ಮುಂಬೈ: ಸನ್ನಿ ಡಿಯೋಲ್ ನಟನೆಯ ಗದರ್ 2 ಸಿನಿಮಾ (Gadar 2 Movie) ಬಿಡುಗಡೆಗೆ ಸಿದ್ಧತೆ ಮಾಡಿಕೊಳ್ಳುತ್ತಿದೆ. ಟೀಸರ್‌ ಬಿಡುಗಡೆ ಮಾಡಿದ ಬೆನ್ನಲ್ಲೇ ಸಿನಿಮಾ ತಂಡ ಇದೀಗ ಖೈರಿಯತ್‌ ಹೆಸರಿನ ಹಾಡನ್ನು ಬಿಡುಗಡೆ ಮಾಡಿದೆ. ಮೂರು ನಿಮಿಷಗಳ ಕಾಲ ಇರುವ ಹಾಡಿನಲ್ಲಿ ಒಂದು ಕುಟುಂಬದ ಮೂರು ಜನರ ಕಣ್ಣೀರ ಕಥೆಯನ್ನು ಸೆರೆಹಿಡಿಯಲಾಗಿದೆ.
ಒಂದತ್ತ ತಾರಾ ಸಿಂಗ್‌ (ಸನ್ನಿ ಡಿಯೋಲ್) ಬಸ್ಸಿನ ಮೇಲೆ ಕುಳಿತುಕೊಂಡು ಪತ್ರವೊಂದನ್ನು ಓದುತ್ತಾ ಸಾಗುತ್ತಿರುತ್ತಾರೆ. ಇನ್ನೊಂದತ್ತ ತಾರಾ ಸಿಂಗ್‌ ಪತ್ನಿ ಶಕೀನಾ(ಅಮೀಷಾ) ಮನೆಯಲ್ಲಿ ಕುಳಿತುಕೊಂಡು ಮಗನಿಗಾಗಿ ದೇವರ ಪ್ರಾರ್ಥನೆ ಮಾಡುತ್ತಿರುತ್ತಾರೆ. ಹಾಗೆಯೇ ಮತ್ತೊಂದು ಕಡೆಯಲ್ಲಿ ಈ ಇಬ್ಬರ ಮಗನಾದ ಚರಣ್‌ಜೀತ್‌(ಉತ್ಕರ್ಷ್ ಶರ್ಮಾ) ತಾನು ತಂದೆ ತಾಯಿಯೊಂದಿಗೆ ಕಳೆದ ಸಂತೋಷದ ಕ್ಷಣಗಳನ್ನು ನೆನಪಿಸಿಕೊಂಡು ಕಣ್ಣೀರು ಹಾಕುತ್ತಿರುತ್ತಾರೆ. ಹಾಡಿನ ಪೂರ್ತಿ ಮೂರೂ ಮಂದಿ ಕಳೆದು ಹೋದ ಕ್ಷಣಗಳನ್ನು ನೆನಪಿಸಿಕೊಂಡು ಕಣ್ಣೀರು ಹಾಕುವ ದೃಶ್ಯಗಳನ್ನೇ ತೋರಿಸಲಾಗಿದೆ.
ಇದನ್ನೂ ಓದಿ: Meghana Raj: ಮೇಘನಾ ರಾಜ್‌ ನಟನೆಯ ʼತತ್ಸಮ ತದ್ಭವʼ ಸಿನಿಮಾದ ಟೀಸರ್‌ ಔಟ್‌!
ಈ ಖೈರಿಯತ್‌ ಹಾಡನ್ನು ಸಯೀದ್‌ ಕ್ವಾದ್ರಿ ಬರೆದಿದ್ದಾರೆ. ಮಿಥುನ್‌ ಅವರು ಸಂಗೀತ ನಿರ್ದೇಶನ ಮಾಡಿದ್ದು, ಅರಿಜಿತ್‌ ಸಿಂಗ್‌ ಅವರು ಧ್ವನಿ ನೀಡಿದ್ದಾರೆ. ಈ ಹಾಡಿಗೂ ಮೊದಲು ಗದರ್ 2 ಸಿನಿಮಾದ ಉದ್ದ್‌ ಜಾ ಕಾಲೆ ಕಾವ ಹಾಡನ್ನು ಬಿಡುಗಡೆ ಮಾಡಲಾಗಿತ್ತು. ಆ ಹಾಡು ಬಿಡುಗಡೆಯಾದ ಕೆಲವೇ ದಿನಗಳಲ್ಲಿ ಎಲ್ಲೆಡೆ ಹರಿದಾಡಿ ಅಭಿಮಾನಿಗಳಿಂದ ಭಾರೀ ಮೆಚ್ಚುಗೆ ಪಡೆದುಕೊಂಡಿತ್ತು.
ಅನಿಲ್ ಶರ್ಮಾ ನಿರ್ದೇಶನದ ಗದರ್ 2 ಚಿತ್ರದಲ್ಲಿ ಸನ್ನಿ ಡಿಯೋಲ್, ಅಮೀಶಾ ಪಟೇಲ್ ಮತ್ತು ಉತ್ಕರ್ಷ್ ಶರ್ಮಾ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಈ ಸಿನಿಮಾದಲ್ಲಿ ಗದರ್: ಏಕ್‌ ಪ್ರೇಮ್‌ ಕಥಾ ಮತ್ತು ಘರ್‌ ಆಜಾ ಪರದೇಸಿ ಹಾಡಿನ ದುಃಖದ ಆವೃತಿಯೂ ಸೇರಿರಲಿದೆ ಎನ್ನುವ ಸುಳಿವನ್ನು ಸಿನಿಮಾದ ಟೀಸರ್‌ ಬಿಟ್ಟುಕೊಟ್ಟಿದೆ.