ವಾಷಿಂಗ್ಟನ್‌: ʼಚಿಚೋರೆʼ (Chhichhore), ʼಮಿಸ್‌ ಶೆಟ್ಟಿ ಮಿಸ್ಟರ್‌ ಪೊಲಿಶೆಟ್ಟಿʼ (Miss Shetty Mr Polishetty) ಮುಂತಾದ ಚಿತ್ರಗಳಲ್ಲಿ ನಟಿಸಿದ ತೆಲುಗಿನ ಜನಪ್ರಿಯ ನಾಯಕ ನವೀನ್ ಪೊಲಿಶೆಟ್ಟಿ (Naveen Polishetty) ಇತ್ತೀಚೆಗೆ ಅಮೆರಿಕದಲ್ಲಿ ನಡೆದ ರಸ್ತೆ ಅಪಘಾತದಲ್ಲಿ ಗಾಯಗೊಂಡಿದ್ದಾರೆ. ಅವರ ಕೈ ಮುರಿದಿದೆ ಮತ್ತು ಪ್ರಸ್ತುತ ಚೇತರಿಸಿಕೊಳ್ಳುತ್ತಿದ್ದಾರೆ. ಬೈಕ್ ಸ್ಕಿಡ್ ಆಗಿ ಬಿದ್ದ ಪರಿಣಾಮ ಅವರು ಗಾಯಗೊಂಡಿದ್ದಾರೆ ಎಂದು ಮೂಲಗಳು ತಿಳಿಸಿವೆ.
ಏನಾಗಿತ್ತು?
ʼʼನವೀನ್ ಅಮೆರಿಕದಲ್ಲಿ ಚಿತ್ರವೊಂದರ ಶೂಟಿಂಗ್‌ನಲ್ಲಿ ಭಾಗವಹಿಸಿದ್ದರು. ಈ ವೇಳೆ ಡಲ್ಲಾಸ್‌ನಲ್ಲಿ ಬೈಕ್ ರೈಡ್‌ ಮಾಡುತ್ತಿದ್ದಾಗ ನಿಯಂತ್ರಣ ಕಳೆದುಕೊಂಡಿದ್ದರು. ಬೈಕ್ ಸ್ಕಿಡ್ ಆದ ಪರಿಣಾಮ ಅವರ ತೋಳಿಗೆ ಗಾಯವಾಗಿದೆ. ಕೆಲವು ದಿನಗಳ ಹಿಂದೆ ಈ ಘಟನೆ ನಡೆದಿದೆ. ಅಪಘಾತದಲ್ಲಿ ಅವರ ಕೈ ಮುರಿದಿದ್ದು, ಅಮೆರಿಕದಲ್ಲಿಯೇ ಚಿಕಿತ್ಸೆ ನೀಡಲಾಗುತ್ತಿದೆ. ಪ್ರಸ್ತುತ ಅವರು ಚೇತರಿಸಿಕೊಳ್ಳುತ್ತಿದ್ದಾರೆ” ಎಂದು ಅವರ ಚಿತ್ರ ತಂಡದ ಸದಸ್ಯರೊಬ್ಬರು ತಿಳಿಸಿದ್ದಾರೆ. ನವೀನ್ ಈ ಬಗ್ಗೆ ಇದುವರೆಗೆ ಯಾವುದೇ ಮಾಹಿತಿ ಹಂಚಿಕೊಂಡಿಲ್ಲ.
ಅಮೆರಿಕ ನಿವಾಸಿ
ನವೀನ್ ತಮ್ಮ ಪಾಲಕರೊಂದಿಗೆ ಅಮೆರಿಕದಲ್ಲಿ ನೆಲೆಸಿದ್ದಾರೆ. ಸಿನಿಮಾಗಳಲ್ಲಿನ ಕೆಲಸಕ್ಕಾಗಿ ಅವರು ಆಗಾಗ ಭಾರತಕ್ಕೆ ಬರುತ್ತಿರುತ್ತಾರೆ. ಸದ್ಯ ವೈದ್ಯರು ಅವರಿಗೆ ಎಂಟು ವಾರಗಳ ವಿಶ್ರಾಂತಿ ಸೂಚಿಸಿದ್ದಾರೆ. ಜೂನ್‌ ವೇಳೆಗೆ ಅವರು ಭಾರತಕ್ಕೆ ಬರುವ ನಿರೀಕ್ಷೆ ಇದೆ.
2012ರಲ್ಲಿ ತೆರೆಕಂಡ ʼಲೈಫ್‌ ಈಸ್‌ ಬ್ಯೂಟಿಫುಲ್‌ʼ ಎನ್ನುವ ತೆಲುಗು ಚಿತ್ರ ಮೂಲಕ ನವೀನ್ ಬಣ್ಣದ ಲೋಕಕ್ಕೆ ಕಾಲಿಟ್ಟರು. ಆದರೆ ಅವರು ನಾಯಕನಾಗಿ ಕಾಣಿಸಿಕೊಂಡ ಮೊದಲ ಚಿತ್ರ ತೆಲುಗಿನ ʼಏಜೆಂಟ್‌ ಸಾಯಿ ಶ್ರೀನಿವಾಸ ಅತ್ರೇಯʼ. 2019ರಲ್ಲಿ ತೆರೆಕಂಡ ಈ ಸಿನಿಮಾದ ಚಿತ್ರಕಥೆಯನ್ನೂ ನವೀನ್ ರಚಿಸಿದ್ದರು. ಈ ಚಿತ್ರ ಸಾಕಷ್ಟು ಸದ್ದು ಮಾಡಿತ್ತು. ಆ ಮೂಲಕ ಟಾಲಿವುಡ್‌ಗೆ ಹೊಸ ನಾಯಕನ ಪರಿಚಯವಾಗಿತ್ತು.
