ಮುಂಬೈ: ಬಾಲಿವುಡ್‌ ಬಾದ್‌ಶಾ ಶಾರುಖ್‌ ಖಾನ್‌ (Shah Rukh Khan) ಅವರ ಪಠಾಣ್‌ ಸಿನಿಮಾ ದೊಡ್ಡ ಯಶಸ್ಸು ಕಂಡಿತ್ತು. ಹಿಂದಿ ಸಿನಿಮಾಗಳೆಲ್ಲವೂ ಮಕಾಡೆ ಮಲಗುತ್ತಿದ್ದ ಸಮಯದಲ್ಲಿ ಬಿಡುಗಡೆಯಾದ ಸಿನಿಮಾ ಬಾಲಿವುಡ್‌ ಅನ್ನು ಮತ್ತೆ ಗಟ್ಟಿಯಾಗಿ ನಿಲ್ಲುವಲ್ಲಿ ಸಹಕರಿಸಿತು. ಆದರೆ ಇದೀಗ ಅದನ್ನೂ ಮೀರಿದ ಸಿನಿಮಾದಲ್ಲಿ ಶಾರುಖ್‌ ನಟಿಸುತ್ತಿದ್ದಾರೆ. ಅಟ್ಲೀ ನಿರ್ದೇಶನದಲ್ಲಿ ಬರಲಿರುವ ʼಜವಾನ್‌ʼ ಸಿನಿಮಾ ಶಾರುಖ್‌ ಖಾನ್‌ ಅವರ ಈವರೆಗಿನ ಅತಿ ಹೆಚ್ಚು ವೆಚ್ಚದ ಸಿನಿಮಾ ಎನ್ನುವ ಖ್ಯಾತಿಯನ್ನು ಪಡೆದುಕೊಳ್ಳಲಿದೆ.
ಹೌದು. ಪಠಾಣ್‌ ಸಿನಿಮಾವನ್ನು ಬರೋಬ್ಬರಿ 250 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಿಸಲಾಗಿತ್ತು. ಆದರೆ ಇದೀಗ ʼಜವಾನ್‌ʼ ಸಿನಿಮಾವನ್ನು 300 ಕೋಟಿ ರೂ. ವೆಚ್ಚದಲ್ಲಿ ತಯಾರಿಸಲಾಗುತ್ತಿದೆ. ಶಾರುಖ್‌ ಈವರೆಗೆ ನಟಿಸಿರುವ ಬಿಗ್‌ ಬಜೆಟ್‌ ಸಿನಿಮಾಗಳಲ್ಲಿ ಈ ಸಿನಿಮಾ ಮೊದಲನೇ ಸ್ಥಾನ ಪಡೆದುಕೊಳ್ಳಲಿದೆ. ಈ ಮಾಹಿತಿಯನ್ನು ಸಿನಿಮಾ ತಂಡದವರೊಬ್ಬರು ಮಾಧ್ಯಮಗಳಿಗೆ ನೀಡಿದ್ದಾರೆ.
ಇದನ್ನೂ ಓದಿ: Viral Video: ಮಹಿಳೆಯನ್ನು ನದಿಗೆ ಎಳೆದೊಯ್ದು, ಸಜೀವವಾಗಿ ತಿಂದ ಮೊಸಳೆ!
“ಜವಾನ್‌ ಸಿನಿಮಾ 300 ಕೋಟಿ ರೂ. ವೆಚ್ಚದಲ್ಲಿ ತಯಾರಾಗುತ್ತಿದೆ. ಶಾರುಖ್‌ ಖಾನ್‌ ಅವರು ತಮ್ಮ ಅಭಿಮಾನಿಗಳಿಗೆ ಖುಷಿ ಪಡಿಸಲೆಂದು ಹಣ ಖರ್ಚು ಮಾಡಲು ಹಿಂದೆ ಮುಂದೆ ನೋಡುವುದಿಲ್ಲ ಎನ್ನುವುದು ನಿರ್ಮಾಪಕರಿಗೆ ತಿಳಿದಿದೆ. ಹಾಗೆಯೇ ಅಟ್ಲೀ ಅವರು ಸಿನಿಮಾ ಕ್ಷೇತ್ರದಲ್ಲಿ ತುಂಬ ನಂಬಿಕಸ್ಥ ನಿರ್ದೇಶಕರು. ಅವರು ದೊಡ್ಡ ಆಕ್ಷನ್‌ ಥ್ರಿಲ್ಲರ್‌ ಸಿನಿಮಾ ನಟಿಸಲು ಹಣ ಖರ್ಚು ಮಾಡುತ್ತಿದ್ದಾರೆ” ಎಂದು ಸಿನಿಮಾ ತಂಡದವರು ಹೇಳಿಕೊಂಡಿದ್ದಾರೆ.
