ಚೆನ್ನೈ: ಸನ್ ಗ್ರೂಪ್ನ ಅಧ್ಯಕ್ಷ ಮತ್ತು ಸಂಸ್ಥಾಪಕ ಕಲಾನಿಧಿ ಮಾರನ್ ಅವರು ತಮ್ಮ ನಿರ್ಮಾಣದ ಜೈಲರ್ ಸಿನಿಮಾ (Jailer Movie) ಭರ್ಜರಿ ಯಶಸ್ಸು ಕಂಡ ಹಿನ್ನೆಲೆಯಲ್ಲಿ ಸೂಪರ್ಸ್ಟಾರ್ ರಜನಿಕಾಂತ್ (Superstar Rajnikant) ಮತ್ತು ನಿರ್ದೇಶಕ ನೆಲ್ಸನ್ ದಿಲೀಪ್ ಕುಮಾರ್ ಅವರನ್ನು ಭೇಟಿಯಾಗಿ ಬೋನಸ್ ಚೆಕ್ಗಳು ಮತ್ತು ಐಷಾರಾಮಿ ಕಾರುಗಳನ್ನು ಉಡುಗೊರೆಯಾಗಿ ನೀಡಿದ ಕೆಲವು ದಿನಗಳ ನಂತರ, ಸಂಗೀತ ಸಂಯೋಜಕ ಅನಿರುದ್ಧ್ ರವಿಚಂದರ್ ಅವರಿಗೂ ಅದೇ ಮಾದರಿಯ ಗಿಫ್ಟ್ಗಳನ್ನು ಕೊಟ್ಟಿದ್ದಾರೆ. ಜೈಲರ್ನ ಐತಿಹಾಸಿಕ ಯಶಸ್ಸಿನ ಹಿನ್ನೆಲೆಯಲ್ಲಿ ತಂಡದ ಪ್ರಮುಖರಿಗೆ ನಿರ್ಮಾಪಕರು ಗಿಫ್ಟ್ಗಳನ್ನು ಕೊಡುವುದನ್ನು ಮುಂದುವರಿಸಿದ್ದಾರೆ.
ಮಾರನ್ ಸೋಮವಾರ ಅನಿರುದ್ಧ್ ಅವರನ್ನು ಭೇಟಿ ಮಾಡಿ ವೈಯಕ್ತಿಕವಾಗಿ ಚೆಕ್ ಹಸ್ತಾಂತರಿಸಿದರು. “ಕಲಾನಿಧಿ ಮಾರನ್ ಅವರು @anirudhofficial ಅವರನ್ನು ಅಭಿನಂದಿಸಿದರು ಮತ್ತು ಚೆಕ್ ಹಸ್ತಾಂತರಿಸಿದರು. ಇದು #Jailer ರ ಭಾರಿ ಯಶಸ್ಸಿನ ಸಂಭ್ರಮ” ಎಂದು ಶೀರ್ಷಿಕೆ ನೀಡಿ ಸನ್ ಪಿಕ್ಚರ್ಸ್ ಚಿತ್ರವನ್ನು ಹಂಚಿಕೊಂಡಿದೆ.
ನಿರ್ಮಾಣ ಕಂಪನಿಯು ವೀಡಿಯೊವನ್ನು ಸಹ ಹಂಚಿಕೊಂಡಿದೆ. ಇದರಲ್ಲಿ ಮಾರನ್ ಮೂರು ವಿಭಿನ್ನ ಕಾರುಗಳನ್ನು ಅನಿರುದ್ಧ್ ಅವರಿಗೆ ತೋರಿಸುತ್ತಾರೆ. ಮೂರನ್ನೂ ಪರಿಶೀಲಿಸಿದ ಅನಿರುದ್ಧ್ ಹೊಚ್ಚ ಹೊಸ ಪೋರ್ಷ್ ಕಾರನ್ನು ಉಡುಗೊರೆಯಾಗಿ ಆಯ್ಕೆ ಮಾಡಿಕೊಂಡಿದ್ದಾರೆ.
ಬ್ಲಾಕ್ಬಸ್ಟರ್ ಜೈಲರ್ ಸಿನಿಮಾದ ಯಶಸ್ಸನ್ನನು ಆಚರಿಸಲು, ಕಲಾನಿಧಿ ಮಾರನ್ ಅವರು ಹೊಚ್ಚ ಹೊಸ ಪೋರ್ಷ್ ಕಾರಿನ ಕೀಲಿಯನ್ನು ಅನಿರುದ್ಧ್ ಅವರಿಗೆ ನೀಡಿದರು” ಎಂದು ಬರೆದು ಸನ್ ಪಿಕ್ಚರ್ಸ್ ವೀಡಿಯೊವನ್ನು ಹಂಚಿಕೊಂಡಿದೆ. ಈ ಮೂವರಿಗೆ ನೀಡಲಾದ ಚೆಕ್ಗಳ ನಿರ್ದಿಷ್ಟ ಮೊತ್ತವನ್ನು ಸಾರ್ವಜನಿಕರಿಗೆ ಬಹಿರಂಗಪಡಿಸಲಾಗಿಲ್ಲ.
ಗಳಿಕೆಯಲ್ಲಿ ದಾಖಲೆ
ಅಟ್ಲೀ ಅವರ ಶಾರುಖ್ ಖಾನ್ ಅಭಿನಯದ ಜವಾನ್ ಚಿತ್ರದ ಬಿಡುಗಡೆಯಾಗಲಿರುವ ಸೆಪ್ಟೆಂಬರ್ 7ರಂದು ಈ ಚಿತ್ರವು ಒಟಿಟಿಗೆ ಪ್ರವೇಶ ಪಡೆಯಲಿದೆ. ಏತನ್ಮಧ್ಯೆ ಜೈಲರ್ ಚಿತ್ರಮಂದಿರಗಳಲ್ಲಿ ಉತ್ತಮ ಪ್ರದರ್ಶನವನ್ನು ಮುಂದುವರಿಸಿದೆ. ರಜನಿಕಾಂತ್ ಅಭಿನಯದ ಈ ಚಿತ್ರವು ದೇಶೀಯ ಗಳಿಕೆ 395 ಕೋಟಿ ರೂ ಮತ್ತು ವಿದೇಶದಲ್ಲಿ 195 ಕೋಟಿ ರೂ.ಗಳೊಂದಿಗೆ, ಜೈಲರ್ ಈಗ ವಿಶ್ವಾದ್ಯಂತ 590 ಕೋಟಿ ರೂ.ಗಳ ಬಾಕ್ಸ್ ಆಫೀಸ್ ಮೊತ್ತವನ್ನು ಸಾಧಿಸಿದೆ.
ಇದನ್ನೂ ಓದಿ : Vijay Deverakonda: ಖುಷಿ ಚಿತ್ರದ ಗಳಿಕೆಯಿಂದ 1 ಕೋಟಿ ರೂ. ಫ್ಯಾನ್ಸ್‌ಗೆ ಹಂಚ್ತಾರಂತೆ ವಿಜಯ್‌ ದೇವರಕೊಂಡ!
ಪ್ರಸ್ತುತ, ಜೈಲರ್ ಸಿನಿಮಾ “ಸಾರ್ವಕಾಲಿಕ ಅತಿ ಹೆಚ್ಚು ಗಳಿಕೆಯ ತಮಿಳು ಚಿತ್ರ ಎನಿಸಿಕೊಂಡಿದೆ. ಎಸ್ ಶಂಕರ್ ಅವರ ಫ್ಯಾಂಟಸಿ ಆಕ್ಷನ್ ಚಿತ್ರ 2.0 (2018ರಲ್ಲಿ ಬಿಡುಗಡೆಯಾಗಿತ್ತು) 723.30 ಕೋಟಿ ರೂಪಾಯಿ ಗಳಿಸಿತ್ತು. ಆ ಸಿನಿಮಾದಲ್ಲೂ ರಜನಿಕಾಂತ್ ಕೂಡ ನಟಿಸಿದ್ದಾರೆ. ಜೈಲರ್ ಈ ಹಿಂದೆ ಮಣಿರತ್ನಂ ಅವರ ಐತಿಹಾಸಿಕ ಆಕ್ಷನ್ ಚಿತ್ರ ಪೊನ್ನಿಯಿನ್ ಸೆಲ್ವನ್ನ ಒಟ್ಟು ಸಂಗ್ರಹವನ್ನು ಮೀರಿಸಿದೆ . ಆ ಸಿನಿಮಾದ ಒಟ್ಟು ಸಂಗ್ರಹ 488.36 ಕೋಟಿ ರೂಪಾಯಿ.
ಬಹುಭಾಷಾ ತಾರೆಗಳ ಸಂಗಮ
ಜೈಲರ್ ಚಿತ್ರದಲ್ಲಿ ಮೋಹನ್ ಲಾಲ್, ಶಿವರಾಜ್ ಕುಮಾರ್ ಮತ್ತು ಜಾಕಿ ಶ್ರಾಫ್ ಪ್ರಮುಖ ಅತಿಥಿ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಪ್ರಿಯಾಂಕಾ ಮೋಹನ್, ತಮನ್ನಾ ಭಾಟಿಯಾ, ರಮ್ಯಾ ಕೃಷ್ಣನ್, ಯೋಗಿ ಬಾಬು, ವಸಂತ್ ರವಿ ಮತ್ತು ವಿನಾಯಕನ್ ನಟಿಸಿದ್ದಾರೆ.
ರಜನಿಕಾಂತ್ ಮತ್ತು ನೆಲ್ಸನ್ ದಿಲೀಪ್ ಕುಮಾರ್ ಜೈಲರ್ ಮೂಲಕ ಮತ್ತೊಂದು ಮಸಾಲಾ ಚಿತ್ರವನ್ನು ಪ್ರೇಕ್ಷಕರಿಗೆ ಉಣಬಡಿಸಿದ್ದಾರೆ. ಜೈಲರ್ ಕಮಲ್ ಹಾಸನ್ ಅವರ ವಿಕ್ರಮ್ ನ ರಜನಿಕಾಂತ್ ಆವೃತ್ತಿಯಾಗಿದೆ ಎಂದೂ ಹೇಳಲಾಗುತ್ತಿದೆ.