ಮುಂಬಯಿ: ಹಲವು ಹಿಂದಿ ಧಾರಾವಾಹಿ-ಸಿನಿಮಾಗಳಲ್ಲಿ ನಟಿಸಿದ್ದ ಖ್ಯಾತ ನಟಿ ವೀಣಾ ಕಪೂರ್ರನ್ನು ಅವರ ಪುತ್ರ ಸಚಿನ್ ಕಪೂರ್ ಹತ್ಯೆ ಮಾಡಿದ್ದಾನೆ ಎಂಬ ಸುದ್ದಿ ಕಳೆದ ಮೂರ್ನಾಲ್ಕು ದಿನಗಳ ಹಿಂದೆ ಬಹುತೇಕ ಎಲ್ಲ ಮಾಧ್ಯಮಗಳಲ್ಲಿ ಪ್ರಕಟವಾಗಿತ್ತು. ಆದರೆ ವಾಸ್ತವದಲ್ಲಿ ಆ ಸುದ್ದಿ ಸುಳ್ಳು ಎಂದು ಖಚಿತವಾಗಿದೆ. ‘ನಾನು ಸತ್ತಿಲ್ಲ, ನನ್ನ ಮಗ ನನ್ನನ್ನು ಕೊಂದಿಲ್ಲ’ ಎಂದು ನಟಿ ವೀಣಾ ಕಪೂರ್ ಅವರೇ ಸ್ಪಷ್ಟಪಡಿಸಿದ್ದಾರೆ. ಅಷ್ಟೇ ಅಲ್ಲ, ಈ ಬಗ್ಗೆ ಸುಳ್ಳು ಸುದ್ದಿ ಹಬ್ಬಿಸಿದವರ ವಿರುದ್ಧ ಮುಂಬಯಿ ಪೊಲೀಸ್ ಠಾಣೆಯಲ್ಲಿ ಎಫ್ಐಆರ್ ದಾಖಲಿಸಿದ್ದಾರೆ.
ಮಾಧ್ಯಮಗಳೊಂದಿಗೆ ಮಾತನಾಡಿದ ವೀಣಾ ಕಪೂರ್ ‘ನನ್ನನ್ನು ನನ್ನ ಪುತ್ರನೇ ಆಸ್ತಿಗಾಗಿ ಕೊಂದಿದ್ದಾನೆ ಎಂಬುದು ಸುಳ್ಳುಸುದ್ದಿ. ನಿಜ ಹೇಳಬೇಕೆಂದರೆ, ಹೀಗೆ ಕೊಲೆಯಾಗಿದ್ದು ಜುಹುವಿನಲ್ಲಿ. ಆಕೆಯ ಹೆಸರೂ ವೀಣಾ ಕಪೂರ್. ಆದರೆ ನಾನು ಕೊಲೆಯಾಗಿದ್ದೇನೆ ಎಂದು ದೇಶಾದ್ಯಂತ ಸುದ್ದಿಯಾಯಿತು. ನಾನು ಆರಾಮಾಗಿದ್ದೇನೆ ಮತ್ತು ಗೋರೆಗಾಂವ್ನಲ್ಲಿ ಪುತ್ರನೊಂದಿಗೇ ಇದ್ದೇನೆ. ನಾನು ಸತ್ತೇ ಹೋಗಿದ್ದೇನೆ ಎಂದು ಭಾವಿಸಿರುವ ಜನರಿಗೆ ಈ ಸಂದೇಶ ಕೊಡಲು ಬಯಸುತ್ತೇನೆ. ನಾನು ಬದುಕಿದ್ದೇನೆ. ಫೇಕ್ನ್ಯೂಸ್ಗಳನ್ನು ನಂಬಬೇಡಿ. ನಾನು ನನ್ನ ಪುತ್ರನಿಂದ ಹತ್ಯೆಗೀಡಾದೆ ಎಂಬ ಸುದ್ದಿ ನೋಡಿ ನನಗೇ ನೋವಾಯಿತು. ಪೊಲೀಸ್ ಠಾಣೆಗೆ ಹೋಗಿ ದೂರು ದಾಖಲು ಮಾಡಿದ್ದೇವೆ. ಇಂಥ ಫೇಕ್ನ್ಯೂಸ್ ಹಬ್ಬಿಸಿದವರ ವಿರುದ್ಧ ಅವರೇ ಕ್ರಮ ಕೈಗೊಳ್ಳುತ್ತಾರೆ. ಮುಂಬಯಿ ಪೊಲೀಸರು ನಮಗೆ ನೀಡುತ್ತಿರುವ ಸಹಕಾರಕ್ಕೆ ನಾನು ಕೃತಜ್ಞಳು’ ಎಂದಿದ್ದಾರೆ.
