ಮುಂಬಯಿ: ಬಾಲಿವುಡ್ ನಟಿ ಕಂಗನಾ ರಣಾವತ್ (Kangana Ranaut) ಹಾಗೂ ವಿವಾದಗಳಿಗೆ ಬಿಡದ ನಂಟು. ಅವರು ನೀಡುವ ಪ್ರತಿ ಹೇಳಿಕೆಯೂ ವಿದಾದಗಳಿಗೆ ಈಡಾಗುತ್ತವೆ. ಇದೀಗ ಅವರು ಹಾಕಿರುವ ಇನ್ಸ್ಟಾಗ್ರಾಮ್ ಪೋಸ್ಟ್ ಒಂದು ಮತ್ತೊಮ್ಮೆ ವಿವಾದ ಸೃಷ್ಟಿಸಿದೆ. ಆದರಲ್ಲಿ ಅವರು ಬಾಲಿವುಡ್ನಲ್ಲಿ ಸಕ್ರಿಯರಾಗಿರುವ ದಂಪತಿ ಬಗ್ಗೆ ಕಿಡಿ ಕಾರಿದ್ದಾರೆ. ಆದರೆ ಅವರ ಹೆಸರನ್ನು ಉಲ್ಲೇಖಿಸಿಲ್ಲ. ಹೀಗಾಗಿ ಅವರು ಯಾರನ್ನು ಬೈದು ಪೋಸ್ಟ್ ಹಾಕಿದ್ದಾರೆ ಎಂಬ ಅನುಮಾನ ಶುರುವಾಗಿದೆ.
ಬಾಲಿವುಡ್ನ ಕ್ಯಾಸನೋವಾ (asanova) ಹಾಗೂ ಅವರ ಪತ್ನಿ ನನ್ನ ವಿರುದ್ಧ ಬೇಹುಗಾರಿಕೆ ನಡೆಸುತ್ತಿದ್ದಾರೆ. ನನ್ನ ವೈಯಕ್ತಿಕ ಸಂಗತಿಗಳನ್ನು ತಿಳಿದುಕೊಂಡು ಫೋಟೊಗಳನ್ನು ತೆಗೆಯುತ್ತಿದ್ದಾರೆ ಎಂಬುದಾಗಿ ಅವರು ಬರೆದುಕೊಂಡಿದ್ದಾರೆ. ಹೀಗಾಗಿ ಅವರನ್ನು ಕಾಡುತ್ತಿರುವ ಕ್ಯಾಸನೋವಾ ಮತ್ತು ಆತನ ಪತ್ನಿ ಯಾರೆಂಬ ಬಗ್ಗೆ ಚರ್ಚೆ ನಡೆಯುತ್ತಿದೆ.
ಬಾಲಿವುಡ್ ನಟ ರಣಬೀರ್ ಕಪೂರ್ ಹಾಗೂ ಪತ್ನಿ ಅಲಿಯಾ ಭಟ್ ಉದ್ದೇಶಿಸಿ ಕಂಗನಾ ಈ ಸಂದೇಶ ಹಾಕಿದ್ದಾರೆ ಎಂದ ಹೇಳಲಾಗುತ್ತಿದೆ. ಈ ಹಿಂದೆಯೂ ಅವರಿಬ್ಬರ ಬಗ್ಗೆ ಅಲಿಯಾ ನೇರವಾಗಿ ಆರೋಪ ಮಾಡಿದ್ದರು. ಕಂಗನಾ ತಮ್ಮ ಸಂದೇಶದಲ್ಲಿ ನೆಪೋಟಿಸಮ್ (ಸ್ವಜನಪಕ್ಷಪಾತ) ಎಂಬ ಆರೋಪವನ್ನೂ ಮಾಡಿದ್ದಾರೆ. ನನ್ನ ವಿರುದ್ಧ ಬೇಹುಗಾರರನ್ನು ಬಿಟ್ಟವರು ಬಾಲಿವುಡ್ ನೆಪೋಟಿಸಮ್ ಕ್ಲಬ್ನ ಉಪಾಧ್ಯಕ್ಷ ಎಂಬುದಾಗಿಯೂ ಆರೋಪಿಸಿದ್ದಾರೆ.
ಕಂಗನಾ ಆರೋಪವೇನು?
