ಚೆನ್ನೈ: ರಜನಿಕಾಂತ್‌ ನಟನೆಯ ಜೈಲರ್‌ ಸಿನಿಮಾ (Jailer Movie) ಬಿಡುಗಡೆಗೆ ಸಿದ್ಧವಾಗಿದೆ. ಆಗಸ್ಟ್‌ 10ರಂದು ಈ ಸಿನಿಮಾ ದೇಶಾದ್ಯಂತ ಬಿಡುಗಡೆಗೆ ಸಜ್ಜಾಗಿದ್ದರೆ, ಇನ್ನೊಂದೆಡೆ ತಲೈವಾ ಅಭಿಮಾನಿಗಳು ಕೂಡ ಸಿನಿಮಾ ನೋಡಲು ಕಾತುರದಿಂದ ಕಾಯುತ್ತಿದ್ದಾರೆ. ಆದರೆ ಅದೇ ದಿನದಂದು ರಜನಿಕಾಂತ್‌ ಅವರ ʼಜೈಲರ್‌ʼ ಸಿನಿಮಾ ಜತೆಯಲ್ಲಿ ಮತ್ತೊಂದು ʼಜೈಲರ್‌ʼ ಸಿನಿಮಾ ಕೂಡ ಬಿಡುಗಡೆಯಾಗುತ್ತಿದೆ!
ಹೌದು. ಆಗಸ್ಟ್‌ 10ರಂದು ಬಿಡುಗಡೆಯಾಗುತ್ತಿರುವುದು ನೆಲ್ಸನ್‌ ನಿರ್ದೇಶನದ ರಜನಿಕಾಂತ್‌ ನಟನೆಯ ʼಜೈಲರ್‌ʼ ಮಾತ್ರವಲ್ಲ. ಮಲಯಾಳಂನ ನಿರ್ದೇಶಕ ಸಕ್ಕೀರ್‌ ಮದತಿಲ್‌ ನಿರ್ದೇಶನದ ʼಜೈಲರ್‌ʼ ಸಿನಿಮಾ ಕೂಡ ಅದೇ ದಿನ ಬಿಡುಗಡೆಯಾಗುತ್ತಿದೆ. ಅಂದ ಹಾಗೆ ನೆಲ್ಸನ್‌ ಅವರ ಅವರ ʼಜೈಲರ್‌ʼ ಸಿನಿಮಾ ಮಲಯಾಳಂ ಭಾಷೆಯಲ್ಲಿಯೂ ಬಿಡುಗಡೆಯಾಗುತ್ತಿದೆ. ಅದೇ ರೀತಿಯಲ್ಲಿ ಮಲಯಾಳಂನ ಜೈಲರ್‌ ಸಿನಿಮಾ ಕೂಡ ಬೇರೆ ಭಾಷೆಗಳಿಗೆ ಡಬ್‌ ಆಗಲಿದೆ.
ಇದನ್ನೂ ಓದಿ: Viral Video: ಪಿಯಾನೋ ನುಡಿಸಿದ ಲಸಿತ್ ಮಾಲಿಂಗ; ವಿಡಿಯೊ ವೈರಲ್
ಈ ಸಿನಿಮಾ ವಿಚಾರದಲ್ಲಿ ನಿರ್ದೇಶಕ ಸಕ್ಕೀರ್‌ ಅವರು ಈ ಮೊದಲೇ ಪ್ರತಿಕ್ರಿಯೆ ನೀಡಿದ್ದರು. ನಾನು ರಜನಿಕಾಂತ್‌ ಅವರ ʼಜೈಲರ್‌ʼ ಸಿನಿಮಾ ಘೋಷಣೆಯಾಗುವುದಕ್ಕೆ ಮೊದಲೇ, 2021ರಲ್ಲೇ ʼಜೈಲರ್‌ʼ ಹೆಸರಿನಲ್ಲಿ ಸಿನಿಮಾವನ್ನು ಕೇರಳ ಫಿಲ್ಮ್‌ ಚೇಂಬರ್‌ ಆಫ್‌ ಕಾಮರ್ಸ್‌(ಕೆಎಫ್‌ಸಿಸಿ)ನಲ್ಲಿ ಶೀರ್ಷಿಕೆ ನೋಂದಾಯಿಸಿದ್ದೆ. ಅದಲ್ಲದೆ ರಜನಿಕಾಂತ್‌ ಅವರ ʼಜೈಲರ್‌ʼ ಸಿನಿಮಾದ ನಿರ್ಮಾಣ ಸಂಸ್ಥೆಯಾದ ಸನ್‌ ಪಿಕ್ಚರ್ಸ್‌ಗೆ ಕೂಡ ಮನವಿ ಮಾಡಿದ್ದೆ. ಮಲಯಾಳಂನಲ್ಲಾದರೂ ಹೆಸರನ್ನು ಬದಲಾಯಿಸಿ ಬಿಡುಗಡೆ ಮಾಡಿ ಎಂದು ಕೇಳಿಕೊಂಡಿದ್ದೆ. ಅದನ್ನು ಸಂಸ್ಥೆ ನಿರಾಕರಿಸಿತ್ತು ಎಂದು ಹೇಳಿದ್ದರು.
ಸನ್‌ ಪಿಕ್ಚರ್ಸ್‌ ಈ ವಿಚಾರವಾಗಿ ಮದ್ರಾಸ್‌ ಹೈಕೋರ್ಟ್‌ ಮೆಟ್ಟಿಲನ್ನೂ ಏರಿದೆ. ಅದಕ್ಕೆ ಸಕ್ಕೀರ್‌ ಅವರು ವಿವರಣೆಯನ್ನೂ ಕೊಟ್ಟಿದ್ದಾರೆ. ಅದರ ವಿಚಾರಣೆ ಆಗಸ್ಟ್‌ 2ರಂದು ನಡೆಯಲಿದೆ.
ಇದನ್ನೂ ಓದಿ: Viral Video : ಲಿಫ್ಟ್‌ ಹತ್ತಿ ಯಾವ ಫ್ಲೋರ್‌ಗೆ ಹೋಗಬೇಕು ಎನ್ನುವುದನ್ನೂ ಹೇಳುತ್ತದೆ ಈ ಬೆಕ್ಕು!
ನೆಲ್ಸನ್‌ ನಿರ್ದೇಶನದ ʼಜೈಲರ್‌ʼ ಸಿನಿಮಾದಲ್ಲಿ ರಜನಿಕಾಂತ್‌ ಅವರು ʼಜೈಲರ್‌ʼ ಪಾತ್ರದಲ್ಲಿ ನಟಿಸಿದ್ದಾರೆ. ಸಿನಿಮಾದಲ್ಲಿ ಕನ್ನಡದ ಹ್ಯಾಟ್ರಿಕ್‌ ಹೀರೋ ಶಿವರಾಜ್‌ ಕುಮಾರ್‌, ತಮನ್ನಾ ಭಾಟಿಯಾ, ಮೋಹನ್‌ಲಾಲ್‌, ಜಾಕಿ ಶಾರ್ಫ್‌ ಕೂಡ ನಟಿಸಿದ್ದಾರೆ.