ಮುಂಬಯಿ: ದಿನಕ್ಕೊಂದು ಹೈಡ್ರಾಮಾ ಮೂಲಕವೇ ಸುದ್ದಿಯಲ್ಲಿರುವ ರಾಖಿ ಸಾವಂತ್ (Rakhi Sawant) ಪೊಲೀಸ್ ಠಾಣೆ ಎದುರಲ್ಲೇ ಪ್ರಜ್ಞೆ ತಪ್ಪಿ ಬಿದ್ದು ಸುದ್ದಿಯಾಗಿದ್ದಾರೆ. ಕರ್ನಾಟಕ ಮೂಲದ ಆದಿಲ್ ಖಾನ್ ದುರಾನಿ ಜತೆ ತನಗೆ ಮದುವೆಯಾಗಿದೆ ಎಂದು ಇತ್ತೀಚೆಗಷ್ಟೇ ಬಹಿರಂಗಪಡಿಸಿದ್ದ ಬಾಲಿವುಡ್ ನಟಿ ರಾಖಿ ಸಾವಂತ್ ಇದೀಗ ಆದಿಲ್ ವಿರುದ್ಧ ಹತ್ತು-ಹಲವು ಆರೋಪಗಳನ್ನು ಮಾಡಿ ಪೊಲೀಸರಿಗೆ ದೂರು ಕೊಟ್ಟಿದ್ದರು. ಅದರಂತೆ ಆದಿಲ್ ಖಾನ್ರನ್ನು ಮಂಗಳವಾರ ಮುಂಬಯಿಯ ಓಶಿವಾರಾ ಠಾಣೆ ಪೊಲೀಸರು ಅರೆಸ್ಟ್ ಮಾಡಿದ್ದಾರೆ. ಇದೇ ವೇಳೆ ಠಾಣೆಯ ಹೊರಗೆ ರಾಖಿ ಸಾವಂತ್ ಅವರು ಎಚ್ಚರ ತಪ್ಪಿ ಬಿದ್ದಿದ್ದರು.
ಓಶಿವಾರಾ ಪೊಲೀಸರು ಆದಿಲ್ ಖಾನ್ ದುರಾನಿಯನ್ನು ಬಂಧಿಸುತ್ತಿದ್ದಂತೆ ಅದೇ ಠಾಣೆಯ ಹೊರಗೆ ರಾಖಿ ಸಾವಂತ್ ಅವರು ಮಾಧ್ಯಮ ಸಿಬ್ಬಂದಿಗೆ ಬೈಟ್ ಕೊಡುತ್ತಿದ್ದರು. ಇದೇ ವೇಳೆ ಪ್ರಜ್ಞೆ ತಪ್ಪಿದ್ದಾರೆ. ಬಳಲಿದಂತೆ ಕಾಣಿಸುತ್ತಿದ್ದ ಅವರು ಅಲ್ಲೇ ಬಿದ್ದಿದ್ದಾರೆ. ಬಳಿಕ ಅಲ್ಲಿದ್ದವರೆಲ್ಲ ಸೇರಿ ಅವರ ಮೈಮೇಲೆ ನೀರು ಹಾಕಿ, ನೀರು ಕುಡಿಸಿ ಎತ್ತಿ ಕರೆದುಕೊಂಡುಹೋಗಿದ್ದಾರೆ. ಈ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದೆ.
ಇದನ್ನೂ ಓದಿ: Rakhi Sawant: ರಾಖಿ ಸಾವಂತ್ ಪತಿ ಆದಿಲ್ ಖಾನ್ ದುರಾನಿ ಬಂಧನ; ಆತ ಮೋಸಗಾರ ಎಂದ ನಟಿ!
ರಾಖಿ-ಆದಿಲ್ ಸಂಬಂಧ ಸಿಕ್ಕಾಪಟೆ ಕಾಂಪ್ಲಿಕೇಟ್ ಆಗಿದೆ. ಆದಿಲ್ ಖಾನ್ಗೆ ಇನ್ನೊಬ್ಬ ಯುವತಿಯೊಂದಿಗೆ ಅಕ್ರಮ ಸಂಬಂಧವಿದೆ. ಆತ ತನ್ನ ದುಡ್ಡನ್ನೆಲ್ಲ ಲಪಟಾಯಿಸಿದ್ದಾನೆ. ನನ್ನಮ್ಮನ ಸರ್ಜರಿಗೆ ಹಣ ಕೊಡಲಿಲ್ಲ. ನಾನು ಇನ್ನೊಬ್ಬಳು ಶ್ರದ್ಧಾ ವಾಳ್ಕರ್ ಆಗಲು ಸಿದ್ಧಳಿಲ್ಲ ಎಂದು ರಾಖಿ ಸಾವಂತ್ ಅತ್ತುಗೋಳಾಡಿದ್ದರು. ಹಾಗೇ, ಪೊಲೀಸರಿಗೂ ದೂರು ನೀಡಿದ್ದರು. ಅದರ ಬೆನ್ನಲ್ಲೇ ಆದಿಲ್ ಅರೆಸ್ಟ್ ಆಗಿದೆ. ಮಂಗಳವಾರ ರಾಖಿ ಸಹೋದರ ರಾಕೇಶ್ ಸಾವಂತ್ ಇನ್ನಷ್ಟು ಗಂಭೀರ ಆರೋಪಗಳನ್ನು ಮಾಡಿದ್ದಾರೆ. ‘ನನ್ನ ಸೋದರಿ ರಾಖಿಯನ್ನು ಕೊಲ್ಲಲು ಆದಿಲ್ ಖಾನ್ ದುರಾನಿ ಪ್ರಯತ್ನ ಮಾಡಿದ್ದಾನೆ. ಮಂಗಳವಾರ ಕೂಡ ಆಕೆಯೆಡೆಗೆ ಗ್ಲಾಸ್ ಎಸೆದ. ಈ ಮದುವೆಯನ್ನು ಉಳಿಸಿಕೊಳ್ಳಬೇಕು ಎಂದು ರಾಖಿ ತುಂಬ ಯತ್ನಿಸಿದಳು. ಆದರೆ ಆದಿಲ್ ಅದಕ್ಕೆ ಕೊಡಲಿಲ್ಲ’ ಎಂದು ರಾಕೇಶ್ ಹೇಳಿದ್ದಾರೆ.