ಬಾಲಿವುಡ್ ನಟ ಸಲ್ಮಾನ್ ಖಾನ್ ಅವರ ಬಹು ನಿರೀಕ್ಷಿತ ‘ಕಿಸಿ ಕಾ ಭಾಯ್, ಕಿಸಿ ಕಿ ಜಾನ್’ (Kisi Ka Bhai Kisi Ki Jaan)ಸಿನಿಮಾದ ‘ಯೆಂತೆಮ್ಮಾ, ಯೆಂತೆಮ್ಮಾ..’ ಹೊಸ ಹಾಡು (Yentamma Song) ಬಿಡುಗಡೆಯಾಗಿದೆ. ಸಲ್ಮಾನ್ ಖಾನ್, ಪೂಜಾ ಹೆಗ್ಡೆ ಪ್ರಮುಖ ಪಾತ್ರದಲ್ಲಿ ಅಭಿನಯಿಸಿ, ಶೆಹನಾಜ್ ಕೌರ್ ಗಿಲ್, ತೆಲುಗು ನಟರಾದ ರಾಮ್ ಚರಣ್, ವೆಂಕಟೇಶ್ ದುಗ್ಗುಬಾಟಿ ಮತ್ತಿತರು ಇರುವ ಈ ಸಿನಿಮಾ ಏಪ್ರಿಲ್ 21ರಂದು ಬಿಡುಗಡೆಯಾಗಲಿದೆ. ಈಗ ಬಿಡುಗಡೆಯಾಗಿರುವ ‘ಯೆಂತೆಮ್ಮಾ..’ಹಾಡಿನಲ್ಲಿ ಸಲ್ಮಾನ್ ಖಾನ್ ಮತ್ತು ರಾಮ್ ಚರಣ್ ಅವರು ಬಿಳಿ ಲುಂಗಿ ಉಟ್ಟು ಸಖತ್ ಸ್ಟೆಪ್ ಹಾಕಿದ್ದಾರೆ. ಅಷ್ಟೇ ಅಲ್ಲ ಇದರಲ್ಲಿ ‘ಆರ್ಆರ್ಆರ್ ಸಿನಿಮಾದ ನಾಟು..ನಾಟು..ಹಾಡಿನ ಜನಪ್ರಿಯ ಸ್ಟೆಪ್ನ್ನು ಕೂಡ ರಿಕ್ರಿಯೇಟ್ ಮಾಡಲಾಗಿದೆ. ಇದೇ ಕಾರಣಕ್ಕೆ ಯೆಂತೆಮ್ಮಾ..ಹಾಡು ರಿಲೀಸ್ ಆದ ಕೆಲವೇ ಕ್ಷಣಗಳಲ್ಲಿ ಸಿಕ್ಕಾಪಟೆ ಗಮನಸೆಳೆದಿದೆ.
ರಾಜಮೌಳಿ ನಿರ್ದೇಶನದ ಆರ್ಆರ್ಆರ್ ಸಿನಿಮಾದ ‘ನಾಟು..ನಾಟು’ ಹಾಡಿಗೆ ರಾಮ್ಚರಣ್ ಮತ್ತು ಜ್ಯೂನಿಯರ್ ಎನ್ಟಿಆರ್ ಮಾಡಿರುವ ಡ್ಯಾನ್ಸ್ ಸಿಕ್ಕಾಪಟೆ ಜನಪ್ರಿಯತೆ ಗಳಿಸಿದೆ. ಅದರಲ್ಲೂ ಈ ಹಾಡು ಆಸ್ಕರ್ ಗೆದ್ದ ಬಳಿಕವಂತೂ ದೇಶ-ವಿದೇಶಗಳಲ್ಲಿ ಜನರು ನಾಟು…ನಾಟು ಹಾಕಿಕೊಂಡು ಕುಣಿಯುತ್ತಿದ್ದಾರೆ. ಭಾರತದಲ್ಲಿರುವ ವಿದೇಶಿ ರಾಯಭಾರಿ ಕಚೇರಿಗಳ ಸಿಬ್ಬಂದಿಯೂ ಈ ಹಾಡಿಗೆ ನೃತ್ಯ ಮಾಡಿರುವ ವಿಡಿಯೊಗಳು ವೈರಲ್ ಆಗುತ್ತಿದೆ. ಇದೀಗ ಸಲ್ಮಾನ್ ಖಾನ್ ಅವರ ಮುಂದಿನ ಚಿತ್ರದ ಒಂದು ಹಾಡಿಗೆ ಕೂಡ ನಾಟು..ನಾಟು ಸ್ಟೆಪ್ಸ್ನ ಟಚ್ ಕೊಟ್ಟಿದ್ದು ವಿಶೇಷ.
ಇದನ್ನೂ ಓದಿ: RRR Movie | ರೆಡ್ ಕಾರ್ಪೆಟ್‌ನಲ್ಲಿ ಸಾಂಪ್ರದಾಯಿಕ ಭಾರತೀಯ ಉಡುಗೆಯಲ್ಲಿ ಮಿಂಚಿದ ಆರ್ಆರ್ಆರ್ ಚಿತ್ರತಂಡ
ಈ ಹಾಡು ಪ್ರಾರಂಭವಾಗುವುದು ಒಂದು ದೇವಸ್ಥಾನದಿಂದ. ಅಲ್ಲಿ ಸಲ್ಮಾನ್ ಖಾನ್ ಮತ್ತು ರಾಮ್ ಚರಣ್ ಅವರಿಬ್ಬರೂ ಬಿಳಿ ಲುಂಗಿ ಮತ್ತು ಹಳದಿ ಬಣ್ಣದ ಶರ್ಟ್ ಧರಿಸಿ ಬರುತ್ತಾರೆ. ಬಳಿಕ ಪೂಜಾ ಹೆಗ್ಡೆ, ಶೆಹನಾಜ್ ಗಿಲ್, ಪಾಲಕ್ ತಿವಾರಿ, ರಾಘವ್ ಜುಯಲ್ ಮತ್ತು ಸಿದ್ಧಾರ್ಥ್ ನಿಗಮ್ ಸೇರಿಕೊಳ್ಳುತ್ತಾರೆ. ಒಟ್ಟಾರೆ 3 ನಿಮಿಷದ 15 ಸೆಕೆಂಡ್ಗಳ ಹಾಡಿನಲ್ಲಿ, 2 ನಿಮಿಷ 16ಸೆಕೆಂಡ್ಗಳಾಗುತ್ತಿದ್ದಂತೆ ವೆಂಕಟೇಶ್ ದಗ್ಗುಬಾಟಿ ಎಂಟ್ರಿಯಾಗುತ್ತದೆ. ಇವರೂ ಕೂಡ ಬಿಳಿ ಲುಂಗಿ, ಹಳದಿ ಶರ್ಟ್ ಹಾಕಿಕೊಂಡೇ ಬಂದು, ಸಲ್ಮಾನ್ ಮತ್ತು ರಾಮ್ಚರಣ್ ಅವರನ್ನು ಸೇರಿಕೊಳ್ಳುತ್ತಾರೆ. ಮೂವರೂ ಸೇರಿ, ‘ನಾಟು..ನಾಟು..’ಹಾಡಿನ ಸ್ಟೆಪ್ ಮರುಸೃಷ್ಟಿಸಿದ್ದಾರೆ. ವಿಡಿಯೊ ನೋಡಿದ ಅಭಿಮಾನಿಗಳು ಸಖತ್ ಖುಷಿಯಾಗಿ, ಕಮೆಂಟ್ ಹಾಕಿದ್ದಾರೆ.