ನನ್ನ ವಿರುದ್ಧ ಬಾಲಿವುಡ್ನ ನೆಪೋಟಿಸಮ್ನ ಕ್ಯಾಸನೋವಾ ಹಾಗೂ ಆತನ ಪತ್ನಿ ಬೇಹುಗಾರಿಕೆ ಮಾಡುತ್ತಿದ್ದಾರೆ. ನಾನು ಹೋದಲೆಲ್ಲ ಬೆನ್ನ ಹಿಂದೆ ಬರುತ್ತಿದ್ದಾರೆ. ದಾರಿಯಲ್ಲಿ ಹೋಗುವಾಗ ಮಾತ್ರವಲ್ಲ ನಮ್ಮ ಮನೆಯ ಸುತ್ತಲೂ ಸುಳಿದಾಡುತ್ತಿದ್ದಾರೆ. ಪಾರ್ಕಿಂಗ್ ಮತ್ತು ಟೆರೇಸ್ ಕಡೆಗೆ ಜೂಮ್ ಲೆನ್ಸ್ ಇಟ್ಟುಕೊಂಡು ನೋಡುತ್ತಿದ್ದಾರೆ. ಬೆಳಗ್ಗೆ 6.30ಕ್ಕೆ ಬಂದು ನನ್ನ ಫೋಟೊ ತೆಗೆದಿದ್ದಾರೆ. ನನ್ನ ದಿನಚರಿ ಅವರಿಗೆ ಗೊತ್ತಾಗಿದ್ದು ಹೇಗೆ? ಅವರು ಚಿತ್ರವನ್ನು ತೆಗೆದುಕೊಂಡು ಮಾಡುವುದಾದರೂ ಏನು? ಈಗಷ್ಟೇ ನಾನು ನನ್ನ ಬೆಳಗ್ಗಿನ ಅವಧಿಯ ಕೊರಿಯೊಗ್ರಾಫ್ ಅಭ್ಯಾಸ ಮುಗಿಸಿದೆ. ಅಷ್ಟರಲ್ಲೇ ಹಲವಾರು ಫೋಟಗ್ರಾಫರ್ಗಳು ಬಂದಿದ್ದಾರೆ.
ನನ್ನ ವೃತ್ತಿಪರ ಡೀಲ್ಗಳ ಕುರಿತ ವಾಟ್ಸ್ಆ್ಯಪ್ ಮಾಹಿತಿಗಳನ್ನು ಕದಿಯಲಾಗಿದೆ ಹಾಗೂ ನನ್ನ ವೈಯಕ್ತಿಕ ವಿಚಾರಗಳನ್ನೂ ತಿಳಿದುಕೊಳ್ಳಲಾಗಿದೆ. ಇದನ್ನು ನನ್ನ ಮನೆ ಬಾಗಿಲಿಗೆ ಬಂದು ನನ್ನ ಮೇಲೆ ಒತ್ತಾಯ ಹೇರಿದ್ದ ನೆಪೋಟಿಸಮ್ ಮಾಫಿಯಾದ ಹೆಣ್ಣು ಬಾಕನೇ ಮಾಡಿದ್ದಾನೆ. ಆತ ಸ್ವಜನಪಕ್ಷಪಾತ ಮಾಫಿಯಾದ ಉಪಾಧ್ಯಕ್ಷ ಹಾಗೂ ತನ್ನ ಪತ್ನಿಗೆ ಮಹಿಳಾ ಕೇಂದ್ರಿತ ಸಿನಿಮಾಗಳನ್ನು ಮಾಡುವಂತೆ ಒತ್ತಾಯ ಮಾಡಿದವನಾದ್ದಾನೆ ಎಂದು ಕಂಗನಾ ಬರೆದಿದ್ದಾರೆ.
ಇದನ್ನೂ ಓದಿ : Kangana Ranaut : ಕಿಯಾರಾ-ಸಿದ್ಧಾರ್ಥ್ ಜೋಡಿ ಬಗ್ಗೆ ಇನ್ಸ್ಟಾಗ್ರಾಂ ಸ್ಟೋರಿ ಹಾಕಿದ ಕಂಗನಾ ರಣಾವತ್
ನನ್ನ ಮೇಲಿನ ಬೇಹುಗಾರಿಕೆ ವಿಚಾರ ಆತನ ಪತ್ನಿಗೂ ಗೊತ್ತಿದೆ. ಆಕೆಯ ಸಹಕಾರವೂ ಇದೆ. ನಾನು ನನ್ನ ಸಹೋದರ ಮದುವೆಯಲ್ಲಿ ಉಟ್ಟಿರುವಂಥ ಸೀರೆಯನ್ನು ಆಕೆ ತೊಟ್ಟಿದ್ದಾಳೆ. ನನ್ನ ಮನೆಯಂಥದ್ದೇ ಇಂಟೀರಿಯರ್ ಮಾಡಿದ್ದಾರೆ. ನನ್ನ ಸ್ಟೈಲಿಸ್ಟ್ಗಳನ್ನು ಬಳಸಿಕೊಂಡಿದ್ದಾರೆ. ಎಲ್ಲ ರೀತಿಯಲ್ಲಿ ನನಗೆ ಮಾನಸಿಕ ಹಿಂಸೆ ಕೊಡುತ್ತಿದ್ದಾಳೆ ಎಂದು ಬರೆದುಕೊಂಡಿದ್ದಾರೆ.