ಮುಂಬಯಿ: ಎಸ್‌ಎಸ್ ರಾಜಮೌಳಿ ನಿರ್ದೇಶನದ ಮತ್ತು ವಿಜಯೇಂದ್ರ ಪ್ರಸಾದ್ ಬರೆದಿರುವ RRR ದೇಶದಾದ್ಯಂತ ಧೂಳೆಬ್ಬಿಸಿದ ಸಿನಿಮಾ. ಈಗ ಈ ಸಿನಿಮಾ ಕುರಿತು ಆಸ್ಕರ್ ವಿಜೇತ ಸೌಂಡ್ ಡಿಸೈನರ್ ರೆಸುಲ್ ಪೂಕುಟ್ಟಿ ಮಾಡಿರುವ ಟ್ವಿಟ್‌ ಸಾಕಷ್ಟು ಚರ್ಚೆಗೆ ಒಳಗಾಗಿದೆ.
ರೆಸುಲ್ ಪೂಕುಟ್ಟಿ ತಮ್ಮ ಟ್ವಿಟರ್‌ ಖಾತೆಯಲ್ಲಿ RRR ಚಿತ್ರದ ಕುರಿತು ಟ್ವಿಟ್‌ ಮಾಡಿದ್ದರು. ಈ ಚಿತ್ರದಲ್ಲಿ ರಾಮ್ ಚರಣ್, ಜೂನಿಯರ್ ಎನ್ಟಿಆರ್ ನಾಯಕರಾಗಿ ನಟಿಸಿದ್ದು, ಆಲಿಯಾ ಭಟ್ ನಾಯಕಿ ಪಾತ್ರದಲ್ಲಿ ನಟಿಸಿದ್ದಾರೆ. ಈ ಚಿತ್ರವನ್ನು ‘ಸಲಿಂಗಕಾಮಿ ಪ್ರೇಮಕಥೆ’ ಎಂದು ರೆಸುಲ್ ಪೂಕುಟ್ಟಿ ಕರೆದಿದ್ದಾರೆ ಮತ್ತು ಚಿತ್ರದಲ್ಲಿ ಆಲಿಯಾ ‘ಪ್ರಾಪ್’ ಎಂದು ಟ್ವೀಟ್ ಮಾಡಿದ್ದಾರೆ. ಟ್ವಿಟರ್‌ನಲ್ಲಿ ಅವರನ್ನು ಟ್ರೋಲ್ ಮಾಡಿದವರಿಗೆ ಪ್ರತಿಕ್ರಿಯಿಸಿ ತಮ್ಮ ನಿಲುವನ್ನು ಸಮರ್ಥಿಸಿಕೊಂಡಿದ್ದಾರೆ ಕೂಡ.
RRR ಬಗ್ಗೆ ಪೂಕುಟ್ಟಿ ಹೇಳಿದ್ದೇನು?
“ಕಳೆದ ರಾತ್ರಿ RRR ಎಂಬ 30 ನಿಮಿಷಗಳ ಕಸವನ್ನು ನೋಡಿದೆ” ಎಂದು ನಟ ಹಾಗೂ ಲೇಖಕ ಮುನೀಶ್ ಭಾರದ್ವಾಜ್ ಅವರು ಟ್ವೀಟ್ ಮಾಡಿದ್ದರು. ಆನಂತರ ಮುನಿಶ್ ಅವರ ಟ್ವೀಟ್‌ಗೆ ರೆಸುಲ್ ಪೂಕುಟ್ಟಿ ಪ್ರತಿಕ್ರಿಯಿಸಿದ್ದರು. ಅದು “ಗೇ ಲವ್ ಸ್ಟೋರಿ, ಆ ಚಿತ್ರದಲ್ಲಿ ಆಲಿಯಾ ಪ್ರಾಪ್ ಮಾತ್ರ” ಎಂದು ಬರೆದಿದ್ದರು. ಇದು ರಾಮ್‌ಚರಣ್- ಜೂ.ಎನ್ಟಿಆರ್ ಅಭಿಮಾನಿಗಳನ್ನು ಕೆರಳಿಸಿದೆ. ರೆಸುಲ್ ವಿರುದ್ಧ ನೆಟಿಜನ್‌ಗಳು ಕಿಡಿ ಕಾರಿದ್ದಾರೆ. ರೆಸುಲ್ ತಾವು ಮಾಡಿದ ಟ್ವೀಟ್ ಸಮರ್ಥಿಸಿಕೊಂಡಿದ್ದಾರೆ.
