ಬೆಂಗಳೂರು: ರಾಜ್ ಬಿ ಶೆಟ್ಟಿ (Raj B Shetty) ನಟನೆಯ ‘ಟೋಬಿ‘ (Toby) ಸಿನಿಮಾದ ಟ್ರೈಲರ್ ಆಗಸ್ಟ್‌ 4ರಂದು ಬಿಡುಗಡೆಯಾಗಿದೆ. ಟ್ರೈಲರ್ ಲಾಂಚ್‌ ಇವೆಂಟ್‌ನಲ್ಲಿ ರಕ್ಷಿತ್‌ ಶೆಟ್ಟಿ ಹಾಗೂ ರಿಷಬ್‌ ಶೆಟ್ಟಿ ಭಾಗಿಯಾಗಿದ್ದರು. ಟ್ರೈಲರ್ ಬಿಡುಗಡೆ ಕಾರ್ಯಕ್ರಮದಲ್ಲಿ ಮಾತನಾಡಿದ ‘ಟೋಬಿ’ ಕತೆ ರಚಿಸಿರುವ ಟಿ.ಕೆ ದಯಾನಂದ, ಈ ಕತೆಯ ಕಾಡುವ ಗುಣದ ಬಗ್ಗೆ ಮಾತನಾಡಿದ್ದಾರೆ. ಅಷ್ಟೇ ಅಲ್ಲದೇ ತಮನ್ನಾ ಟೋಬಿ ಕಥೆಯನ್ನು ಎಷ್ಟು ಇಷ್ಟ ಪಟ್ಟಿದ್ದರು ಎಂಬುದನ್ನು ವೇದಿಕೆಯಲ್ಲಿ ರಿವೀಲ್‌ ಮಾಡಿದರು.
ಸುಮಾರು 3 ಲಕ್ಷದ 73 ಸಾವಿರ ಕತೆಗಳ ನಡುವೆ ಟೋಬಿ ಕತೆ ಗೆದ್ದಿತ್ತು
ಈ ಬಗ್ಗೆ ದಯಾನಂದ್ ಮಾತನಾಡಿ ”ಟೋಬಿ ಎನ್ನುವ ವ್ಯಕ್ತಿ ಇದ್ದ. ಅವನನ್ನು ಹತ್ತಿರದಿಂದ ನೋಡಿ, ಅವನ ಸುತ್ತ ಇದ್ದ ವ್ಯಕ್ತಿಗಳಿಂದ ಅವನು ಬದುಕಿದ ರೀತಿ ಕೇಳಿದ್ದ ನಾನು ಎಮೋಷನಲ್ ಆಗಿ ಪಾತ್ರಕ್ಕೆ ಹತ್ತಿರವಾಗಿದ್ದೆ. ಸಿಗ್ನೇಚರ್ ಮಾಸ್ಟರ್ ಕ್ಲಾಸ್ ಹೆಸರಿನ ಬಾಲಿವುಡ್ನ ಕತಾ ಸ್ಪರ್ಧೆಯ ನಾಲ್ಕನೇ ಆವೃತ್ತಿ ಆಯೋಜನೆಗೊಂಡಿತ್ತು. ಆ ಸ್ಪರ್ಧೆಗೆ ಕಳಿಸಲೆಂದು ಟೋಬಿಯ ಜೀವನದ ಕತೆ ಬರೆದು ಕಳಿಸಿ ಸುಮ್ಮನಾಗಿದ್ದೆ. ಆದರೆ ಅಲ್ಲಿಂದ ಕರೆ ಬಂದು, ನಿಮ್ಮ ಕತೆ ಶಾರ್ಟ್ ಲಿಸ್ಟ್ ಆಗಿದೆ ಮುಂಬೈಗೆ ಬನ್ನಿ ಎಂದು ಕರೆದರು” ಎಂದು ಕೆಲವು ವರ್ಷಗಳ ಹಿಂದಿನ ಕತೆಯನ್ನು ನೆನಪು ಮಾಡಿಕೊಂಡರು.
