ಮುಂಬಯಿ: ಬಾಲಿವುಡ್ ನಟ ಸಲ್ಮಾನ್ ಖಾನ್ ಡಿಸೆಂಬರ್ 27ರಂದು 57ನೇ ವರ್ಷದ ಹುಟ್ಟುಹಬ್ಬವನ್ನು ಆಚರಿಸಿಕೊಂಡಿದ್ದಾರೆ. ನೆಚ್ಚಿನ ನಟನ ಜನ್ಮದಿನಕ್ಕೆ ವಿಶ್ ಮಾಡಲು ಅವರ ಮನೆ ಬಳಿ ಅಪಾರ ಸಂಖ್ಯೆಯಲ್ಲಿ ಅಭಿಮಾನಿಗಳು ನೆರೆದಿದ್ದರು. ಅನೇಕರು ಕೈಯಲ್ಲಿ ದೊಡ್ಡದೊಡ್ಡ ಪೋಸ್ಟರ್ಗಳು, ಬ್ಯಾನರ್ಗಳನ್ನು ಹಿಡಿದು, ಸಲ್ಮಾನ್ ಖಾನ್ಗೆ ಘೋಷಣೆಗಳನ್ನು ಕೂಗುತ್ತ ಮೆರವಣಿಗೆಯಲ್ಲಿ ಆಗಮಿಸಿದ್ದರು. ಯಾವಾಗ ಸಲ್ಮಾನ್ ಖಾನ್ ಅವರು ತಮ್ಮ ಮನೆಯ ಬಾಲ್ಕನಿಯಲ್ಲಿ ನಿಂತು, ತಮ್ಮ ಅಭಿಮಾನಿಗಳತ್ತ ಪ್ರೀತಿಯಿಂದ ಕೈಬೀಸಿದರೋ, ಆಗಂತೂ ಫ್ಯಾನ್ಸ್ ಹುಚ್ಚೆದ್ದವರಂತೆ ವರ್ತನೆ ಮಾಡಿದ್ದಾರೆ. ಅವರ ಗಲಾಟೆ, ಮುನ್ನುಗ್ಗುವಿಕೆಯನ್ನು ನಿಯಂತ್ರಣ ಮಾಡಲು ಪೊಲೀಸರಿಗೆ ಸಾಧ್ಯವಾಗದೆ, ಲಘು ಲಾಠಿಚಾರ್ಜ್ ಮಾಡಿದ್ದಾರೆ. ಸಲ್ಮಾನ್ ಖಾನ್ ಅಭಿಮಾನಿಗಳ ಮೇಲೆ ಪೊಲೀಸರು ಲಾಠಿ ಚಾರ್ಜ್ ಮಾಡಿದ ವಿಡಿಯೊ ವೈರಲ್ ಆಗಿದೆ.
ಸಲ್ಮಾನ್ ಖಾನ್ ಬರ್ತ್ ಡೇ ಅವರ ಮನೆಯಲ್ಲಿ ಅದ್ದೂರಿಯಾಗಿ ನಡೆದಿದೆ. ನಟ ಶಾರುಖ್ ಖಾನ್, ಸಂಗೀತಾ ಬಿಜಲಾನಿ, ಕಾರ್ತಿಕ್ ಆರ್ಯನ್, ಟಬು, ಸುನೀಲ್ ಶೆಟ್ಟಿ, ರಿತೇಶ್ ಮತ್ತು ಜೆನಿಲಿಯಾ, ಸೋನಾಕ್ಷಿ ಸಿನ್ಹಾ ಸೇರಿ ಹಲವು ಗಣ್ಯರು ಸಲ್ಮಾನ್ ಮನೆಗೆ ಭೇಟಿ ಕೊಟ್ಟು ಅವರಿಗೆ ವಿಶ್ ಮಾಡಿದ್ದಾರೆ. ಅವರ ಮನೆಯಲ್ಲಿ ಸಂಭ್ರಮ ಮನೆ ಮಾಡಿತ್ತು. ಹಾಗೇ ಅಭಿಮಾನಿಗಳೂ ಅವರ ಮನೆಯೆದುರು ಸೇರಿದ್ದರು. ತಿಳಿನೀಲಿ ಬಣ್ಣದ ಟಿ ಶರ್ಟ್ ಧರಿಸಿ, ತಮ್ಮ ಸಲೀಂ ಖಾನ್ ಮತ್ತು ಬಾಡಿಗಾರ್ಡ್ಗಳ ಜತೆ ಬಾಲ್ಕನಿಗೆ ಬಂದ ಸಲ್ಮಾನ್ ಖಾನ್ ಅಭಿಮಾನಿಗಳತ್ತ ಕೈಬೀಸಿದರು. ಅವರು ಒಂದು ನಿಮಿಷ ಕೂಡ ಅಲ್ಲಿ ನಿಂತಿಲ್ಲ. ಅಭಿಮಾನಿಗಳ ಉತ್ಸಾಹ ಇಮ್ಮಡಿಯಾಗಲು ಅಷ್ಟೇ ಸಾಕಿತ್ತು. ಪರಿಸ್ಥಿತಿ ಕೈಮೀರಿದಾಗ ಪೊಲೀಸರು ಲಾಠಿಚಾರ್ಜ್ ಮಾಡಿದ್ದಾರೆ. ಪೊಲೀಸರ ಹೊಡೆತ ತಾಳಲಾಗದೆ ಹಲವರು ಎದ್ದುಬಿದ್ದು ಓಡಿದ್ದಾರೆ. ಶೂಗಳನ್ನೆಲ್ಲ ಬಿಟ್ಟು ಆ ಜಾಗ ಖಾಲಿ ಮಾಡಿದ್ದಾರೆ.
ಇದನ್ನೂ ಓದಿ: Actor Prabhas | ಸಲ್ಮಾನ್ ಖಾನ್ ಮದುವೆ ಆದ ನಂತರ ನನ್ನ ಮದುವೆ ಎಂದ ನಟ ಪ್ರಭಾಸ್!