“@resulp ನೀವು #RRR ಚಿತ್ರವನ್ನು ಅವಮಾನಿಸಿದ್ದಕ್ಕಾಗಿ ನಿಮಗೆ ಸಿಗುತ್ತಿದ್ದ ಗೌರವವನ್ನು ಇಂದು ಕಳೆದುಕೊಂಡಿದ್ದೀರಿ” ಎಂದು ಒಬ್ಬರು ಬರೆದಿದ್ದಾರೆ. ಇದಕ್ಕೆ ರೆಸುಲ್ ಪೂಕುಟ್ಟಿ ಉತ್ತರಿಸಿದ್ದು ಹೀಗಿದೆ- “ಇದು ನನ್ನ ಹೇಳಿಕೆ ಅಲ್ಲ, ಹೊರದೇಶದ ಒಬ್ಬರು ಹೀಗೆ ಬರೆದಿದ್ದರು. ನಾನು ಅದನ್ನು ಉಲ್ಲೇಖಿಸಿದ್ದೇನೆ ಅಷ್ಟೇ” ಎಂದು ಟ್ವಿಟ್‌ ಮೂಲಕವೇ ಉತ್ತರ ನೀಡಿದ್ದಾರೆ.
ನೆಟ್‌ಫ್ಲಿಕ್ಸ್‌ನಲ್ಲಿ RRR ಬಿಡುಗಡೆಯಾದ ಕೂಡಲೇ, ಪಾಶ್ಚಿಮಾತ್ಯ ಪ್ರೇಕ್ಷಕರೊಬ್ಬರು ʻಚಿತ್ರದಲ್ಲಿ ರಾಮ್ ಚರಣ್ ಮತ್ತು ಜೂನಿಯರ್ ಎನ್ಟಿಆರ್ ಪಾತ್ರಗಳು ಹಂಚಿಕೊಂಡ ಕೆಮಿಸ್ಟ್ರಿಯನ್ನು ಪ್ರೇಕ್ಷಕರು ಇಷ್ಟಪಟ್ಟಿದ್ದಾರೆ. ಚಿತ್ರವು ಸಲಿಂಗಕಾಮಿ ಪ್ರಣಯವನ್ನು ಕುರಿತಾಗಿದೆʼ ಎಂದು ಪೋಸ್ಟ್ ಮಾಡಿದ್ದರು. ಇದೇ ಹೇಳಿಕೆಯನ್ನು ಪೊಕುಟ್ಟಿ ಸಮರ್ಥಿಸಿಕೊಂಡಿದ್ದಾರೆ.
ರಾಮ್ ಚರಣ್ ಮತ್ತು ಜೂನಿಯರ್ ಎನ್ ಟಿಆರ್ ಜತೆಗೆ ಅಲ್ಲೂರಿ ಸೀತಾರಾಮ ರಾಜು, ಕೊಮರಂ ಭೀಮ್, ಆಲಿಯಾ ಭಟ್, ಅಜಯ್ ದೇವಗನ್, ಶ್ರಿಯಾ ಸರನ್, ರೇ ಸ್ಟೀವನ್ಸನ್, ಅಲಿಸನ್ ಡೂಡಿ ಮತ್ತು ಒಲಿವಿಯಾ ಮೋರಿಸ್ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಚಿತ್ರವು ಜಾಗತಿಕವಾಗಿ ಗಲ್ಲಾಪೆಟ್ಟಿಗೆಯಲ್ಲಿ ಸದ್ದು ಮಾಡಿದೆ.
ಇದನ್ನೂ ಓದಿ: RRR ಒಟಿಟಿಯಲ್ಲಿ ಬರ್ತಾ ಇದೆ! ಮೇ 20ರಿಂದ ಝೀ 5ನಲ್ಲಿ ನೋಡಿ