ಜ್ಯೂನಿಯರ್ ಎನ್ಟಿಆರ್ ಅವರ ಮುಂದಿನ ಪ್ಯಾನ್ ಇಂಡಿಯಾ ಸಿನಿಮಾದ ಅಧಿಕೃತ ಶೀರ್ಷಿಕೆ ಮತ್ತು ಅದರ ಮೊದಲ ಲುಕ್ನ ಪೋಸ್ಟರ್ ಶುಕ್ರವಾರ ಬಿಡುಗಡೆಯಾಗಿದೆ. ಇಂದು ಮೇ 20, ಜ್ಯೂನಿಯರ್ ಎನ್ಟಿಆರ್ 40ನೇ ವರ್ಷದ ಹುಟ್ಟುಹಬ್ಬ (NTR Birthday) ಆಚರಿಸಿಕೊಳ್ಳುತ್ತಿದ್ದಾರೆ. ಅವರ ಬರ್ತ್ ಡೇ ನಿಮಿತ್ತ ಈ ಫಸ್ಟ್ ಲುಕ್ ಪೋಸ್ಟರ್ನ್ನು ಮೇ 19ರ ರಾತ್ರಿ ಬಿಡುಗಡೆ ಮಾಡಲಾಗಿದೆ. ಇನ್ನು ಸಿನಿಮಾಕ್ಕೆ ಎನ್ಟಿಆರ್ 30 ಎಂದು ತಾತ್ಕಾಲಿಕವಾಗಿ ಒಂದು ಶೀರ್ಷಿಕೆಯನ್ನಿಟ್ಟುಕೊಂಡು, ಇಷ್ಟು ದಿನ ಚಿತ್ರೀಕರಣ ಮಾಡಲಾಗುತ್ತಿತ್ತು. ಅದಕ್ಕೀಗ ‘ದೇವರಾ’ (Devara Movie)ಎಂದು ಅಧಿಕೃತ ಟೈಟಲ್ ಕೊಡಲಾಗಿದೆ.
ಜ್ಯೂನಿಯರ್ ಎನ್ಟಿಆರ್ ದೇವರಾ ಸಿನಿಮಾದ ಮೊದಲ ಲುಕ್ನ ಪೋಸ್ಟರ್ ನೋಡಿದ ಅಭಿಮಾನಿಗಳು ಸಖತ್ ಖುಷಿಪಟ್ಟಿದ್ದಾರೆ. ಇದರಲ್ಲಿ ಜ್ಯೂ.ಎನ್ಟಿಆರ್ ಅವರು ಅತ್ಯಂತ ರಗಡ್ ಲುಕ್ನಲ್ಲಿ ಕಾಣಿಸಿಕೊಂಡಿದ್ದಾರೆ. ಕಪ್ಪುಲುಂಗಿ-ಅದೇ ಬಣ್ಣದ ಶರ್ಟ್. ಕೆದರಿದ ಕೂದಲು, ಮುಖದಲ್ಲಿ ಕ್ರೋಧ ತುಂಬಿಕೊಂಡು, ಎಡಗೈಯಲ್ಲಿ ರಕ್ತಸಿಕ್ತವಾದ ಈಟಿಯಂಥ ಆಯುಧ ಹಿಡಿದು, ಕಲ್ಲಿನ ಮೇಲೆ ಬಲಗಾಲನ್ನು ಇಟ್ಟು ನಿಂತಿದ್ದಾರೆ. ಅಲ್ಲಿ ಮೋಡಗಳು ಆವರಿಸಿದೆ. ನೀರೂ ಇದೆ. ಒಟ್ಟಾರೆ ಈ ಪೋಸ್ಟರ್ ನೋಡಿದರೆ ಜ್ಯೂನಿಯರ್ ಎನ್ಟಿಆರ್ ಪಾತ್ರದ ಬಗ್ಗೆ ಸಖತ್ ಕುತೂಹಲ ಮೂಡುತ್ತಿದೆ. ಇದೊಂದು ಪಕ್ಕಾ ಆ್ಯಕ್ಷನ್ ಚಿತ್ರದಂತೆ ಕಾಣಿಸುತ್ತಿದೆ. ಈ ಸಿನಿಮಾ 2024ರ ಏಪ್ರಿಲ್ 5ರಂದು ತೆಲುಗು, ತಮಿಳು, ಹಿಂದಿ, ಕನ್ನಡ ಮತ್ತು ಮಲಯಾಳಂಗಳಲ್ಲಿ ಬಿಡುಗಡೆಯಾಗಲಿದೆ.
