ಬೆಂಗಳೂರು: ಪ್ರಭಾಸ್‌ ನಟನೆಯ ಬಹುನಿರೀಕ್ಷಿತ ಸಿನಿಮಾ ಆದಿಪುರುಷ (Adipurush Movie) ಇಂದು ಬಿಡುಗಡೆಯಾಗಿದೆ. ರಾಮಾಯಣ ಕಥೆಯನ್ನೇ ಆಧರಿಸಿ ಮಾಡಿರುವ ಈ ಚಿತ್ರದಲ್ಲಿ ಪ್ರಭಾಸ್‌ ರಾಮನ ಪಾತ್ರದಲ್ಲಿ ಮಿಂಚಿದ್ದಾರೆ. ದೇಶದೆಲ್ಲೆಡೆ ಜನರು ಮುಗಿಬಿದ್ದು ಈ ಸಿನಿಮಾವನ್ನು ನೋಡುತ್ತಿದ್ದಾರೆ. ವಿಶೇಷವೆಂದರೆ ಮನುಷ್ಯರಷ್ಟೇ ಅಲ್ಲದೆ ಹನುಮಂತನ ರೂಪ ಎಂದು ಆರಾಧಿಸಲ್ಪಡುವ ಮಂಗ ಕೂಡ ಚಿತ್ರಮಂದಿರವೊಂದಕ್ಕೆ ನುಗ್ಗಿ ಸಿನಿಮಾ ನೋಡಿದೆ!
ಹೌದು. ಚಿತ್ರಮಂದಿರವೊಂದರಲ್ಲಿ ಮೇಲ್ಭಾಗದಲ್ಲಿರುವ ಕಿಟಕಿಗೆ ಮಂಗವೊಂದು ಬಂದು ಕುಳಿತಿದೆ. ತೆರೆ ಮೇಲೆ ಬರುತ್ತಿರುವ ರಾಮನ ಕಥೆಯನ್ನು ಮಂಗ ನೋಡಿದೆ. ಅದನ್ನು ಗಮನಿಸಿದ ಅಲ್ಲಿದ್ದ ಜನರು ಅದರತ್ತ ಬ್ಯಾಟರಿ ಬೆಳಕು ಚಲ್ಲಿದ್ದಾರೆ. ಮಂಗನ ಕಂಡೊಡನೆ ಅಲ್ಲಿದ್ದವರೆಲ್ಲರೂ ಭಕ್ತಿಯಿಂದ ಜೈ ಶ್ರೀ ರಾಮ ಎನ್ನುವ ಘೋಷಣೆಗಳನ್ನೂ ಕೂಗಿದ್ದಾರೆ. ಸಾಕ್ಷಾತ್‌ ಹನುಮಂತನೇ ಬಂದು ರಾಮನ ಕಥೆ ನೋಡಿ ಹೋಗಿದ್ದಾನೆ ಎಂದು ಹೇಳಲಾರಂಭಿಸಿದ್ದಾರೆ.
ಈ ದೃಶ್ಯವಿರುವ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಿದೆ. ಸಾಕಷ್ಟು ಜನರು ವಿಡಿಯೊ ಕಂಡು ಮೆಚ್ಚುಗೆ ವ್ಯಕ್ತಪಡಿಸುತ್ತಿದ್ದಾರೆ. ವಿಡಿಯೊ ಎಲ್ಲೆಡೆ ವೈರಲ್‌ ಆಗಿದೆ ಕೂಡ.
ಆದಿಪುರುಷ ಚಿತ್ರವನ್ನು ಓಂ ರಾವುತ್ ನಿರ್ದೇಶಿಸಿದ್ದಾರೆ. ʼನ್ಹಾಜಿ- ದಿ ಅನ್‌ಸಂಗ್ ವಾರಿಯರ್ʼ ಸಿನಿಮಾದ ಅದ್ಭುತ ಯಶಸ್ಸಿನ ನಂತರ ಇದು ಓಂ ಅವರ ಎರಡನೇ ನಿರ್ದೇಶನದ ಚಿತ್ರವಾಗಿದೆ. ಆದಿಪುರುಷ ಸಿನಿಮಾ ಹಿಂದಿ, ತೆಲುಗು, ಕನ್ನಡ, ತಮಿಳು ಮತ್ತು ಮಲಯಾಳಂ ಭಾಷೆಯಲ್ಲಿ ಬಿಡುಗಡೆಯಾಗಿದೆ. ಈ ಸಿನಿಮಾದಲ್ಲಿ ಪ್ರಭಾಸ್‌ ರಾಮನ ಪಾತ್ರದಲ್ಲಿದ್ದರೆ, ಕೃತಿ ಸೀತೆಯ ಪಾತ್ರ ಹಾಗೂ ಸೈಫ್‌ ಅಲಿ ಖಾನ್‌ ರಾವಣನ ಪಾತ್ರದಲ್ಲಿ ನಟಿಸಿದ್ದಾರೆ.