ಬೆಂಗಳೂರು: ನಾಗ ಚೈತನ್ಯ (Naga Chaitanya) ಅವರೊಂದಿಗೆ ಟಾಲಿವುಡ್ ನಿರ್ದೇಶಕ ಪರಶುರಾಮ್ ಹೊಸ ಸಿನಿಮಾ ಮಾಡಲಿದ್ದಾರೆ ಎಂದು ಈ ಹಿಂದೆ ವರದಿಯಾಗಿತ್ತು. ಆದರೆ ನಿರ್ದೇಶಕರು ಮೊದಲು ಮಹೇಶ್ ಬಾಬು ಅವರೊಂದಿಗೆ ʻಸರ್ಕಾರು ವಾರಿ ಪಾಟʼ ಸಿನಿಮಾವನ್ನು ನಿರ್ದೇಶಿಸಲು ನಿರ್ಧರಿಸಿದರು. ಇದರಿಂದಾಗಿ ನಾಗಚೈತನ್ಯ ಅವರ ಯೋಜನೆ ವಿಳಂಬವಾಯಿತು. ಇದಾದ ನಂತರ ಹಲವು ಉಹಾಪೋಹಗಳು ಈ ಬಗ್ಗೆ ವರದಿಯಾಗಿವೆ. ನಾಗಚೈತನ್ಯ ಅವರಿಗೆ ಸ್ಕ್ರಿಪ್ಟ್‌ ಇಷ್ಟವಾಗದ ಕಾರಣ ಕೆಲವು ಬದಲಾವಣೆಗಳನ್ನು ಸೂಚಿಸಿದ್ದಾರೆ ಎಂತಲೂ ವರದಿ ಆಯಿತು. ಬಳಿಕ ಈ ಯೋಜನೆಯನ್ನು ನಾಗಚೈತನ್ಯ ಕೈ ಬಿಟ್ಟರು ಎನ್ನಲಾಗಿದೆ. ಇದೀಗ ಸಂದರ್ಶನದಲ್ಲಿ ʻನಿರ್ದೇಶಕ ಪರಶುರಾಮ್ ಬಗ್ಗೆ ಮಾತನಾಡುವುದು ಸಮಯ ವ್ಯರ್ಥʼ ಎಂದು ನಾಗಚೈತನ್ಯ ಖಡಕ್‌ ಆಗಿ ಹೇಳಿಕೆ ನೀಡಿದ್ದಾರೆ.
ಸಂದರ್ಶನದಲ್ಲಿ, ನಾಗಚೈತನ್ಯ ಅವರಿಗೆ ಪರಶುರಾಮ್ ಬಗ್ಗೆ ಕೇಳಿದಾಗ ಆಘಾತಕಾರಿ ಹೇಳಿಕೆಯನ್ನು ನೀಡಿದ್ದಾರೆ. ನಿರ್ದೇಶಕ ಪರಶುರಾಮ್ ಬಗ್ಗೆ ಕೇಳಿದ ತಕ್ಷಣ ನಾಗ ಚೈತನ್ಯ, “ನಿರ್ದೇಶಕ ಪರಶುರಾಮ್ ಬಗ್ಗೆ ಮಾತನಾಡುವುದು ಸಮಯ ವ್ಯರ್ಥ. ಅವರು ನನ್ನ ಸಮಯವನ್ನು ಹಾಳು ಮಾಡಿದರು. ನಾನು ಈ ವಿಷಯದ ಬಗ್ಗೆ ಮಾತನಾಡಲು ಇಷ್ಟಪಡುವುದಿಲ್ಲ ʼʼಎಂದು ನೇರವಾಗಿ ಉತ್ತರಿಸಿದ್ದಾರೆ.
