ತಿರುವನಂತಪುರಂ: ಮಲಯಾಳಂ ನಟ ದುಲ್ಕರ್‌ ಸಲ್ಮಾನ್‌ (Dulquer Salmaan) ಅವರನ್ನು ಇದುವರೆಗೆ ಕ್ಲಾಸ್‌ ಲುಕ್‌ನಲ್ಲೇ ಸಿನಿಮಾಗಳಲ್ಲಿ ನೋಡಿದ್ದೇವೆ. ಇದೀಗ ಅವರು ಪಕ್ಕಾ ಮಾಸ್‌ ಲುಕ್‌ನಲ್ಲಿ ತೆರೆ ಮೇಲೆ ಬರಲು ಸಿದ್ಧರಾಗಿದ್ದಾರೆ. ದುಲ್ಕರ್‌ ಗ್ಯಾಂಗ್‌ಸ್ಟರ್‌ ಆಗಿ ನಟಿಸಿರುವ ಕಿಂಗ್ ಆಫ್ ಕೋಥಾ ಸಿನಿಮಾ ತೆರೆ ಮೇಲೆ ಬರುವುದಕ್ಕೆ ಸಿದ್ಧತೆ ನಡೆಸಿಕೊಳ್ಳುತ್ತಿದ್ದು ಸಿನಿಮಾದ ಟೀಸರ್‌ ಅನ್ನು ಬುಧವಾರ ಬಿಡುಗಡೆ ಮಾಡಲಾಗಿದೆ.
ಒಂದು ನಿಮಿಷ 35 ಸೆಕೆಂಡ್‌ ಇರುವ ಟೀಸರ್‌ನಲ್ಲಿ ದುಲ್ಕರ್‌ ಅವರನ್ನು ಒಬ್ಬ ಗ್ಯಾಂಗ್‌ಸ್ಟರ್‌ ರೀತಿಯಲ್ಲಿ ತೋರಿಸಲಾಗಿದೆ. ಶಸ್ತ್ರಾಸ್ತ್ರಗಳನ್ನು ಹಿಡಿದುಕೊಂಡು ಹೊಡೆದಾಡುವ ದುಲ್ಕರ್‌ ಅವರನ್ನು ನಾವು ಸಿನಿಮಾದಲ್ಲಿ ನೋಡಬಹುದು ಎನ್ನುವುದನ್ನು ಟೀಸರ್‌ ತೋರಿಸಿಕೊಟ್ಟಿದೆ. ಹಾಗೆಯೇ ಈ ಸಿನಿಮಾ ಇದೇ ವರ್ಷ ಓಣಂ ಹಬ್ಬದ ಸಮಯದಲ್ಲಿ ಬಿಡುಗಡೆಯಾಗಲಿದೆ ಎಂದು ಟೀಸರ್‌ನಲ್ಲಿ ಹೇಳಲಾಗಿದೆ.
ಇದನ್ನೂ ಓದಿ: Viral News : 20 ವರ್ಷಗಳಿಂದ ಕೆಲಸ ಮಾಡದಿದ್ದರೂ ಸಂಬಳ ಪಡೆಯುತ್ತಿದ್ದ ಶಿಕ್ಷಕಿ!
ಕಿಂಗ್ ಆಫ್ ಕೋಥಾ ಸಿನಿಮಾವನ್ನು ಅಭಿಲಾಷ್‌ ಜೋಶಿ ಅವರು ನಿರ್ದೇಶಿಸಿದ್ದಾರೆ. ಸಿನಿಮಾದಲ್ಲಿ ದುಲ್ಕರ್‌ ಅವರ ಜತೆಗೆ ಶಾಹುಲ್‌ ಹಾಸನ್‌, ಐಶ್ವರ್ಯ ಲಕ್ಷ್ಮಿ, ನೈಲಾ ಉಷಾ ಮತ್ತು ಚೆಂಬನ್ ವಿನೋದ್ ಜೋಸ್, ಗೋಕುಲ್ ಸುರೇಶ್, ಶಮ್ಮಿ ತಿಲಕನ್, ಶಾಂತಿ ಕೃಷ್ಣ ಮತ್ತು ಅನಿಖಾ ಸುರೇಂದ್ರನ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಸಿನಿಮಾ ಬಹುಭಾಷೆಗಳಲ್ಲಿ ತಯಾರಾಗುತ್ತಿದ್ದು, ಟೀಸರ್‌ ಅನ್ನು ಕೂಡ ಎಲ್ಲ ಭಾಷೆಗಳಲ್ಲಿ ಬಿಡುಗಡೆ ಮಾಡಲಾಗಿದೆ.
ಕೆಲ ದಿನಗಳ ಹಿಂದೆ ಕಿಂಗ್ ಆಫ್ ಕೋಥಾ ಸಿನಿಮಾದ ಪಾತ್ರಗಳನ್ನು ಪರಿಚಯಿಸುವಂತಹ ವಿಡಿಯೊವೊಂದನ್ನು ಬಿಡುಗಡೆ ಮಾಡಲಾಗಿತ್ತು. ʼಸರ್ಪಟ್ಟ ಪರಂಬರೈʼ ಚಿತ್ರದಲ್ಲಿ ಡ್ಯಾನ್ಸಿಂಗ್ ರೋಸ್ ಪಾತ್ರದಲ್ಲಿ ಹೆಸರುವಾಸಿಯಾದ ಶಬೀರ್ ಕಲ್ಲರಕ್ಕಲ್ ಅವರು ಕಿಂಗ್ ಆಫ್ ಕೋಥಾದಲ್ಲಿ ಕಣ್ಣನ್ ಪಾತ್ರವನ್ನು ನಿರ್ವಹಿಸಲಿದ್ದಾರೆ ಎಂದು ಅದು ಬಹಿರಂಗಪಡಿಸಿತ್ತು. ಚಿತ್ರದಲ್ಲಿ ತಾರಾ ಪಾತ್ರದಲ್ಲಿ ಐಶ್ವರ್ಯ ಲಕ್ಷ್ಮಿ, ಮಂಜು ಪಾತ್ರದಲ್ಲಿ ನೈಲಾ ಉಷಾ, ರಂಜಿತ್ ಆಗಿ ಚೆಂಬನ್ ವಿನೋದ್, ಟೋನಿಯಾಗಿ ಗೋಕುಲ್ ಸುರೇಶ್ ಮತ್ತು ರವಿಯಾಗಿ ಶಮ್ಮಿ ತಿಲಕನ್ ಕಾಣಿಸಿಕೊಳ್ಳಲಿದ್ದಾರೆ. ಶಾಂತಿ ಕೃಷ್ಣ, ವಡ ಚೆನ್ನೈ ಸರನ್, ಮತ್ತು ಅನಿಖಾ ಸುರೇಂದ್ರನ್ ಕೂಡ ಚಿತ್ರದಲ್ಲಿ ಪ್ರಮುಖ ಪಾತ್ರಗಳಲ್ಲಿ ನಟಿಸುತ್ತಿದ್ದಾರೆ ಎಂದು ವಿಡಿಯೊ ತಿಳಿಸಿತ್ತು.