”ಅಲ್ಲಿ ಹೋದಾಗ ಟೋಬಿ ಕತೆಯೊಟ್ಟಿಗೆ ಇನ್ನೂ ನಾಲ್ವರು ಕತೆಗಾರರು ಇದ್ದರು. ಆ ಸ್ಪರ್ಧೆಗೆ ತೀರ್ಪುಗಾರರಾಗಿದ್ದಿದ್ದು ಬಾಲಿವುಡ್ ನಟರಾದ ಆಯುಷ್ಮಾನ್ ಖುರಾನಾ, ಬೆಂಗಳೂರಿನವರೇ ಆದ ಬಾಲಿವುಡ್ ನಟಿ ಕುಬ್ರಾ ಸೇಠ್, ರಾಜ್ಕುಮಾರ್ ರಾವ್ ಮತ್ತು ನಟಿ ತಮನ್ನಾ. ಮುಂಬೈನಲ್ಲಿ ತರಬೇತಿ ಮುಗಿದ ಬಳಿಕ ಮತ್ತೆ ಹೈದರಾಬಾದ್ಗೆ ಕರೆದರು. ಅಲ್ಲಿ ಹೋದಾಗ ಅಲ್ಲಿ ಟೋಬಿ ಕತೆಗೆ ಪ್ರಶಸ್ತಿ ಬಂತು. ಸುಮಾರು 3.70 ಲಕ್ಷ ಕತೆಗಳ ನಡುವೆ ಟೋಬಿ ಕತೆ ಗೆದ್ದಿತ್ತು” ಎಂದರು ದಯಾನಂದ.
ಇದನ್ನೂ ಓದಿ: Raj B Shetty: ‘ಟೋಬಿ’ ಚಿತ್ರದ ಟ್ರೈಲರ್ ಔಟ್‌; ಮಾಸ್‌ ಅವತಾರದಲ್ಲಿ ರಾಜ್ ಬಿ ಶೆಟ್ಟಿ
ತಮನ್ನಾರಿಂದ ಭೇಷ್‌ ಎನಿಸಿಕೊಂಡ ದಯಾನಂದ್
ಅದೇ ದಿನ ತಮನ್ನಾ ದಯಾನಂದ್ ಅವರೊಂದಿಗೆ ಕತೆಯ ಬಗ್ಗೆ ಮಾತನಾಡಿ, ʻʻಈ ಕತೆಯನ್ನು ನೀವು ಏಕೆ ಬರೆದಿದ್ದೀರಿ, ಹೇಗೆ ಬರೆದಿದ್ದೀರಿ ಗೊತ್ತಿಲ್ಲ ಆದರೆ, ಆದರೆ ‘ಟೋಬಿ’ ಕತೆ ನನ್ನನ್ನು ಬಹಳ ಕಾಡಿಬಿಟ್ಟಿತು’ ಎಂದರು. ಟೋಬಿಗೆ ಇದ್ದ ಮೂಲ ಗುಣವೇ ಅದು. ಅವನು ಎಲ್ಲರನ್ನೂ ಕಾಡಿಬಿಡುತ್ತಾನೆ. ಅವನ ಬದುಕಿದ ರೀತಿಯೇ ಹಾಗಿತ್ತು” ಎಂದು ನೆನಪು ಮಾಡಿಕೊಂಡರು ದಯಾನಂದ.
ಇದನ್ನೂ ಓದಿ; Raj B Shetty: ಮೂಗು ಚುಚ್ಚುವಾಗ ನೋವು ಬರದಂತೆ ಇಂಜೆಕ್ಷನ್‌ ನೀಡಲಾಗಿತ್ತು; ರಾಜ್ ಬಿ ಶೆಟ್ಟಿ ಮೂಗುತಿ ಕಥೆ!
ಟಿ.ಕೆ ದಯಾನಂದ್, ನಿಜ ವ್ಯಕ್ತಿಯ ಜೀವನ ಆಧರಿಸಿ ‘ಟೋಬಿ’ ಕತೆ ರಚಿಸಿದ್ದಾರೆ. ಟೋಬಿ ಸಿನಿಮಾದ ಕತೆ ದಯಾನಂದ್ ಅವರದ್ದಾದರೂ ಚಿತ್ರಕತೆಯನ್ನು ರಾಜ್ ಬಿ ಶೆಟ್ಟಿ ಬರೆದಿದ್ದಾರೆ. ಸಿನಿಮಾವನ್ನು ಬಾಸಿಲ್ ನಿರ್ದೇಶನ ಮಾಡಿದ್ದಾರೆ. ಸಿನಿಮಾದಲ್ಲಿ ರಾಜ್ ಬಿ ಶೆಟ್ಟಿ ಜತೆಗೆ ಚೈತ್ರಾ ಆಚಾರ್, ಸಂಯುಕ್ತಾ ಹೆಗಡೆ, ಗೋಪಾಲ್ ದೇಶಪಾಂಡೆ, ರಾಜ್ ದೀಪಕ್ ಶೆಟ್ಟಿ ಇನ್ನಿತರರು ನಟಿಸಿದ್ದಾರೆ.