ಮುಂಬೈ: ಡಾನ್ ಮತ್ತು ಡಾನ್ 2 ಸಿನಿಮಾಗಳನ್ನು ಇಂದಿಗೂ ಜನರು ಮರೆತಿಲ್ಲ. ಶಾರುಖ್‌ ಖಾನ್‌ ಅವರು ಮಾಸ್‌ ಲುಕ್‌ನಲ್ಲಿ ಡಾನ್ ರೂಪದಲ್ಲಿ ಕಾಣಿಸಿಕೊಂಡಿದ್ದ ಸಿನಿಮಾಗಳು ಸಾಕಷ್ಟು ಯಶಸ್ಸು ಕಂಡಿದ್ದವು. ಆದರೆ ಇದೀಗ ಬಾಲಿವುಡ್‌ಗೆ ಶಾರುಖ್‌ ಖಾನ್‌ ಬದಲಾಗಿ ಹೊಸ ಡಾನ್ ಎಂಟ್ರಿ ಕೊಡುತ್ತಿದ್ದಾರೆ. ಫರ್ಹಾನ್‌ ಅಖ್ತರ್‌ ಅವರ ನಿರ್ದೇಶನದ ಡಾನ್ 3 ಸಿನಿಮಾದ (Don 3 Movie) ಟೀಸರ್‌ ಬಿಡುಗಡೆ ಮಾಡಲಾಗಿದ್ದು, ಅದರಲ್ಲಿ ರಣವೀರ್‌ ಸಿಂಗ್‌ ಅವರನ್ನು ಡಾನ್ ಆಗಿ ಪರಿಚಯಿಸಲಾಗಿದೆ.
ಹೌದು. ಡಾನ್ 3 ಸಿನಿಮಾ ಬಗ್ಗೆ ಈ ಹಿಂದೆಯೇ ಘೋಷಣೆಯಾಗಿದ್ದು, ಅದರಲ್ಲಿ ಶಾರುಖ್‌ ಇರುವುದಿಲ್ಲ ಎನ್ನುವುದೂ ಸುದ್ದಿಯಾಗಿತ್ತು. ಫರ್ಹಾನ್‌ ಅವರು ಡಾನ್ ಆಗಿ ನಟಿಸಲು ಹೊಸ ನಟನ ಹುಡುಕಾಟದಲ್ಲಿದ್ದಾರೆ ಎಂದೂ ವರದಿಯಾಗಿತ್ತು. ಅದರಂತೆ ಇದೀಗ ಫರ್ಹಾನ್‌ ಅವರು ಬಾಲಿವುಡ್‌ನ ಪ್ರಸಿದ್ಧ ನಟ ರಣವೀರ್‌ ಅವರನ್ನು ಡಾನ್ ಆಗಿ ಪರಿಚಯಿಸಿದ್ದಾರೆ. 2025ಕ್ಕೆ ಡಾನ್ 3 ಸಿನಿಮಾ ಮೂಲಕ ಅಬ್ಬರಿಸುವುದಾಗಿಯೂ ಘೋಷಿಸಿದ್ದಾರೆ.
ಇದನ್ನೂ ಓದಿ: Viral Video: ಟ್ರಾಫಿಕ್‌ ಸಿಗ್ನಲ್‌ ವೇಳೆ ಬ್ಯಾಗ್‌ಗೆ ಕೈಹಾಕಿ ತಿಂಡಿ ತಿಂದ ಡೆಲಿವರಿ ಬಾಯ್; ಆರ್ಡರ್‌ ಮಾಡಿದವನ ಬಗ್ಗೆ ಮರುಕ
ಫರ್ಹಾನ್‌ ಅವರು ಡಾನ್ 3 ಸಿನಿಮಾದ ಮೊದಲ ಟೀಸರ್‌ ಅನ್ನು ಟ್ವಿಟರ್‌ನಲ್ಲಿ ಹಂಚಿಕೊಂಡಿದ್ದಾರೆ. ಅದರಲ್ಲಿ ಮೊದಲಿಗೆ ರಣವೀರ್‌ ಅವರು ಕ್ಯಾಮೆರಾಗೆ ಬೆನ್ನು ಹಾಕಿ ಕುಳಿತುಕೊಂಡಿರುವುದನ್ನು ಕಾಣಬಹುದು. ಲೆದರ್‌ ಜಾಕೆಟ್‌ ತೊಟ್ಟು ಮಾಸ್‌ ಲುಕ್‌ನಲ್ಲಿ ಕಾಣಿಸಿಕೊಂಡಿರುವ ರಣವೀರ್‌ ತನ್ನನ್ನು ತಾನು ಡಾನ್ ಎಂದು ಟೀಸರ್‌ನಲ್ಲಿ ಪರಿಚಯಿಸಿಕೊಂಡಿದ್ದಾರೆ.
