ಬೆಂಗಳೂರು: ನಾಸಿರುದ್ದೀನ್ ಶಾ (Naseeruddin Shah) ಇತ್ತೀಚೆಗೆ ಸನ್ನಿ ಡಿಯೋಲ್ ಅಭಿನಯದ ಗದರ್ 2 ಮತ್ತು ಅದಾ ಶರ್ಮಾ ಅವರ ದಿ ಕೇರಳ ಸ್ಟೋರಿ ಬಾಕ್ಸ್ ಆಫೀಸ್ ಯಶಸ್ಸಿನ ಬಗ್ಗೆ ತಮ್ಮ ಅಭಿಪ್ರಾಯವನ್ನು ಹಂಚಿಕೊಂಡಿದ್ದರು. ಈ ದಿನಗಳಲ್ಲಿ ‘ಜಿಂಗೊಯಿಸಂ’ (jingoist) (ಅತಿಯಾದ ದೇಶಪ್ರೇಮ) ಹೇಗೆ ಮಾರಾಟವಾಗುತ್ತಿದೆ ಎಂದು ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದರು. ಈ ಬಗ್ಗೆ ನಟಿ, ವಿವೇಕ್ ಅಗ್ನಿಹೋತ್ರಿ ಪತ್ನಿ, ನಟಿ ಪಲ್ಲವಿ ಜೋಶಿ (Pallavi Joshi) ಅವರು ಪ್ರತಿಕ್ರಿಯಿಸಿದ್ದಾರೆ. ನಾಸಿರುದ್ದೀನ್ ಶಾ ಅವರ ಕಮೆಂಟ್‌ಗಳಿಂದ ನೋವಾಗಿದೆ ಎಂದು ಅವರು ಹೇಳಿಕೊಂಡಿದ್ದಾರೆ.
ಮಾಧ್ಯಮವೊಂದರ ಸಂದರ್ಶನದಲ್ಲಿ ಪಲ್ಲವಿ ಜೋಶಿ ಮಾತನಾಡಿ ʻʻಈ ವಿಚಾರಗಳನ್ನು ಹೇಳುವ ಮೊದಲು ನಾಸಿರುದ್ದೀನ್ ಶಾ ಅವರು ಸಿನಿಮಾ ನೋಡಬೇಕಾಗಿತ್ತುʼʼ ಎಂದು ಗದರ್ 2 ನಿರ್ದೇಶಕ ಅನಿಲ್ ಶರ್ಮಾ ಹೇಳಿದ್ದ ಶೈಲಿಯಲ್ಲಿಯೇ ಪ್ರತಿಕ್ರಿಯಿಸಿದ್ದಾರೆ. ʻʻನಾಸಿರುದ್ದೀನ್ ಶಾ ಅವರನ್ನು ನಾನು ವರ್ಷಗಳಿಂದ ನೋಡಿದ್ದೆ. ಅವರ ಜತೆಗೂ ಕೆಲಸ ಮಾಡಿದ್ದೆ. ಸಿನಿಮಾ ವೀಕ್ಷಿಸಿದ ನಂತರ ಬಹುಶಃ ಅವರ ದೃಷ್ಟಿಕೋನವು ಬದಲಾಗಬಹುದು. ಸಿನಿಮಾ ಬಗ್ಗೆ ಮಾತನಾಡುವ ಮೊದಲು ಅದರ ಬಗ್ಗೆ ಎಲ್ಲಾ ಪ್ರಮುಖ ಮಾಹಿತಿಯನ್ನು ಸಂಗ್ರಹಿಸುವುದು ಮುಖ್ಯವಾಗಿದೆ. ನಾನು ನಾಸಿರುದ್ದೀನ್ ಅವರನ್ನು ತುಂಬ ಗೌರವಿಸುತ್ತೇನೆ. ಆದರೆ ಅವರ ಕಮೆಂಟ್‌ಗಳಿಂದ ನೋವಾಗಿದೆʼʼ ಎಂದು ಪಲ್ಲವಿ ಜೋಶಿ ಹೇಳಿಕೊಂಡಿದ್ದಾರೆ.
ನಾಸಿರುದ್ದೀನ್ ಶಾ ಹೇಳಿದ್ದೇನು?