ಹ್ಯಾಟ್ರಿಕ್‌ ಹಿಟ್‌ ಕಂಡ ನಾಗ ಚೈತನ್ಯ
2021ರಲ್ಲಿ ನಾಗ ಚೈತನ್ಯ ಅಭಿನಯದ ʻಲವ್‌ಸ್ಟೋರಿʼ ಸಿನಿಮಾ ಹಿಟ್‌ ಕಂಡಿತು. ಕಳೆದ ವರ್ಷ ತಂದೆ ನಾಗಾರ್ಜುನ ಜತೆ ʻಬಂಗಾರರಾಜುʼ ಸಿನಿಮಾ ಮಾಡಿದರು. ಇದು ಕೂಡ ಯಶಸ್ವಿ ಪ್ರದರ್ಶನ ಕಂಡಿತು. ಮಜಿಲಿ, ಲವ್ ಸ್ಟೋರಿ ಮತ್ತು ಬಂಗಾರರಾಜು ಬ್ಯಾಕ್-ಟು-ಬ್ಯಾಕ್ ಯಶಸ್ಸಿನೊಂದಿಗೆ ನಾಗ ಚೈತನ್ಯ ಗೆದ್ದು ಬೀಗಿದರು. ಈ ಹಿಂದೆ ʻವೆಂಕಿ ಮಾಮʼ ಸಿನಿಮಾ ಕೂಡ ಸಕ್ಸೆಸ್‌ ಕಂಡಿತು. ಅದರ ಜತೆಗೆ, ಆಮೀರ್ ಖಾನ್ ಅಭಿನಯದ ರಿಮೇಕ್ ʻಲಾಲ್ ಸಿಂಗ್ ಛಡ್ಡಾʼದಲ್ಲಿ ನಾಗ ಚೈತನ್ಯ ಅವರು ಬಾಲಿವುಡ್‌ಗೆ ಪದಾರ್ಪಣೆ ಮಾಡಿದರು.
ಸದ್ಯ ಕಸ್ಟಡಿ ಸಿನಿಮಾ ಮೂಲಕ ತೆರೆ ಮೇಲೆ ಮಿಂಚಲು ರೆಡಿಯಾಗಿದ್ದಾರೆ. ಪೊಲೀಸ್‌ ಪಾತ್ರದಲ್ಲಿ ನಾಗ ಚೈತನ್ಯ ಕಾಣಿಸಿಕೊಳ್ಳಲಿದ್ದಾರೆ. ಚಿತ್ರದಲ್ಲಿ ಅರವಿಂದ್ ಸ್ವಾಮಿ ಕೂಡ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ಚಿತ್ರವನ್ನು ವೆಂಕಟ್ ಪ್ರಭು ನಿರ್ದೇಶಿಸಿದ್ದಾರೆ. ಶ್ರೀನಿವಾಸ ಸಿಲ್ವರ್ ಸ್ಕ್ರೀನ್ ಬ್ಯಾನರ್ ಅಡಿಯಲ್ಲಿ ಶ್ರೀನಿವಾಸ ಚಿತ್ತೂರಿ ನಿರ್ಮಿಸಿದ್ದಾರೆ. ಕಸ್ಟಡಿ ಸಿನಿಮಾದಲ್ಲಿ ನಾಗಚೈತನ್ಯಗೆ ಜತೆಯಾಗಿ ಕೃತಿ ಶೆಟ್ಟಿ ನಟಿಸಿದ್ದಾರೆ. ಪ್ರಿಯಾಮಣಿ ಪ್ರಮುಖ ಪಾತ್ರದಲ್ಲಿ ಅಭಿನಯಿಸಿದ್ದಾರೆ.
ಇದನ್ನೂ ಓದಿ: Naga Chaitanya: ವಿಚ್ಛೇದನ ಬಳಿಕ ನಾಗ ಚೈತನ್ಯ ಜೀವನದಲ್ಲಿ ಪಶ್ಚಾತ್ತಾಪ ಪಟ್ಟರೆ? ನಟ ಹೇಳಿದ್ದೇನು?
ಶರತ್‌ಕುಮಾರ್, ಸಂಪತ್ ರಾಜ್, ಪ್ರೇಮ್‌ಜಿ, ವೆನ್ನೆಲ ಕಿಶೋರ್ ಮತ್ತು ಪ್ರೇಮಿ ವಿಶ್ವನಾಥ್ ಕೂಡ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಈ ಚಿತ್ರಕ್ಕೆ ಮಾಂತ್ರಿಕ ಇಳಯರಾಜ ಮತ್ತು ಯುವನ್ ಶಂಕರ್ ರಾಜ ಸಂಗೀತ ನಿರ್ದೇಶಕರಾಗಿದ್ದಾರೆ. ಮೇ 12 ರಂದು ಥಿಯೇಟರ್‌ಗಳಲ್ಲಿ ಕಸ್ಟಡಿ ತೆರೆಕಾಣಲಿದೆ.