ಬೆಂಗಳೂರು: ಓಂ ರಾವತ್‌ ನಿರ್ದೇಶನದ, ಪ್ರಭಾಸ್‌ ನಟನೆಯ ಆದಿಪುರುಷ ಸಿನಿಮಾ ದೊಡ್ಡ ಸೋಲನ್ನು ಕಂಡಿದೆ. ರಾಮಾಯಣದ ಕಥೆಯನ್ನಾಧರಿಸಿ ಮಾಡಿದ ಈ ಸಿನಿಮಾದಲ್ಲಿ ರಾಮಾಯಣದ ಪಾತ್ರಗಳನ್ನೇ ಅವಮಾನಿಸಲಾಗಿದೆ ಎನ್ನುವ ದೂರು ಕೇಳಿಬಂದಿತ್ತು. ಅನೇಕರು ರಮಾನಂದ ಸಾಗರ್‌ ಅವರು ನಿರ್ದೇಶಿಸಿದ್ದ ರಾಮಾಯಣ (Ramayana Serial) ಧಾರಾವಾಹಿಯನ್ನು ನೆನಪಿಸಿಕೊಂಡು ಆದಿಪುರುಷ ಸಿನಿಮಾಕ್ಕೆ ಬೈಯಲಾರಂಭಿಸಿದ್ದರು. ಅದರ ಬೆನ್ನಲ್ಲೇ ಇದೀಗ ರಾಮಾಯಣ ಧಾರಾವಾಹಿ ಮತ್ತೆ ಪ್ರಸಾರವಾಗಲು ಸಿದ್ಧವಾಗಿದೆ.
ಹೌದು. ರಮಾನಂದ ಸಾಗರ್‌ ನಿರ್ದೇಶಿಸಿದ್ದ ಜನಪ್ರಿಯ ರಾಮಾಯಣ ಧಾರಾವಾಹಿಯನ್ನು ಶೆಮರೋ ಟಿವಿ ಮರುಪ್ರಸಾರ ಮಾಡಲಿದೆ. ಇದೇ ಜುಲೈ 3ರಿಂದ ಪ್ರತಿದಿನ ಸಂಜೆ 7.30ಕ್ಕೆ ಈ ಧಾರಾವಾಹಿ ಪ್ರಸಾರವಾಗಲಿದೆ.
ಇದನ್ನೂ ಓದಿ: Viral Video : ಕತ್ತಲೆ ತುಂಬಿದ ಮನೆಗೆ ಬೆಳಕು ತಂದ ಐಪಿಎಸ್‌ ಅಧಿಕಾರಿ!
ಈ ರಾಮಾಯಣ ಧಾರಾವಾಹಿಯಲ್ಲಿ ಅರುಣ್‌ ಗೋವಿಲ್‌ ಅವರು ರಾಮನ ಪಾತ್ರ ನಿರ್ವಹಿಸಿದ್ದರೆ, ನಟಿ ದೀಪಿಕಾ ಚಿಕ್ಲಿಯಾ ಅವರು ಸೀತೆಯಾಗಿ ಕಾಣಿಸಿಕೊಂಡಿದ್ದಾರೆ. ಆದಿಪುರುಷ ಸಿನಿಮಾದ ಬಗ್ಗೆ ಮಾತನಾಡಿದ್ದ ಅರುಣ್‌ ಗೋವಿಲ್‌ ಅವರು, ಇದೊಂದು ಹಾಲಿವುಡ್‌ ಕಾರ್ಟೂನ್‌ ಚಿತ್ರದಂತಿದೆ ಎಂದು ಟೀಕಿಸಿದ್ದರು. ಹಾಗೆಯೇ ದೀಪಿಕಾ ಅವರು ರಾಮಾಯಣವನ್ನು ಈ ರೀತಿ ಮನೋರಂಜನೆಗಾಗಿ ಮಾಡಬಾರದು, ರಾಮಾಯಣ ನಮ್ಮ ಸಂಸ್ಕೃತಿಯ ಭಾಗ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದರು.
ಓಂ ರಾವತ್‌ ನಿರ್ದೇಶನ ಮಾಡಿರುವ ಆದಿಪುರುಷ ಸಿನಿಮಾದಲ್ಲಿ ಪ್ರಭಾಸ್‌ ರಾಮನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಬಾಲಿವುಡ್‌ ನಟಿ ಕೃತಿ ಸೆನೂನ್‌ ಸೀತೆಯಾಗಿ ನಟಿಸಿದ್ದಾರೆ. ಸೈಫ್‌ ಅಲಿ ಖಾನ್‌ ಅವರು ರಾವಣನಾಗಿದ್ದಾರೆ. ಸಿನಿಮಾದಲ್ಲಿ ರಾವಣನ ಪಾತ್ರವನ್ನು ವಿಚಿತ್ರವಾಗಿ ಬಿಂಬಿಸಿರುವುದು, ಹಾಗೆಯೇ ಚಿತ್ರದ ಅನೇಕ ಸಂಭಾಷಣೆ ಜನರಿಗೆ ಬೇಸರ ತರಿಸಿತ್ತು. ಸಿನಿ ತಂಡವು ಅನೇಕ ಸಂಭಾಷಣೆಯನ್ನು ಬದಲಾಯಿಸಿದೆಯಾದರೂ ಚಿತ್ರ ವೀಕ್ಷಕರ ಮನ ಗೆಲ್ಲುವಲ್ಲಿ ವಿಫಲವಾಗಿದೆ.