ಬೆಂಗಳೂರು: ಸಾಲ್ಟ್‌ ಅಂಡ್ ಪೆಪ್ಪರ್‌, ವೈರಸ್‌ ಮೊದಲಾದ ಸೂಕ್ಷ್ಮ ಸಂವೇದಿ ಚಿತ್ರಗಳ ಮೂಲಕ ಮಲಯಾಳಂ ಚಿತ್ರಲೋಕವನ್ನು ಹೊಸ ಎತ್ತರಕ್ಕೇರಿಸಿದ ನಿರ್ದೇಶಕ ಆಶಿಕ್‌ ಬಾಬು ತಮ್ಮ ಹೊಸ ಚಿತ್ರ ʻನೀಲವೆಳಿಚಂʼನ (Neelavelicham) ಫಸ್ಟ್‌ ಲುಕ್‌ ಬಿಡುಗಡೆ ಮಾಡಿದ್ದಾರೆ. ಜತೆಗೆ ಚಿತ್ರದ ನಾಯಕನಾಗಿರುವ ಟೊವಿನೊ ಥಾಮಸ್‌ ಅವರು ತಮ್ಮ ಇನ್‌ಸ್ಟಾ ಪೋಸ್ಟ್‌ನಲ್ಲಿ ಚಿತ್ರ ಡಿಸೆಂಬರ್‌ನಲ್ಲಿ ಬಿಡುಗಡೆಯಾಗಲಿದೆ ಎಂದಿದ್ದಾರೆ.
ಮಲಯಾಳಂನ ಹಿರಿಯ ಲೇಖಕ ವೈಕೋಮ್‌ ಮಹಮ್ಹದ್‌ ಬಶೀರ್‌ ಅವರ ಅತ್ಯಂತ ಪ್ರಸಿದ್ಧ ಕೃತಿ ʼನೀಲವೆಳಿಚಂʼ ಅನ್ನು ಅದೇ ಹೆಸರಿನಲ್ಲಿ ಚಿತ್ರವಾಗಿ ರೂಪಾಂತರಗೊಳಿಸುತ್ತಿರುವ ಹಿನ್ನೆಲೆಯಲ್ಲಿ ಚಿತ್ರದ ಬಗ್ಗೆ ಸಾಕಷ್ಟು ನಿರೀಕ್ಷೆಗಳಿವೆ.
ಇದನ್ನೂ ಓದಿ | ನಿಗೂಢ ಸ್ಥಿತಿಯಲ್ಲಿ ಶವವಾಗಿ ಪತ್ತೆಯಾದ ಮಲಯಾಳಂ ರೂಪದರ್ಶಿ
ವೈಕಂ ಬಶೀರ್‌ ಅವರ ಹಲವು ಕಥೆಗಳು ಸಿನಿಮಾ ಆಗಿವೆ. ಅವರ ಸಣ್ಣ ಕಥೆಯನ್ನು ಆಧರಿಸಿ ʼಭಾರ್ಗವಿ ನಿಲಯಂʼ ಎಂಬ ಚಿತ್ರ ನಿರ್ಮಾಣವಾಗಿತ್ತು. ಪ್ರೇಮ್ ನಜೀರ್, ಮಧು ಮತ್ತು ವಿಜಯ ನಿರ್ಮಲಾ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದರು. 1964ರಲ್ಲಿ ಬಿಡುಗಡೆಯಾದ ‘ಭಾರ್ಗವಿ ನಿಲಯಂ’ ಮೊದಲ ಮಲಯಾಳಂ ಹಾರರ್‌ ಚಿತ್ರ ಎಂದು ಪರಿಗಣಿಸಲಾಗಿತ್ತು. ನೀಲವೆಳಿಚಂ ಕೂಡ ಇಂಥದೊಂದು ಹಾರರ್‌ ಕಾನ್ಸೆಪ್ಟನ್ನು ಹೊಂದಿದೆ. ಕಾಡಿನ ನಡುವೆ ಇರುವ ಒಂಟಿ ಮನೆಯಲ್ಲಿ ಸಣ್ಣ ವಯಸ್ಸಿಗೇ ಪ್ರಾಣ ಕಳೆದುಕೊಂಡ ಹೆಣ್ಮಗಳ ಆತ್ಮ ಸುತ್ತಾಡುತ್ತದೆ ಎಂಬ ಸುದ್ದಿ ಹರಡಿರುತ್ತದೆ. ಪ್ರೀತಿ ಮಾಡಿ ಮೋಸ ಹೋದ ಹೆಣ್ಮಗಳು ಆತ್ಮಹತ್ಯೆ ಮಾಡಿಕೊಂಡ ಬಳಿಕ ಆಕೆ ದೆವ್ವವಾಗಿದ್ದಾಳೆ ಎಂಬ ಕಥೆ ಎಲ್ಲರ ಬಾಯಲ್ಲೂ ಇತ್ತು. ಅಲ್ಲಿಗೆ ಯುವ ಕಥೆಗಾರ ಬಶೀರ್‌ ಬರುತ್ತಾರೆ. ಮುಂದೇನಾಗುತ್ತದೆ ಎನ್ನುವುದು ಕಥೆ ಮತ್ತು ಸಿನಿಮಾ! ಸಿನಿಮಾದ ಫಸ್ಟ್‌ ಲುಕ್‌ನಲ್ಲಿ ಒಬ್ಬ ವ್ಯಕ್ತಿ ಮನೆಯನ್ನು ಪ್ರವೇಶಿಸಿ ಕತ್ತಲೆ ತುಂಬಿದ ಪ್ರದೇಶದಲ್ಲಿ ಅತ್ತಿತ್ತ ನೋಡುತ್ತಿರುವ ದೃಶ್ಯವಿದೆ.
ʼನೀಲವೆಳಿಚಂʼ ಸಿನಿಮಾದಲ್ಲಿ ಪೃಥ್ವಿರಾಜ್‌ ಸುಕುಮಾರನ್‌, ಕುಂಚಾಕೊ ಬಾಬನ್‌ ಮತ್ತು ಸೌಬಿನ್‌ ಶಾಹಿರ್‌ ನಟಿಸುವುದಾಗಿ ಡಿಸೈಡ್‌ ಆಗಿತ್ತು. ಆದರೆ ಡೇಟ್‌ ಕ್ಲಾಶ್‌ ಆದ ಕಾರಣ, ಟೋವಿನೋ ಥಾಮಸ್‌, ರೋಷನ್‌ ಮ್ಯಾಥ್ಯೂ ಮತ್ತು ಶೈನ್‌ ಟಾಮ್‌ ಚಾಕೋ ಅವರು ನಟಿಸುತ್ತಿದ್ದಾರೆ.
ನಟಿ ರೀಮಾ ಕಲ್ಲಿಂಗಲ್ ಚಿತ್ರದಲ್ಲಿ ನಾಯಕಿಯಾಗಿ ನಟಿಸಿದ್ದಾರೆ. ನಿರ್ದೇಶಕ ಆಶಿಕ್‌ ಅಬು ಅವರ ಮೊದಲ ಹಾರರ್‌ ಫಿಲ್ಮ್‌ ಆಗಿದ್ದು, ʼʼನೀಲವೆಳಿಚಂ” ಪ್ರೇಕ್ಷಕರಲ್ಲಿ ಭಾರಿ ನಿರೀಕ್ಷೆಯನ್ನು ಹುಟ್ಟು ಹಾಕಿದೆ. ಚಿತ್ರ ಡಿಸೆಂಬರ್‌ ನಲ್ಲಿ ರಿಲೀಸ್‌ ಮಾಡುವುದಾಗಿ ಚಿತ್ರತಂಡ ಹೇಳಿಕೊಂಡಿದೆ. ಬರಹಗಾರ ಹೃಷಿಕೇಶ್ ಭಾಸ್ಕರನ್ ಚಿತ್ರಕಥೆಯನ್ನು ಬರೆದಿದ್ದಾರೆ.
ಇದನ್ನೂ ಓದಿ | Me Too ಆರೋಪ ಸುಳಿಯಲ್ಲಿ ಮಲಯಾಳಂ ನಟ ವಿಜಯ್‌ ಬಾಬು: ನಾನವನಲ್ಲ ಎಂದ ʼಶರಬತ್‌ ಶಮೀರ್‌ʼ