“ಶಾರುಖ್‌ ಖಾನ್‌ ಮತ್ತು ಜವಾನ್‌ ಸಿನಿಮಾದ ನಿರ್ದೇಶಕರಿಗೆ ಈ ಸಿನಿಮಾವನ್ನು ಭಾರತದ ಅತಿ ದೊಡ್ಡ ಆಕ್ಷನ್‌ ಸಿನಿಮಾವಾಗಿ ಮಾಡಬೇಕೆಂದು ಮೊದಲೇ ಯೋಜನೆಯಿತ್ತು. ಪಠಾಣ್‌ ಸಿನಿಮಾ ಭಾರತೀಯ ಸಿನಿ ರಂಗದಲ್ಲಿ ದೊಡ್ಡದೊಂದು ಅಲೆ ಸೃಷ್ಟಿಸಲಿದೆ ಎನ್ನುವುದು ಶಾರುಖ್‌ ಅವರಿಗೆ ತಿಳಿದಿತ್ತು. ಅದಕ್ಕಾಗಿಯೇ ಅವರು ʼಜವಾನ್‌ʼ ಸಿನಿಮಾವನ್ನು ಅದಕ್ಕಿಂತಲೂ ಉತ್ತಮವಾಗಿ ಮಾಡಲು ಬಯಸಿದ್ದರು. ʼಪಠಾಣ್‌ʼ ಸಿನಿಮಾದಲ್ಲಿ ಆಕ್ಷನ್‌ ದೃಶ್ಯಗಳನ್ನು ಗ್ರೀನ್‌ ಸ್ಕ್ರೀನ್‌ನಲ್ಲಿ ಚಿತ್ರೀಕರಿಸಲಾಗಿತ್ತು. ಆದರೆ ಜವಾನ್‌ನಲ್ಲಿ ಹಾಗಿಲ್ಲ. ಆಕ್ಷನ್‌ ಸಿನಿಮಾಗಳನ್ನು ದೊಡ್ಡ ದೊಡ್ಡ ಸೆಟ್‌ಗಳಲ್ಲಿ ಚಿತ್ರೀಕರಿಸಲಾಗುತ್ತಿದೆ. ಸಿನಿಮಾದ ಚಿತ್ರೀಕರಣದ ವೇಳೆ ಕೆಲವು ವಿಳಂಬಗಳಾದವು. ಹಾಗೆಯೇ ಕೆಲವು ದೃಶ್ಯಗಳನ್ನು ಮರುಚಿತ್ರೀಕರಣ ಮಾಡಬೇಕಾಗಿ ಬಂದಿತು. ಹಾಗಾಗಿ ವೆಚ್ಚ ಇನ್ನಷ್ಟು ಹೆಚ್ಚಿತು” ಎಂದು ಅವರು ಮಾಹಿತಿ ಕೊಟ್ಟಿದ್ದಾರೆ.
ಇದನ್ನೂ ಓದಿ: Viral Video : ಮೆಟ್ರೋದಲ್ಲಿ ಸೀಟಿಗಲ್ಲ, ನಿಲ್ಲುವ ಜಾಗಕ್ಕಾಗಿಯೇ ಮಹಿಳೆಯರ ಮಾರಾಮಾರಿ!
ʼಪಠಾಣ್‌ʼ ಸಿನಿಮಾಗೆ ಮೊದಲೂ ಶಾರುಖ್‌ ಖಾನ್‌ ಅವರು ಕೆಲವು ಬಿಗ್‌ ಬಜೆಟ್‌ ಸಿನಿಮಾಗಳಲ್ಲಿ ನಟಿಸಿದ್ದರು. ಅವರ ʼಜೀರೋʼ ಸಿನಿಮಾವನ್ನು 200 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಿಸಲಾಗಿತ್ತು. ಹಾಗೆಯೇ ಅವರ ʼದಿಲ್‌ವಾಲೆʼ ಸಿನಿಮಾವನ್ನು 135 ಕೋಟಿ ರೂ. ವೆಚ್ಚ, Ra.One ಸಿನಿಮಾವನ್ನು 130 ಕೋಟಿ ರೂ, ʼಫ್ಯಾನ್‌ʼ ಸಿನಿಮಾವನ್ನು 120 ಕೋಟಿ ರೂ, ʼಹ್ಯಾಪಿ ನ್ಯೂ ಇಯರ್‌ʼ ಸಿನಿಮಾವನ್ನು 150 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಿಸಲಾಗಿತ್ತು.
ʼಜವಾನ್‌ʼ ಸಿನಿಮಾದಲ್ಲಿ ಶಾರುಖ್‌ ಖಾನ್‌ ಅವರ ಜತೆ ನಯನತಾರಾ, ವಿಜಯ್‌ ಸೇತುಪತಿ ಸೇರಿದಂತೆ ಅನೇಕರು ನಟಿಸುತ್ತಿದ್ದಾರೆ. ಕನ್ನಡದಲ್ಲೂ ಬಿಡುಗಡೆಯಾಗುತ್ತಿರುವ ಈ ಸಿನಿಮಾ ಸೆಪ್ಟೆಂಬರ್‌ 7ರಂದು ತೆರೆ ಕಾಣಲಿದೆ.