‘ಅದ್ಯಾವುದೋ ಬೇರೆ ವೀಣಾ ಕಪೂರ್ ಕೊಲೆಯಾದ ಸುದ್ದಿಗೆ ನನ್ನ ಫೋಟೋ ಹಾಕಿ ಇಲ್ಲದ ರೂಮರ್ಸ್ ಹಬ್ಬಿಸಿದ್ದಾರೆ. ನಾವೀಗ ಈ ಬಗ್ಗೆ ಪೊಲೀಸರಿಗೆ ದೂರು ನೀಡದೆ ಇದ್ದರೆ, ಮತ್ತೊಮ್ಮೆ ಇದೇ ರೀತಿಯ ಸುದ್ದಿ ಹರಡುತ್ತದೆ. ನಾನು ನನ್ನ ಮಗನಿಂದಲೇ ಹತ್ಯೆಗೀಡಾದೆ ಎಂಬ ಸುದ್ದಿ ನೋಡಿ ಅನೇಕರು ನಮ್ಮ ಮನೆಗೆ ಕರೆ ಮಾಡಿದ್ದಾರೆ. ನನ್ನ ಮೊಬೈಲ್, ಮಗನ ಮೊಬೈಲ್ಗಳಿಗೆ ನಿರಂತರವಾಗಿ ಕಾಲ್ ಬಂದಿದೆ. ಅವರಿಗೆಲ್ಲ ಉತ್ತರಿಸಿ ಸಾಕಾಯಿತು. ಮಾನಸಿಕವಾಗಿ ತುಂಬ ಹಿಂಸೆಗೆ ಒಳಪಟ್ಟಿದ್ದೇವೆ’ ಎಂದೂ ವೀಣಾ ಕಪೂರ್ ಹೇಳಿದ್ದಾರೆ.
ವೀಣಾ ಕಪೂರ್ಗೆ 73 ವರ್ಷ ವಯಸ್ಸಾಗಿದೆ. ವೀಣಾ ಕಪೂರ್ ಮತ್ತು ಅವರ ಪುತ್ರ ಸಚಿನ್ ಕಪೂರ್ ನಡುವೆ 12 ಕೋಟಿ ರೂ.ಮೌಲ್ಯದ ಫ್ಲ್ಯಾಟ್ಗಾಗಿ ವಿವಾದ ಆಗಿತ್ತು. ಜಗಳ ಉತ್ತುಂಗಕ್ಕೇರಿ ಸಚಿನ್ ತನ್ನಮ್ಮ ವೀಣಾರನ್ನು ಕೊಂದಿದ್ದಾರೆ ಎಂದು ಸುದ್ದಿಯಾಗಿತ್ತು. ಆದರೆ ಸತ್ತಿದ್ದು ನಟಿ ವೀಣಾ ಕಪೂರ್ ಅಲ್ಲ ಎಂಬುದು ದೃಢಪಟ್ಟಿದೆ. ಈ ಪ್ರಮಾದ ಎಸಗಿದವರ ಪತ್ತೆಗಾಗಿ ದಿಂಡೋಶಿ ಠಾಣೆ ಪೊಲೀಸರು ತನಿಖೆ ಕೈಗೊಂಡಿದ್ದಾರೆ.
ಇದನ್ನೂ ಓದಿ: Stars Fashion | ನೈಕಾ ಬ್ಯೂಟಿ ಅವಾರ್ಡ್‌ನಲ್ಲಿ ಬಾಲಿವುಡ್‌ ತಾರೆಯರು ಹೇಗೆಲ್ಲ ಮಿನುಗಿದರು!