ಬೆಂಗಳೂರು: ಗೋಲ್ಡನ್‌ ಸ್ಟಾರ್‌ ಗಣೇಶ್‌ ಹಾಗೂ ಯೋಗರಾಜ್ ಭಟ್‌ ಕಾಂಬಿನೇಷನ್‌ ಗಾಳಿಪಟ-2 ಸಿನಿಮಾ (Gaalipata 2) ರಾಜ್ಯಾದ್ಯಂತ ಯಶಸ್ವಿ ಪ್ರದರ್ಶನ ಕಾಣುತ್ತಿದೆ. ಮೊದಲ ಪ್ರದರ್ಶನವೇ ಹೌಸ್‌ಫುಲ್‌ ಆಗಿದ್ದು, ಒಳ್ಳೆಯ ಪ್ರತಿಕ್ರಿಯೆಗಳು ಬಂದಿದೆ. ಇದೀಗ ಗಾಳಿಪಟ-2 ಸಿನಿಮಾದ ಸಕ್ಸಸ್‌ ಅನ್ನು ಚಿತ್ರತಂಡ ಒರಾಯನ್ ಮಾಲ್‌ನಲ್ಲಿ ಶುಕ್ರವಾರ (ಆ.19) ಆಚರಿಸಿಕೊಂಡಿದೆ.
ಸಚಿವ, ನಟ ಬಿ.ಸಿ.ಪಾಟೀಲ್, ಸಂಸದೆ, ನಟಿ ಸುಮಲತಾ ಅಂಬರೀಶ್ ಸೇರಿದಂತೆ ಹಲವು ಗಣ್ಯರು ಗಾಳಿಪಟ-2 ಸಿನಿಮಾವನ್ನು ವೀಕ್ಷಿಸಿ ಖುಷಿಯನ್ನು ಹಂಚಿಕೊಂಡರು.
ನಂತರ ಮಾಧ್ಯಮದವರೊಂದಿಗೆ ಮಾತನಾಡಿದ ಬಿ.ಸಿ.ಪಾಟೀಲ, ʻʻಗಾಳಿಪಟ ಸಿನಿಮಾವನ್ನು ಕರ್ನಾಟಕದ ಜನತೆ ಒಪ್ಪಿಕೊಂಡಿದೆ. ಅದ್ಭುತವಾದ ಸಿನಿಮಾ. ಈ ಜಗತ್ತನ್ನು ಬಿಟ್ಟು ಯಾವುದೋ ಜಗತ್ತಿನಲ್ಲಿ ವಿಹಾರ ಮಾಡಿದಂತೆ ಅನುಭವ ಆಗುತ್ತದೆ. ಕಥೆಯನ್ನು ನವಿರಾಗಿ ಹೆಣೆಯಲಾಗಿದ್ದು, ಸಂಪೂರ್ಣ ಹಾಸ್ಯಮಯವಾಗಿದೆ. ಪ್ರತಿಯೊಬ್ಬ ನಟರಲ್ಲೂ ಉತ್ತಮ ಅಭಿನಯ ಮೂಡಿಬಂದಿದೆ. ಇನ್ನು ಚಿತ್ರಕ್ಕೆ ತಕ್ಕಂತೆ ಸಂಗೀತವಿದ್ದು, ನನಗೆ ಬಹಳ ಇಷ್ಟವಾಯಿತು. ಕನ್ನಡದಲ್ಲಿ ಕೇವಲ ಆ್ಯಕ್ಷನ್ ಸಿನಿಮಾಗಳು ಮಾತ್ರ ಜನಪ್ರಿಯಗೊಳ್ಳುತ್ತವೆ ಎಂಬ ಮಾತನ್ನು ಈ ಸಿನಿಮಾ ಹುಸಿಯಾಗಿಸಿದೆ. ಹೊಸ ಸಿನಿಮಾಗಳಿಗೆ ಪ್ರೇಕ್ಷಕ ಖಂಡಿತವಾಗಿಯೂ ಕೈ ಹಿಡಿಯುತ್ತಾನೆ ಎಂಬುದಕ್ಕೆ ಈ ಸಿನಿಮಾ ಸಾಕ್ಷಿʼʼ ಎಂದು ಅಭಿಪ್ರಾಯಪಟ್ಟರು.
