ಬೆಂಗಳೂರು: ನಟ, ಬಿಗ್ ಬಾಸ್ ಮಾಜಿ ಸ್ಪರ್ಧಿ ಅರ್ಮಾನ್ ಕೊಹ್ಲಿ (Armaan Kohli) ಅವರ ತಂದೆ ನಿರ್ದೇಶಕ ರಾಜ್ ಕುಮಾರ್ ಕೊಹ್ಲಿ ನ.24ರ ಬೆಳಗ್ಗೆ 8ಗಂಟೆ ಸುಮಾರಿಗೆ ನಿಧನರಾಗಿದ್ದಾರೆ. ಅರ್ಮಾನ್ ಅವರ ಆಪ್ತ ಸ್ನೇಹಿತ ವಿಜಯ್ ಗ್ರೋವರ್ ಸುದ್ದಿಯನ್ನು ದೃಢಪಡಿಸಿದ್ದಾರೆ. ರಾಜ್ ಕುಮಾರ್ (Raj Kumar Kohli) ಅವರ ಅಂತ್ಯಕ್ರಿಯೆಯನ್ನು ಇಂದು ನಡೆಸಲಾಗುವುದು ಎಂದು ಬಹಿರಂಗಪಡಿಸಿದ್ದಾರೆ. ರಾಜ್ ಕುಮಾರ್ ಕೊಹ್ಲಿ ಅವರು ಬೆಳಗ್ಗೆ ಸ್ನಾನಕ್ಕೆಂದು ತೆರಳಿದ್ದು, ಸ್ವಲ್ಪ ಸಮಯವಾದರೂ ಸ್ನಾನ ಮುಗಿಸಿ ಹೊರಬರಲಿಲ್ಲ. ಮಗ ಅರ್ಮಾನ್ ಅವರು ತಂದೆ ನೆಲದ ಮೇಲೆ ಕುಸಿದು ಬಿದ್ದಿರುವುದನ್ನು ಕಂಡು ಬಾಗಿಲು ಒಡೆದಿದ್ದಾರೆ. ತಕ್ಷಣ ಆಸ್ಪತ್ರೆಗೆ ಸಾಗಿಸಿದ್ದರೂ ಅಷ್ಟರಲ್ಲಿ ಅವರ ಪ್ರಾಣಪಕ್ಷಿ ಹಾರಿಹೋಗಿತ್ತು ಎಂದು ವರದಿಯಾಗಿದೆ.
ರಾಜ್ ಕುಮಾರ್ ಕೊಹ್ಲಿ ಅವರು ದುಲ್ಲಾ ಭಟ್ಟಿ (1966) (Dulla Bhatti) ಮತ್ತು ಲೂಟೆರಾ (1970) (Lootera) ಸೇರಿದಂತೆ ಹಲವಾರು ಬಾಲಿವುಡ್ ಸಿನಿಮಾಗಳಿಗೆ ಹೆಸರುವಾಸಿಯಾಗಿದ್ದರು. ಇದರಲ್ಲಿ ದಾರಾ ಸಿಂಗ್ ಮತ್ತು ನಿಶಿ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ನಾಗಿನ್, ಜಾನಿ ದುಷ್ಮನ್, ಬದ್ಲೆ ಕಿ ಆಗ್, ನೌಕರ್ ಬಿವಿ ಕಾ ಮತ್ತು ರಾಜ್ ತಿಲಕ್ ಅವರ ಕೆಲವು ಜನಪ್ರಿಯ ಚಲನಚಿತ್ರಗಳು.
ನಟ ಅರ್ಮಾನ್ ಕೊಹ್ಲಿ ನಿರ್ದೇಶಕ ರಾಜ್‌ಕುಮಾರ್ ಕೊಹ್ಲಿ ಅವರ ಮಗ. ಬಾಲ ಕಲಾವಿದನಾಗಿ, ಅರ್ಮಾನ್ ಎರಡು ಚಲನಚಿತ್ರಗಳಲ್ಲಿ ಕಾಣಿಸಿಕೊಂಡಿದ್ದರು. ಬದ್ಲೆ ಕಿ ಆಗ್ (1982) ಮತ್ತು ರಾಜ್ ತಿಲಕ್ (1984) ಈ ಎರಡೂ ಸಿನಿಮಾಗಳನ್ನು ರಾಜ್ ಕುಮಾರ್ ಕೊಹ್ಲಿ ಅವರೇ ನಿರ್ದೇಶಿಸಿದ್ದರು. ವಿರೋಧಿ ಚಿತ್ರದ ಮೂಲಕ ನಾಯಕ ನಟನಾಗಿ ಪದಾರ್ಪಣೆ ಮಾಡಿದರು. ಇದೆಲ್ಲದರ ಹೊರತಾಗಿಯೂ, ಅರ್ಮಾನ್ ಬಾಲಿವುಡ್‌ನಲ್ಲಿ ಸಾಕಷ್ಟು ಖ್ಯಾತಿಯನ್ನು ಗಳಿಸಲಿಲ್ಲ.
ಇದನ್ನೂ ಓದಿ: Money Guide: ತುರ್ತು ಸಂದರ್ಭದಲ್ಲಿ ನೆರವಾಗುವ ಹೋಮ್‌ಲೋನ್‌ ಇನ್ಶೂರೆನ್ಸ್‌; ಏನಿದರ ಮಹತ್ವ?
ಅರ್ಮಾನ್ ಕೊಹ್ಲಿ 2013ರಲ್ಲಿ ರಿಯಾಲಿಟಿ ಶೋ ಬಿಗ್ ಬಾಸ್ ಸೀಸನ್ ಏಳರಲ್ಲಿ ಭಾಗವಹಿಸಿದ್ದರು. ಅರ್ಮಾನ್ ತನ್ನ ಸಹ-ಸ್ಪರ್ಧಿ ಮತ್ತು ನಟಿ ತನಿಶಾ ಮುಖರ್ಜಿ ಜತೆ ಹೆಸರು ತುಳುಕು ಹಾಕಿಕೊಂಡಿತ್ತು. ಬಿಗ್ ಬಾಸ್ 7 ಶೋನಲ್ಲಿ ಭಾಗವಹಿಸಿದ ಸೋಫಿಯಾ ಹಯಾತ್ ಅವರೊಂದಿಗೆ ದೈಹಿಕ ಕಿರುಕುಳದ ಆರೋಪದ ಮೇಲೆ ಅರ್ಮಾನ್ ಅವರನ್ನು ಬಂಧಿಸಲಾಗಿತ್ತು. ಮರುದಿನ ಅವರನ್ನು ಜಾಮೀನಿನ ಮೇಲೆ ಬಿಡುಗಡೆ ಮಾಡಲಾಯಿತು.