ಸುಶಾಂತ್‌ ಸಿಂಗ್‌ ಜತೆ ಅಭಿನಯ
ಇನ್ನು ಅದೇ ವರ್ಷ ತೆರೆಕಂಡ ಬಾಲಿವುಡ್‌ನ ʼಚಿಚೋರೆʼ ಚಿತ್ರದಲ್ಲಿಯೂ ನವೀನ್ ಮುಖ್ಯ ಪಾತ್ರದಲ್ಲಿ ಅಭಿನಯಿಸಿದ್ದರು. ಸುಶಾಂತ್‌ ಸಿಂಗ್‌ ರಾಜಪೂತ್‌-ಶ್ರದ್ಧಾ ಕಪೂರ್‌ ನಾಯಕ-ನಾಯಕಿರಾಗಿದ್ದ ಈ ಚಿತ್ರವನ್ನು ನಿತೇಶ್‌ ತಿವಾರಿ ನಿರ್ದೇಶಿಸಿದ್ದರು. ಮಿಮರ್ಶಕರಿಂದ ಉತ್ತಮ ಪ್ರತಿಕ್ರಿಯೆ ಪಡೆದ ಈ ಸಿನಿಮಾ ಬಾಕ್ಸ್‌ ಆಫೀಸ್‌ನಲ್ಲಿಯೂ ಮ್ಯಾಜಿಕ್‌ ಮಾಡಿತ್ತು. ಹಿಮಾಂಶು ಆ್ಯಸಿಡ್‌ ದೇಶ್‌ಮುಖ್‌ ಪಾತ್ರದಲ್ಲಿ ನವೀನ್ ಮೋಡಿ ಮಾಡಿದ್ದರು.
2021ರಲ್ಲಿ ನವೀನ್ ಅಭಿನಯದ ʼಜಾತಿ ರತ್ನುಲುʼ ತೆಲುಗು ಸಿನಿಮಾ ತೆರೆಕಂಡು ಭರ್ಜರಿ ಹಿಟ್‌ ಆಗಿತ್ತು. ಅನುದೀಪ್‌ ಕೆ.ವಿ. ಆ್ಯಕ್ಷನ್‌ ಕಟ್‌ ಹೇಳಿದ್ದ ಈ ಚಿತ್ರ ಸುಮಾರು 6 ಕೋಟಿ ರೂ. ವೆಚ್ಚದಲ್ಲಿ ತಯಾರಾಗಿ ಬರೋಬ್ಬರಿ 70 ರೂ. ಬಾಚಿಕೊಂಡಿತ್ತು. ಈ ಚಿತ್ರದಲ್ಲಿನ ನವೀನ್ ಪಾತ್ರವೂ ಸಾಕಷ್ಟು ಗಮನ ಸೆಳೆದಿತ್ತು.
ಅನುಷ್ಕಾ ಶೆಟ್ಟಿ ಚಿತ್ರದಲ್ಲಿ ನವೀನ್
ಇನ್ನು ಕಳೆದ ವರ್ಷ ತೆರೆಕಂಡ ಕನ್ನಡತಿ ಅನುಷ್ಕಾ ಶೆಟ್ಟಿ ಅಭಿನಯದ ʼಮಿಸ್‌ ಶೆಟ್ಟಿ ಮಿಸ್ಟರ್‌ ಪೊಲಿಶೆಟ್ಟಿʼ ಚಿತ್ರದಲ್ಲಿ ನವೀನ್ ನಾಯಕನಾಗಿ ನಟಿಸಿದ್ದರು. ಮಹೇಶ್‌ ಬಾಬು ಪಚಿಗೋಳ ನಿರ್ದೇಶನದ ಈ ಸಿನಿಮಾ ಕೂಡ ಸಾಕಷ್ಟು ಸದ್ದು ಮಾಡಿತ್ತು. ಅನುಷ್ಕಾ ಶೆಟ್ಟಿ ಮತ್ತು ನವೀನ್ ಅಭಿನಯಕ್ಕೆ ಪ್ರೇಕ್ಷಕರು ಜೈ ಅಂದಿದ್ದರು. ಅಳೆದು ತೂಗಿ ಸಿನಿಮಾವನ್ನು ಆಯ್ಕೆ ಮಾಡುವ ನವೀನ್ ಕೆಲವು ವೆಬ್‌ ಸೀರಿಸ್‌ಗಳಲ್ಲಿಯೂ ಕಾಣಿಸಿಕೊಂಡಿದ್ದಾರೆ. ಸದ್ಯ ಅವರು ʼಅನಗನಗ ಒಕ ರಾಜುʼ ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಅವರು ಶೀಘ್ರ ಗುಣಮುಖರಾಗಲಿ ಎಂದು ಅಭಿಮಾನಿಗಳು ಹಾರೈಸಿದ್ದಾರೆ.
ಇದನ್ನೂ ಓದಿ: Miss Shetty Mr Polishetty: ʻನವೀನ್ ಪೋಲಿಶೆಟ್ಟಿʼ ಅಭಿನಯಕ್ಕೆ ಮನಸೋತ ಪ್ರೇಕ್ಷಕರು!