ಇದನ್ನೂ ಓದಿ | Gaalipata 2 | ಬೆಳ್ಳಿ ಪರದೆ ಮೇಲೆ ಗಾಳಿಪಟ ಹಾರಾಟ ಶುರು: 200ಕ್ಕೂ ಹೆಚ್ಚು ಸ್ಕ್ರೀನ್‌ಗಳಲ್ಲಿ ಪ್ರದರ್ಶನ
ಸಂಸದೆ ಸುಮಲತಾ ಅಂಬರೀಶ್ ಮಾತನಾಡಿ ʻʻಇದು ಯೋಗರಾಜ್ ಭಟ್‌ ಅವರ ಸಿಗ್ನೇಚರ್‌ ಚಿತ್ರ. ಅವರ ಎಲ್ಲ ಸಿನಿಮಾಗಳನ್ನು ಪದೇಪದೆ ನೋಡಬೇಕೆಂದು ಅನಿಸುತ್ತದೆ. ನಗಿಸುತ್ತಲೇ ಅಳಿಸುವುದು. ಅಳಿಸುತ್ತಲೇ ನಗಿಸುವುದು ಯೋಗರಾಜ್ ಭಟ್‌ ಅವರಿಗೆ ಸಿದ್ಧಿಸಿದ ಕಲೆಯಾಗಿದೆ. ಅದೇ ರೀತಿ ಈ ಸಿನಿಮಾವನ್ನು ಮಾಡಿದ್ದಾರೆ. ಹಾಡುಗಳು, ಹಿನ್ನೆಲೆ ಸಂಗೀತ ತುಂಬಾ ಮನಸ್ಸಿಗೆ ನಾಟುತ್ತದೆ. ಡೈಲಾಗ್‌ನಲ್ಲಿ ಕ್ರೇಜಿನೆಸ್‌ ಇದೆ ʼʼಎಂದರು
ನಿರ್ಮಾಪಕ ರಾಕ್‌ಲೈನ್ ವೆಂಕಟೇಶ್‌ ಮಾತನಾಡಿ “ʼಸಿನಿಮಾ ನೋಡಿ ನಕ್ಕು ನಕ್ಕು ಸಾಕಾಯಿತು. ಸಿನಿಮಾ ನೋಡಿ ಹಾಗೂ ಖುಷಿಯಾಗಿರಿʼʼ ಎಂದರು.
ಸಂಗೀತ ನಿರ್ದೇಶಕ ವಿ. ಹರಿಕೃಷ್ಣ ಮಾತನಾಡಿ ʻʻಸಿನಿಮಾ ನೋಡಿದಾಗ ಭಟ್ಟರು ಚೆನ್ನಾಗಿ ಮಾಡಿದ್ದಾರೆ. ಭಟ್ಟರ ಛಾಪು ಮತ್ತೆ ನೋಡಿ ಸಂಭ್ರಮಿಸುವ ಹಾಗೇ ಆಯಿತು. ಸಿನಿಮಾಗೆ ಇನ್ನೂ ಯಶಸ್ಸು ಸಿಗಲಿʼʼ ಎಂದರು.
ಗಾಳಿಪಟ-೩ ಅನ್ನೂ ಒಟ್ಟಿಗೆ ಮಾಡಬೇಕಿತ್ತು-ಯೋಗರಾಜ ಭಟ್‌
ನಿರ್ದೇಶಕ ಯೋಗರಾಜ್ ಭಟ್‌ ಅವರು ಸಿನಿಮಾ ನೋಡಿದ ಪ್ರೇಕ್ಷಕರಿಗೆ, ಗಣ್ಯರಿಗೆ ಮೊದಲಿಗೆ ನಾನು ಧನ್ಯವಾದವನ್ನು ಅರ್ಪಿಸುತ್ತೇನೆ. ಗಾಳಿಪಟ-2 ಮತ್ತು ಗಾಳಿಪಟ-3 ಸಿನಿಮಾ ಒಟ್ಟಿಗೆ ಮಾಡುವ ಆಲೋಚನೆ ಇತ್ತು. ಇದೀಗ ಗಾಳಿಪಟ-2ಕ್ಕೆ ಒಳ್ಳೆಯ ಪ್ರತಿಕ್ರಿಯೆ ಬಂದಿದೆ ಎಂದು ತಿಳಿಸಿದರು.
ನಟ ಯಶಸ್‌ ಸೂರ್ಯ ಮತ್ತು ಗಣ್ಯರು ಸೇರಿದಂತೆ ಚಿತ್ರತಂಡ ಭಾಗಿಯಾಗಿತ್ತು. ಸೂರಜ್‌ ಪ್ರೊಡಕ್ಷನ್‌ ಅಡಿಯಲ್ಲಿ ಉಮಾ ಎಂ. ರಮೇಶ್‌ ರೆಡ್ಡಿ ನಿರ್ಮಾಣ ಮಾಡಿದ್ದಾರೆ. ಸಂತೋಷ್‌ ರೈ ಪಾತಾಜೆ ಛಾಯಾಗ್ರಣವಿದ್ದು, ಅರ್ಜುನ್‌ ಜನ್ಯ ಸಂಗೀತ ನಿರ್ದೇಶನ ಮಾಡಿದ್ದಾರೆ. ಗಣೇಶ್‌, ದಿಗಂತ್‌ ಹಾಗೂ ಪವನ್‌ ಕುಮಾರ್‌ ಮುಖ್ಯ ಪಾತ್ರದಲ್ಲಿ ನಟಿಸಿದ್ದರೆ, ಅನಂತ್‌ ನಾಗ್‌ ಚಿತ್ರದಲ್ಲಿ ಅಭಿನಯಿಸಿರುವುದು ಇನ್ನೂ ವಿಶೇಷ. ವೈಭವಿ ಶಾಂಡಿಲ್ಯ, ಶರ್ಮಿಳಾ ಮಾಂಡ್ರೆ, ಸಂಯುಕ್ತಾ, ನಿಶ್ವಿಕಾ ನಾಯ್ಡು ನಾಯಕಿಯರಾಗಿ ಕಾಣಿಸಿಕೊಂಡಿದ್ದಾರೆ .
ಇದನ್ನೂ ಓದಿ | Gaalipata 2 | ಸ್ಯಾಂಡಲ್‌ವುಡ್ ಆಗಸಕ್ಕೆ ಹಾರಲಿದೆ ಯೋಗರಾಜ್ ಭಟ್ಟರ ಕಲರ್‌ಫುಲ್‌ ‘ಗಾಳಿಪಟ’