A New Era Begins #Don3 @RanveerOfficial #JasonWest @javedakhtarjadu @ritesh_sid @ShankarEhsanLoy @PushkarGayatri @j10kassim @roo_cha @vishalrr @excelmovies @rupinsuchak @chouhanmanoj82 pic.twitter.com/i1hHrl6fuo
— Farhan Akhtar (@FarOutAkhtar) August 9, 2023
ಟೀಸರ್‌ಗೂ ಮೊದಲು ಫರ್ಹಾನ್‌ ಅವರು ಇನ್‌ಸ್ಟಾಗ್ರಾಂನಲ್ಲಿ ಡಾನ್ 3 ಸಿನಿಮಾ ಬಗ್ಗೆ ಒಂದಿಷ್ಟು ಮಾಹಿತಿ ಹಂಚಿಕೊಂಡಿದ್ದರು. “1978ರಲ್ಲಿ ಅಮಿತಾಭ್‌ ಬಚ್ಚನ್‌ ಅವರು ನಾಯಕನಾಗಿ ನಟಿಸುವುದರೊಂದಿಗೆ ದೇಶವು ಮೊದಲನೇ ಬಾರಿಗೆ ಡಾನ್‌ನ ಕೋಪಕ್ಕೆ ಸಾಕ್ಷಿಯಾಗಿತ್ತು. ಮೊದಲ ಚಿತ್ರವು ತನ್ನ ಆಕರ್ಷಣೆಯನ್ನು ಮುಂದುವರಿಸುತ್ತಿರುವಾಗ ಎಕ್ಸೆಲ್ ಎಂಟರ್‌ಟೈನ್‌ಮೆಂಟ್ ಫರ್ಹಾನ್‌ ಅಖ್ತರ್‌ ನಿರ್ದೇಶನದ ಹೊಸ ಡಾನ್ ಅನ್ನು ಘೋಷಿಸಲು ಸಂತೋಷದಿಂದಿದೆ. 2006 ಮತ್ತು 2011ರಲ್ಲಿ ಶಾರುಖ್‌ ಜತೆಗಿನ ಎರಡು ಡಾನ್ ಚಿತ್ರಗಳ ನಂತರ, ಡಾನ್ 3ನಲ್ಲಿ ಮತ್ತೊಮ್ಮೆ ಕಥೆಯ ಗಡಿಯನ್ನು ಮರು ವ್ಯಾಖ್ಯಾನಿಸಲು ನಿರ್ದೇಶಕರು ಸಿದ್ಧರಾಗಿದ್ದಾರೆ. ಡಾನ್ ಪರಂಪರೆಯನ್ನು ಮುಂದಕ್ಕೆ ಕೊಂಡೊಯ್ಯುವ ಸಮಯ ಈಗ ಬಂದಿದೆ. ಈಗ ನಮ್ಮೊಂದಿಗೆ ಹೊಸ ಮತ್ತು ಬಹುಮುಖ ಪ್ರತಿಭೆ ಸೇರಿಕೊಳ್ಳುತ್ತಿದ್ದಾನೆ. ಬಚ್ಚನ್‌ ಮತ್ತು ಶಾರುಖ್‌ಗೆ ನೀವು ತೋರಿದ ಪ್ರೀತಿಯನ್ನು ಈಗ ಇವನಿಗೂ ತೋರಿಸುತ್ತೀರಿ ಎಂದು ಭಾವಿಸುತ್ತೇವೆ. ಡಾನ್‌ನ ಹೊಸ ಯುಗ 2025ರಲ್ಲಿ ಪ್ರಾರಂಭವಾಗಲಿದೆ” ಎಂದು ತಿಳಿಸಿದ್ದರು.
ಶಾರುಖ್‌ ಖಾನ್‌, ಪ್ರಿಯಾಂಕಾ ಚೋಪ್ರಾ ಮತ್ತು ಬೊಮನ್‌ ಇರಾನಿ ಅವರು ಡಾನ್ ಸಿನಿಮಾದಲ್ಲಿ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು. 2006ರಲ್ಲಿ ಬಿಡುಗಡೆಯಾದ ಆ ಸಿನಿಮಾ ನ್ಯೂಚಾಟೆಲ್ ಇಂಟರ್ನ್ಯಾಷನಲ್ ಫೆಂಟಾಸ್ಟಿಕ್ ಫಿಲ್ಮ್ ಫೆಸ್ಟಿವಲ್‌ನಲ್ಲಿ ಅತ್ಯುತ್ತಮ ಏಷಿಯನ್‌ ಸಿನಿಮಾ ಪ್ರಶಸ್ತಿಯನ್ನು ಗೆದ್ದುಕೊಂಡಿತ್ತು. ಸಿನಿಮಾದ ಎರಡನೇ ಭಾಗವಾಗಿ ಡಾನ್ 2, 2011ರಲ್ಲಿ ಬಿಡುಗಡೆಯಾಯಿತು. ಅದರಲ್ಲಿ ಶಾರುಖ್‌ ಅವರೊಂದಿಗೆ ಹೃತಿಕ್‌ ರೋಷನ್‌ ಅವರೂ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು.