ಬೆಂಗಳೂರು: ಮಲಯಾಳಂ ಯುವ ನಟಿ ಲಕ್ಷ್ಮಿಕಾ ಸಜೀವನ್ (Lakshmika Sajeevan) ಹೃದಯಾಘಾತದಿಂದ ನಿಧನರಾಗಿದ್ದಾರೆ. ನಟಿಗೆ ಕೇವಲ 24 ವರ್ಷ ವಯಸ್ಸಾಗಿತ್ತು. ಅರಬ್‌ ರಾಷ್ಟ್ರ ಶಾರ್ಜಾದಲ್ಲಿ ಬ್ಯಾಂಕಿಂಗ್ ಕ್ಷೇತ್ರದಲ್ಲಿ ಉದ್ಯೋಗ ಮಾಡುತ್ತಿದ್ದ ಅವರು ಅಲ್ಲಿಯೇ ಹಠಾತ್ ಹೃದಯಾಘಾತಕ್ಕೀಡಾಗಿ ನಿಧನರಾಗಿದ್ದಾರೆ.
ಹಲವು ಸಿರೀಯಲ್‌ಗಳು ಹಾಗೂ ಸಿನಿಮಾಗಳಲ್ಲಿ ನಟಿಸುವ ಮೂಲಕ ಕೇರಳದಲ್ಲಿ ಮನೆ ಮಾತಾಗಿದ್ದರು ಲಕ್ಷ್ಮಿಕಾ ಸಜೀವನ್. ಅವರು ʻಕಾಕʼ ಸೀರಿಯಲ್‌ನ ಪಂಚಮಿ ಪಾತ್ರದಿಂದ ಸಾಕಷ್ಟು ಜನಪ್ರಿಯರಾಗಿದ್ದರು. ಸೀರಿಯಲ್ ಮಾತ್ರವಲ್ಲದೇ ಸಿನಿಮಾಗಳಲ್ಲಿಯೂ ಸೈ ಎನಿಸಿಕೊಂಡಿದ್ದರು. ಪಂಚವರ್ಣ ತತ್ತ , ಸೌದಿ ವೆಲ್ಲಕ್ಕ, ಪುಳಯಮ್ಮ, ಉಯಿರೆ ಸೇರಿ ಹಲವು ಮಲಯಾಳಂ ಸಿನಿಮಾಗಳಲ್ಲಿ ನಟಿಸಿದ್ದರು. ದುಲ್ಕರ್ ಸಲ್ಮಾನ್ ಅಭಿನಯದ “ಒರು ಯಮಂದನ್ ಪ್ರೇಮಕಥಾ” ಚಿತ್ರದಲ್ಲಿಯೂ ನಟಿ ಬಣ್ಣ ಹಚ್ಚಿದ್ದರು. ಪುಳ್ಯಮ್ಮದಲ್ಲಿ ದೇವಯಾನಿ ಟೀಚರ್ ಆಗಿ ಮೆಚ್ಚುಗೆ ಗಳಿಸಿದ್ದರು.
ʼಲವ್‌ ಸ್ಟೋರಿʼ ಖ್ಯಾತಿಯ ಹಾಲಿವುಡ್‌ ನಟ ರಿಯಾನ್‌ ಒ ನೀಲ್‌ ನಿಧನ
ಹಾಲಿವುಡ್‌ ನಟ, ʼಲವ್‌ ಸ್ಟೋರಿʼ, ʼಪೇಪರ್‌ ಮೂನ್‌ʼ ಚಿತ್ರಗಳ ಖ್ಯಾತಿಯ ರಿಯಾನ್‌ ಒ ನೀಲ್‌ (Ryan O’Neal) ನಿಧನ ಹೊಂದಿದ್ದಾರೆ. ಅವರಿಗೆ 82 ವರ್ಷ ವಯಸ್ಸಾಗಿತ್ತು. ಕ್ಯಾನ್ಸರ್‌ನಿಂದ ಬಳಲುತ್ತಿದ್ದ ಅವರು ಚಿಕಿತ್ಸೆ ಫಲಕಾರಿಯಾಗದೆ ಮರಣ ಹೊಂದಿದರು ಎಂದು ಮೂಲಗಳು ತಿಳಿಸಿವೆ.