ಮಾಧ್ಯಮವೊಂದಕ್ಕೆ ಇತ್ತೀಚೆಗೆ ನೀಡಿದ ಸಂದರ್ಶನದಲ್ಲಿ, ನಾಸಿರುದ್ದೀನ್ ಶಾ ಬಾಲಿವುಡ್‌ನಲ್ಲಿ ಈಗ ಯಾವ ರೀತಿಯ ಚಿತ್ರಗಳು ತಯಾರಾಗುತ್ತಿವೆ ಎಂಬುದರ ಬಗ್ಗೆ ಹೇಳಿಕೊಂಡಿದ್ದರು.ʻʻಅತಿಯಾದ ದೇಶಪ್ರೇಮ ಅಪಾಯಕಾರಿ. ಸಿನಿಮಾದ ಜನಪ್ರಿಯತೆ ಎನ್ನುವುದು ಇದರಿಂದಲೇ ಪ್ರೇರಿತಗೊಂಡಿದೆ. ನಿಮ್ಮ ದೇಶವನ್ನು ಪ್ರೀತಿಸಿದರೆ ಸಾಕಾಗುವುದಿಲ್ಲ. ಗದರ್ 2 ಚಿತ್ರಗಳು ಸಾಕಷ್ಟು ಹಾನಿಕರ. ನಾನು ಆ ಚಿತ್ರಗಳನ್ನು ನೋಡಿಲ್ಲ. ಆದರೆ, ಅವು ಯಾವ ವಿಚಾರದ ಬಗ್ಗೆ ಇದೆ ಎನ್ನುವುದು ಗೊತ್ತಿದೆʼʼ ಎಂದಿದ್ದರು.
ಇದನ್ನೂ ಓದಿ: Naseeruddin Shah: ಅತಿಯಾದ ದೇಶಪ್ರೇಮ ಒಳ್ಳೇದಲ್ಲ ಎಂದ ನಾಸೀರುದ್ದೀನ್‌ ಶಾಗೆ ನಾನಾ ಪಾಟೇಕರ್ ಗುದ್ದು!
“ವಾಸ್ತವವಾಗಿ, ದಿ ಕೇರಳ ಸ್ಟೋರಿ ಮತ್ತು ಗದರ್ 2, ಸಿನಿಮಾಗಳನ್ನು ನಾನು ನೋಡಿಲ್ಲ, ಆದರೆ ಅವುಗಳ ಬಗ್ಗೆ ನನಗೆ ತಿಳಿದಿದೆ. ಕಾಶ್ಮೀರ ಫೈಲ್ಸ್‌ನಂತಹ ಚಲನಚಿತ್ರಗಳು ಹೆಚ್ಚು ಜನಪ್ರಿಯವಾಗಿವೆ. ಆದರೆ ಸುಧೀರ್ ಮಿಶ್ರಾ, ಅನುಭವ್ ಸಿನ್ಹಾ ಮತ್ತು ಹಂಸಲ್ ನಿರ್ಮಿಸಿದ ಚಲನಚಿತ್ರಗಳು ಗೊಂದಲದ ಸಂಗತಿಯಾಗಿದೆ. ತಮ್ಮ ಕಾಲದ ಸತ್ಯವನ್ನು ಬಿಂಬಿಸಲು ಪ್ರಯತ್ನಿಸುತ್ತಿರುವ ಮೆಹ್ತಾ ಅವರು ಯಾರಿಗೂ ಕಾಣುವುದಿಲ್ಲ, ಆದರೆ ಈ ಚಲನಚಿತ್ರ ನಿರ್ಮಾಪಕರು ಎದೆಗುಂದದೆ ಕಥೆಗಳನ್ನು ಹೇಳುವುದನ್ನು ಮುಂದುವರಿಸುವುದು ಮುಖ್ಯವಾಗಿದೆʼʼ ಎಂದಿದ್ದರು.
ದಿ ಕಾಶ್ಮೀರ್ ಫೈಲ್ಸ್, ದಿ ಕೇರಳ ಸ್ಟೋರಿ ಮತ್ತು ಗದರ್ 2 ಜಾಗತಿಕವಾಗಿ ಒಟ್ಟು 1200 ಕೋಟಿ ರೂ. ಗಳಿಕೆ ಕಂಡಿತ್ತು. ʼಗದರ್ 2ʼ ಭಾರತದಲ್ಲಿ ಸುಮಾರು 520 ಕೋಟಿ ಗಳಿಸಿದೆ. ವಿವೇಕ್ ಅಗ್ನಿಹೋತ್ರಿ ಅವರ ಮುಂಬರುವ ʼದಿ ವ್ಯಾಕ್ಸಿನ್ ವಾರ್ʼ ಸಿನಿಮಾ ಸೆಪ್ಟೆಂಬರ್ 28ರಂದು ಬಿಡುಗಡೆಯಾಗಲಿದೆ.