ಮಾಡಿತ್ತು. ಚಂದ್ರಮುಖಿ ಮೊದಲ ಭಾಗದಲ್ಲಿ ಜ್ಯೋತಿಕಾ ಅಭಿನಯಿಸಿದ್ದು, ಇದೇ ಪಾತ್ರವನ್ನೆ ಇದೀಗ ಕಂಗನಾ ರಣಾವತ್ ನಿರ್ವಹಿಸಿದ್ದಾರೆ.
ಚಂದ್ರಮುಖಿಯಾಗಿ ನಟಿ ಅಭಿಮಾನಿಗಳ ಮುಂದೆ ಬರುವುದಕ್ಕೆ ಕೌಂಟ್ ಡೌನ್ ಶುರುವಾಗಿದ್ದು, ಫಸ್ಟ್ ಲುಕ್ ಮತ್ತಷ್ಟು ನಿರೀಕ್ಷೆಯನ್ನು ಹೆಚ್ಚಿಸಿದೆ. ಹಾಡಿನಲ್ಲಿ ಕಂಗನಾ ರಣಾವತ್ ಅವರ ಲುಕ್ ಅಭಿಮಾನಿಗಳು ಇಷ್ಟಪಟ್ಟಿದ್ದಾರೆ. ಅಭಿಮಾನಿಯೊಬ್ಬರು ʻʻಕಂಗನಾ ಅವರ ನೃತ್ಯ ತುಂಬ ಅದ್ಭುತವಾಗಿದೆ. ಇಡೀ ತಂಡದ ಶ್ರಮ ಇದರಲ್ಲಿ ಸ್ಪಷ್ಟವಾಗಿದೆ. ಚಿತ್ರದ ಬಿಡುಗಡೆಗಾಗಿ ಕಾಯುತ್ತಿದ್ದೇನೆʼʼಎಂದು ಬರೆದುಕೊಂಡಿದ್ದಾರೆ. “ಸ್ವಾಗತಾಂಜಲಿ” ಹಾಡಿಗೆ ಎಂಎಂ ಕೀರವಾಣಿ ಸಂಗೀತ ಸಂಯೋಜಿಸಿದ್ದಾರೆ ಮತ್ತು ಶ್ರೀನಿಧಿ ತಿರುಮಲ ಹಾಡಿದ್ದಾರೆ.
ಇದನ್ನೂ ಓದಿ: Chandramukhi 2: ‘ಚಂದ್ರಮುಖಿ 2’ ಸಿನಿಮಾದ ಕಂಗನಾ ರಣಾವತ್ ಫಸ್ಟ್ ಲುಕ್ ರಿಲೀಸ್
ಐದು ಭಾಷೆಗಳಲ್ಲಿ ತೆರೆಗೆ
ಸಿನಿಮಾದ ಬಹುತೇಕ ಶೂಟಿಂಗ್ ಮುಗಿದಿದ್ದು, ಚಿತ್ರದ ಪ್ರಚಾರವೂ ಶುರು ಆಗಿದೆ. ಕನ್ನಡ, ತಮಿಳು ,ತೆಲುಗು, ಹಿಂದಿ, ಮಲಯಾಳಂ ಭಾಷೆಯಲ್ಲಿ ಈ ಸಿನಿಮಾ ತೆರೆ ಕಾಣಲಿದೆ. ರಾಘವ್‌ ಅವರು ಸಿನಿಮಾದಲ್ಲಿ ರಾಜ ವೆಟ್ಟೈಯಾನ್‌ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ.
ಇದನ್ನೂ ಓದಿ: Chandramukhi 2 : ಚಂದ್ರಮುಖಿ 2 ಫಸ್ಟ್ ಲುಕ್ ರಿಲೀಸ್! ರಜನಿಕಾಂತ್‌ ನಟಿಸಬೇಕಿದ್ದ ಪಾತ್ರದಲ್ಲಿ ರಾಘವ್‌ ಲಾರೆನ್ಸ್‌!
ಪಿ ವಾಸು ಅವರು ನಿರ್ದೇಶನ ಮಾಡಿರುವ ಚಂದ್ರಮುಖಿ 2 ಸಿನಿಮಾ ಐದು ಭಾಷೆಗಳಲ್ಲಿ ಈ ಗಣೇಶ ಚತುರ್ಥಿ ಹಬ್ಬಕ್ಕೆ ಬಿಡುಗಡೆಯಾಗುತ್ತದೆ. ಚಂದ್ರಮುಖಿ ಸಿನಿಮಾದಲ್ಲಿ ರಜನಿಕಾಂತ್‌ ಮತ್ತು ನಟಿ ಜ್ಯೋತಿಕಾ ಅವರು ನಟಿಸಿದ್ದರು. ಕನ್ನಡದ ಆಪ್ತಮಿತ್ರ ಸಿನಿಮಾವನ್ನೇ ಚಂದ್ರಮುಖಿ ಸಿನಿಮಾವನ್ನಾಗಿ ರಿಮೇಕ್‌ ಮಾಡಲಾಗಿತ್ತು. ಇದೀಗ ಚಂದ್ರಮುಖಿ 2 ಸಿನಿಮಾದಲ್ಲಿ ರಜನಿಕಾಂತ್‌ ಅವರ ವೆಟ್ಟೈಯಾನ್‌ ಪಾತ್ರವನ್ನು ರಾಘವ್‌ ಅವರು ನಿಭಾಯಿಸಿದ್ದಾರೆ.