ಬೆಂಗಳೂರು: ನಿನ್ನೆ ಮಧ್ಯರಾತ್ರಿ ಬೆಂಗಳೂರಿನ ನಂದಿ ಲಿಂಕ್‌ ಗ್ರೌಂಡ್ಸ್‌ನಲ್ಲಿ (Nandi link grounds) ಅದ್ಧೂರಿಯ ಜನ್ಮದಿನ ಆಚರಿಸಿಕೊಂಡ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ (Kichcha Sudeep Birthday) ಅವರ ಮನೆ ಮುಂದೆ ಇಂದು ಸಾವಿರಾರು ಅಭಿಮಾನಿಗಳು ಜಮಾಯಿಸಿ ನಟನಿಗೆ ಶುಭಾಶಯ ಹೇಳಿದರು.
ಕಿಚ್ಚನ ಅಭಿಮಾನಿಗಳಲ್ಲಿ ಸಂಭ್ರಮ ಮುಗಿಲು ಮುಟ್ಟಿದ್ದು, ನಿನ್ನೆ ರಾತ್ರಿಯಿಂದಲೇ ಸುದೀಪ್ ಮನೆ ಮುಂದೆ ಫ್ಯಾನ್ಸ್ ಜಮಾಯಿಸಿದ್ದರು. ಕಿಚ್ಚ ಕಿಚ್ಚ ಎಂದು ಘೋಷಣೆಗಳನ್ನು ಕೂಗುತ್ತ ಸಂಭ್ರಮಿಸಿದರು. ನಿನ್ನೆ ಮಧ್ಯರಾತ್ರಿ ಸಾವಿರಾರು ಅಭಿಮಾನಿಗಳ ಸಮ್ಮುಖದಲ್ಲಿ ಸುದೀಪ್ ಹುಟ್ಟುಹಬ್ಬ ಆಚರಿಸಿಕೊಂಡಿದ್ದರು. ಕರ್ನಾಟಕದ ರನ್ನನಿಗಾಗಿ ಸಾಲು ನಿಂತ ಫ್ಯಾನ್ಸ್ ಶುಭಾಶಯ ತಿಳಿಸಿದ್ದರು.
ಇಂದು ಮತ್ತೆ ಸಾವಿರಾರು ಅಭಿಮಾನಿಗಳು ರಾಜ್ಯದ ಮೂಲೆ ಮೂಲೆಯಿಂದ ಕಿಚ್ಚನ ನಿವಾಸಕ್ಕೆ ಆಗಮಿಸಿದ್ದು, ಬೆಳಗ್ಗೆಯಿಂದಲೇ ಬಾದ್‌ಷಾ ದರ್ಶನಕ್ಕಾಗಿ ಕಾದಿದ್ದರು. ಜೆಪಿ ನಗರದ ನಿವಾಸದ ಬಳಿ ಹೊರ ಬಂದ ಸುದೀಪ್, ಅಭಿಮಾನಿಗಳನ್ನು ಅಕ್ಕರೆಯಿಂದ ಮಾತನಾಡಿಸಿದರು. ನೂರಾರು ಮಹಿಳಾ ಅಭಿಮಾನಿಗಳೂ ಆಗಮಿಸಿದ್ದು, ಸುದೀಪ್ ಎಲ್ಲರಿಗೂ ಹಾಯ್‌ ಹೇಳಿದರು. ಸುದೀಪ್‌ಗೆ ಫ್ಯಾನ್ಸ್ ಫೋಟೋ ಸೇರಿದಂತೆ ಬಗೆಬಗೆಯ ಉಡುಗೊರೆ ಕೊಟ್ಟು ಶುಭ ಹಾರೈಸಿದರು.
ಅಭಿನಯ ಚಕ್ರವರ್ತಿ ಬರ್ತಡೇಗೆ ಆಗಮಿಸುತ್ತಿರುವ ಫ್ಯಾನ್ಸ್‌ಗೆ ಮಧ್ಯಾಹ್ನ ಊಟದ ವ್ಯವಸ್ಥೆ ಮಾಡಲಾಗಿದ್ದು, ಸುಮಾರು ನಾಲ್ಕರಿಂದ ಐದು ಸಾವಿರ ಅಭಿಮಾನಿಗಳಿಗೆ ಊಟದ ವ್ಯವಸ್ಥೆ ಮಾಡಲಾಗಿದೆ. ಅಭಿಮಾನಿಗಳಿಗಾಗಿ ಕೇಸರಿಬಾತ್ ಹಾಗೂ ರೈಸ್ ಬಾತ್ ಪ್ರಿಪೇರ್ ಮಾಡಿರುವ ಬಾಣಸಿಗರು. 15ರಿಂದ 20 ಜನ ಬಾಣಸಿಗರು ಅಡುಗೆಯಲ್ಲಿ ನಿರತರಾಗಿದ್ದಾರೆ.
ಜೆಪಿ ನಗರದ ಸುದೀಪ್ ನಿವಾಸದ ಮುಂದೆ ಅಭಿಮಾನಿ ಸಾಗರ ಕಿಕ್ಕಿರಿದು ತುಂಬಿದ್ದು, ಮನೆಯ ಮುಂಭಾಗದ ರಸ್ತೆಯಲ್ಲಿ ಸ್ಟೇಜ್ ಹಾಕಿ ಫ್ಯಾನ್ಸ್ ಮೀಟ್‌ ನಡೆಸಲಾಗಿದೆ. ಬ್ಯಾರಿಕೇಡ್ ಹಾಕಿ ಸರತಿ ಸಾಲಿನಲ್ಲಿ ಬಂದು ನೆಚ್ಚಿನ ನಟನಿಗೆ ಶುಭಾಶಯ ಕೋರಲು ಸುಸಜ್ಜಿತ ವ್ಯವಸ್ಥೆ ಮಾಡಲಾಗಿದೆ. ನೂಕು ನುಗ್ಗಲು ಆಗದಂತೆ ನೋಡಿಕೊಳ್ಳಲು ಪೊಲೀಸ್ ಪಡೆ ನಿಯೋಜನೆಯಾಗಿದೆ.
ಇದನ್ನೂ ಓದಿ: Kichcha Sudeep: K46 ಸಿನಿಮಾ ಕ್ಲೈಮ್ಯಾಕ್ಸ್‌ಗೆ ಜಬರ್ದಸ್ತ್ ಬಾಡಿ ಬೆಳೆಸಿದ ಸುದೀಪ್; ಕಿಚ್ಚನ ಲುಕ್‌ಗೆ ಫ್ಯಾನ್ಸ್ ಫಿದಾ