ಇದನ್ನೂ ಓದಿ: Ryan O’Neal: ʼಲವ್‌ ಸ್ಟೋರಿʼ ಖ್ಯಾತಿಯ ಹಾಲಿವುಡ್‌ ನಟ ರಿಯಾನ್‌ ಒ ನೀಲ್‌ ನಿಧನ
1941ರಲ್ಲಿ ಲಾಸ್‌ ಏಂಜಲೀಸ್‌ನಲ್ಲಿ ಜನಿಸಿದ ರಿಯಾನ್‌ ಒ ನಿಲ್‌ ಆರಂಭದಲ್ಲಿ ಬಾಕ್ಸರ್‌ ಆಗಿದ್ದರು. 1960ರಲ್ಲಿ ಅವರು ನಟನಾ ಕ್ಷೇತ್ರಕ್ಕೆ ಕಾಲಿಟ್ಟರು. ʼದಿ ಮೆನಿ ಲವ್ಸ್‌ ಆಫ್‌ ಡೋಬಿ ಗಿಲ್ಲಿಸ್‌ʼ ಎನ್ನುವ ಟಿವಿ ಶೋ ಮೂಲಕ ರಿಯಾನ್‌ ಒ ನಿಲ್‌ ಬಣ್ಣದ ಪ್ರಪಂಚ ಪ್ರವೇಶಿಸಿದರು. 1969ರಲ್ಲಿ ತೆರೆಕಂಡ ʼದಿ ಬಿಗ್‌ ಬೌನ್ಸ್‌ʼ ರಿಯಾನ್‌ ಒ ನಿಲ್‌ ಅಭಿನಯಿಸಿದ ಮೊದಲ ಚಿತ್ರ.
1964ರ ಎಬಿಸಿ ಪ್ರೈಮ್‌ ಟೈಮ್‌ ಟೆಲಿವಿಷನ್‌ ಧಾರಾವಾಹಿ ʼಪೇಟನ್‌ ಪ್ಲೇಸ್‌ʼನಲ್ಲಿ ರಾಡ್ನಿ ಹ್ಯಾರಿಂಗ್ಟನ್‌ ಪಾತ್ರವನ್ನು ನಿರ್ವಹಿಸುವ ಮೂಲಕ ಜನಪ್ರಿಯರಾದರು. ಇನ್ನು 1970ರಲ್ಲಿ ತೆರೆಕಂಡ ರೊಮ್ಯಾಂಟಿಕ್‌ ಡ್ರಾಮಾ ʼಲವ್‌ ಸ್ಟೋರಿʼ ಚಿತ್ರದ ಮೂಲಕ ಪ್ರೇಕ್ಷಕರಿಗೆ ಇನ್ನಷ್ಟು ಹತ್ತಿರವಾದರು. ಎರಿಕ್‌ ಸೆಗಲ್‌ ಅವರ ಅದೇ ಶೀರ್ಷಿಕೆಯ ಕಾದಂಬರಿ ಆಧಾರಿತ ಈ ಚಿತ್ರ ಬಾಕ್ಸ್‌ ಆಫೀಸ್‌ನಲ್ಲಿ ಧೂಳೆಬ್ಬಿಸಿತ್ತು. 2015ರಲ್ಲಿ ಬಿಡುಗಡೆಯಾದ ʼಯೂನಿಟ್‌ʼ ಮತ್ತು ʼನೈಟ್‌ ಆಫ್‌ ಕಪ್ಸ್‌ʼ ರಿಯಾನ್‌ ಒ ನಿಲ್‌ ಅಭಿನಯಿಸಿದ ಕೊನೆಯ ಚಿತ್ರಗಳು. ರಿಯಾನ್‌ ಒ ನಿಲ್‌ ಆಸ್ಕರ್‌ ಪ್ರಶಸ್ತಿಗಾಗಿ ನಾಮ ನಿರ್ದೇಶನಗೊಂಡಿದ್ದರು. ಅವರು ನಾಲ್ವರು ಮಕ್ಕಳನ್ನು ಅಗಲಿದ್ದಾರೆ.