ಜ್ಯೂ.ಎನ್ಟಿಆರ್ ಅಭಿನಯದ ಈ ದೇವರಾ ಸಿನಿಮಾವನ್ನು ಕೊರಟಾಲ ಶಿವ ಅವರು ನಿರ್ದೇಶನ ಮಾಡಿದ್ದಾರೆ. 2016ರಲ್ಲಿ ಇವರು ಜನತಾ ಗ್ಯಾರೇಜ್ ಎಂಬ ಸಿನಿಮಾವನ್ನು ನಿರ್ದೇಶಿಸಿದ್ದರು. ಅದರಲ್ಲಿ ಕೂಡ ಜ್ಯೂನಿಯರ್ ಎನ್ಟಿಆರ್ ನಾಯಕನಾಗಿದ್ದರು. ಅದಾದ ಮೇಲೆ ಕೊರಟಾಲ ಶಿವ ಅವರೊಟ್ಟಿಗೆ ಜ್ಯೂ.ಎನ್ಟಿಆರ್ ಯಾವುದೇ ಸಿನಿಮಾವನ್ನೂ ಮಾಡಿರಲಿಲ್ಲ. ಇದೀಗ ‘ದೇವರಾ’ ಮೂಲಕ ಒಂದಾಗಿದ್ದಾರೆ. ಇನ್ನು ದೇವರಾ ಸಿನಿಮಾದಲ್ಲಿ ಜ್ಯೂನಿಯರ್ ಎನ್ಟಿಆರ್ ದ್ವಿಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎಂಬ ವದಂತಿಯೂ ಇದೆ. ಅಪ್ಪ-ಮಗ ಎರಡೂ ಪಾತ್ರದಲ್ಲಿ ಇವರೇ ಅಭಿನಯ ಮಾಡಲಿದ್ದಾರಂತೆ.
ಈಗಾಗಲೇ ಇದಕ್ಕೆ ಎನ್ಟಿಆರ್ 30 ಎಂದು ಹೆಸರಿಟ್ಟುಕೊಂಡು ಶೂಟಿಂಗ್ ಮಾಡಲಾಗುತ್ತಿದೆ. ಇಂದು ಜ್ಯೂನಿಯರ್ ಎನ್ಟಿಆರ್ ಬರ್ತ್ ಡೇ ಹಿನ್ನೆಲೆಯಲ್ಲಿ ಇಂದು ಮತ್ತೊಂದು ಪೋಸ್ಟರ್ ಹೊರಬರುವ ಸಾಧ್ಯತೆಯೂ ದಟ್ಟವಾಗಿದೆ. ಕೆಲ ದಿನಗಳ ಹಿಂದೆ ಹಿಂದಿ ನಟ ಸೈಫ್ ಅಲಿ ಖಾನ್ ಅವರು ದೇವರಾ ಸಿನಿಮಾ ಸೆಟ್ಗೆ ಭೇಟಿ ಕೊಟ್ಟಿದ್ದರು. ಅದರ ಫೋಟೋಗಳೂ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದ್ದವು.
ಸೈಫ್ ಅಲಿಖಾನ್ ಭೇಟಿ ನೀಡಿದ್ದ ಕ್ಷಣ