ಬೆಂಗಳೂರು: ಹಬ್ಬ ಬಂತೆಂದರೆ ಸಾಕು ಸ್ಯಾಂಡಲ್‌ವುಡ್‌ (Sandalwood)ನಲ್ಲಿ ಚಟುವಟಿಕೆ ಗರಿಗೆದರುತ್ತವೆ. ಹೊಸ ಸಿನಿಮಾ (Kannada New Movie) ಘೋಷಣೆ, ಪೋಸ್ಟರ್ ರಿಲೀಸ್‌, ಚಿತ್ರದ ಮುಹೂರ್ತ, ಬಿಡುಗಡೆ ಹೀಗೆ ಸ್ಯಾಂಡಲ್‌ವುಡ್‌ ಮಂದಿ ಸಾಕಷ್ಟು ಬ್ಯುಸಿಯಾಗಿರುತ್ತಾರೆ. ಅದರಂತೆ ಈ ಯುಗಾದಿಯಂದು ಹಲವು ಹೊಸ ಕನ್ನಡ ಚಿತ್ರಗಳು ತಮ್ಮ ಪೋಸ್ಟರ್‌ಗಳನ್ನು ಬಿಡುಗಡೆ ಮಾಡಿವೆ. ಆ ಪೈಕಿ ವಿಜಯ ರಾಘವೇಂದ್ರ (Vijay Raghavendra) ಅವರ ʼರಿಪ್ಪನ್ ಸ್ವಾಮಿʼ (Rippen Swaamy) ಚಿತ್ರವೂ ಒಂದು.
ಪಂಚಾಂನನ ಫಿಲಂಸ್ ನಿರ್ಮಾಣದ, ಕಿಶೋರ್ ಮೂಡುಬಿದ್ರೆ ನಿರ್ದೇಶನದ ʼರಿಪ್ಪನ್ ಸ್ವಾಮಿʼ ಕನ್ನಡ ಸಿನಿಮಾದ ʼರಕ್ತಸಿಕ್ತʼ ಫಸ್ಟ್‌ ಲುಕ್ ಪೋಸ್ಟರ್ ಗಮನ ಸೆಳೆಯುತ್ತಿದೆ. ವಿಜಯ ರಾಘವೇಂದ್ರ ನಾಯಕನಾಗಿ ಹೊಸ ರೀತಿಯ ಪಾತ್ರದಲ್ಲಿ ಮಿಂಚಿದ್ದಾರೆ.
ಈ ಸಿನಿಮಾವನ್ನು ಈ ಹಿಂದೆ ʼಮಾಲ್ಗುಡಿ ಡೇಸ್ʼ ಚಿತ್ರಕ್ಕೆ ಆ್ಯಕ್ಷನ್‌ ಕಟ್‌ ಹೇಳಿದ್ದ ಕಿಶೋರ್ ಮೂಡಬಿದ್ರೆ ನಿರ್ದೇಶಿಸಿದ್ದಾರೆ. ರಚನೆಯೂ ಅವರದ್ದೆ. ವಿಶೇಷ ಎಂದರೆ ʼಮಾಲ್ಗುಡಿ ಡೇಸ್ʼ ಸಿನಿಮಾದಲ್ಲಿ ವಿಜಯ ರಾಘವೇಂದ್ರ ನಾಯಕನಾಗಿದ್ದರು. ಹೀಗಾಗಿ ಈ ಜೋಡಿ ಮತ್ತೆ ಒಂದಾಗುತ್ತಿರುವುದು ನಿರೀಕ್ಷೆ ಮೂಡಿಸಿದೆ. ಇನ್ನು ಮುಖ್ಯ ಪಾತ್ರಗಳಲ್ಲಿ ಅಶ್ವಿನಿ ಚಂದ್ರಶೇಖರ್, ಪ್ರಕಾಶ್ ತುಮ್ಮಿ ನಾಡು, ವಜ್ರದೀರ್ ಜೈನ್, ಯಮುನಾ ಶ್ರೀನಿಧಿ, ಮೋಹನ್ ಶೇಣಿ, ಕೃಷ್ಣಮೂರ್ತಿ ಕವತ್ತಾರ್ ಮುಂತಾದವರು ನಟಿಸಿದ್ದಾರೆ.
ಇದನ್ನೂ ಓದಿ: Kannada Movie Posters: ಯುಗಾದಿಗೆ ಬಂತು ಚಂದನವನದಿಂದ ಬಿಗ್‌ ಅಪ್‌ಡೇಟ್‌; ‘ಕ’ ಅಕ್ಷರವೇ ಪ್ರಮುಖ ಹೈಲೈಟ್‌!
ಇನ್ನು ಸಿನಿಮಾದ ಚಿತ್ರೀಕರಣ ಪೂರ್ಣಗೊಂಡಿದೆ. 48 ದಿನಗಳ ಕೊಪ್ಪ, ಕಳಸ, ಬಾಳೆಹೊನ್ನೂರು ಸುತ್ತಮುತ್ತ ಶೂಟಿಂಗ್‌ ನಡೆಸಲಾಗಿದೆ. ಚಿತ್ರಕ್ಕೆ ಮಲಯಾಳಂನ ಸ್ಯಾಮ್ಯುವೆಲ್ ಅಭಿ ಸಂಗೀತವನ್ನು ನೀಡುತ್ತಿದ್ದಾರೆ. ರಂಗನಾಥ್ ಸಿ. ಎಂ. ಕ್ಯಾಮೆರಾ ಹಿಡಿದಿದ್ದಾರೆ. ಇನ್ನು ಈ ಸಿನಿಮಾವನ್ನು ಪಂಚಾಂನನ ಫಿಲಂಸ್ ಬ್ಯಾನರ್ ಅಡಿಯಲ್ಲಿ ಸಮಾನ ಮನಸ್ಕರು ಸೇರಿಕೊಂಡು ನಿರ್ಮಾಣ ಮಾಡುತ್ತಿದ್ದಾರೆ. ಪಂಚಾನನ ಫಿಲಂಸ್‌ನ ಮೊದಲನೇ ಸಿನಿಮಾ ಇದಾಗಿದೆ. ತನ್ನ ಎಲ್ಲ ಕೆಲಸವನ್ನು ಮುಗಿಸಿರುವ ʼರಿಪ್ಪನ್ ಸ್ವಾಮಿʼ ಸಿನಿಮಾ ಪೋಸ್ಟ್ ಪ್ರೊಡಕ್ಷನ್ ಹಂತದಲ್ಲಿದ್ದು, ಜೂನ್ ಅತವಾ ಜುಲೈ ಹೊತ್ತಿಗೆ ತೆರೆಗೆ ಬರಲು ಸಿದ್ಧವಾಗಿದೆ.
ಈ ಸಂಗತಿಯ ಕುರಿತು ನಿಮ್ಮ ಅನಿಸಿಕೆ ಏನು? ಕಾಮೆಂಟ್ ಮೂಲಕ ತಿಳಿಸಿ