ರಮ್ಯಾ ಎಲ್ಲಿ ಹೋದರು..? ಅಂತಾ ಕೇಳುತ್ತಿದ್ದವರ ಪ್ರಶ್ನೆಗೆ ಉತ್ತರ ಸಿಕ್ಕಿದೆ. ಆದರೆ ಈ ಬಾರಿ ಪಾಲಿಟಿಕ್ಸ್‌ಗೆ ಗುಡ್‌ ಬೈ ಹೇಳಿ ಮತ್ತೊಮ್ಮೆ ಚಿತ್ರರಂಗಕ್ಕೆ ಹಾಯ್‌ ಎಂದಿದ್ದಾರೆ ರಮ್ಯಾ. ‘ಆ್ಯಪಲ್ ಬಾಕ್ಸ್’ (Ramya Production House) ಹೆಸರಲ್ಲಿ ಪ್ರೊಡಕ್ಷನ್‌ ಹೌಸ್‌ ಲಾಂಚ್‌ ಮಾಡಿರುವ ರಮ್ಯಾ ‘ಚಂದನವನ’ಕ್ಕೆ ಗ್ರ್ಯಾಂಡ್‌ ಕಮ್ಬ್ಯಾಕ್ ಮಾಡಿದ್ದಾರೆ. ನಿನ್ನೆಯೇ ಹಿಂಟ್‌ ಕೊಟ್ಟಿದ್ದ ನಟಿ ರಮ್ಯಾ, ನಾಳೆ ಸಿಹಿಸುದ್ದಿ ಕೊಡುತ್ತೇನೆ ಎಂದು ಅಭಿಮಾನಿಗಳ ತಲೆಗೆ ಹುಳ ಬಿಟ್ಟಿದ್ದರು. ಹಬ್ಬದ ಸಂಭ್ರಮದ ಜೊತೆಗೆ ಇಂದು ಆ ಸಿಹಿಸುದ್ದಿ ಏನು ಅನ್ನೋದು ರಿವೀಲ್‌ ಆಗಿದೆ.
ರಮ್ಯಾ ಚಿತ್ರರಂಗಕ್ಕೆ ಮರಳುವ ಮಾತುಗಳು ಗಾಂಧಿನಗರದ ಅಂಗಳದಲ್ಲಿ ಹಲವು ದಿನಗಳಿಂದ ಹರಿದಾಡುತ್ತಿದ್ದವು. ಆದರೆ ಗಣೇಶ ಚತುರ್ಥಿಯ ಶುಭದಿನವೇ ಈ ಮಾತು ನಿಜವಾಗಿದೆ. ಮತ್ತೊಂದು ಕಡೆ ಪ್ರೊಡಕ್ಷನ್‌ ಹೌಸ್‌ಗೆ ರಮ್ಯಾ ‘ಆ್ಯಪಲ್ ಬಾಕ್ಸ್’ ಟೈಟಲ್‌ ಇಟ್ಟಿರೋದು ಏಕೆ..? ಎಂಬ ಪ್ರಶ್ನೆಗೂ ಉತ್ತರ ಸಿಕ್ಕಿದೆ. ಈ ಕುರಿತು ತಮ್ಮ ಟ್ವೀಟ್‌ನಲ್ಲೇ ವಿವರಣೆಯನ್ನೂ ನೀಡಿದ್ದಾರೆ ನಟಿ ರಮ್ಯಾ.
‘ಆ್ಯಪಲ್ ಬಾಕ್ಸ್’ ಯಾಕೆ..?
ಟ್ವಿಟ್ಟರ್‌ ಪೋಸ್ಟ್‌ನಲ್ಲಿ ರಮ್ಯಾ ಬರೆದುಕೊಂಡಂತೆ ‘ಆ್ಯಪಲ್ ಬಾಕ್ಸ್’ ಎಂಬ ಟೈಟಲ್‌ ಏಕೆಂದರೆ, ‘ಅದೊಂದು ಸಾಧಾರಣವಾದ, ಆದರೆ ಅಷ್ಟೇ ಉಪಯುಕ್ತವಾದ, ಪುಟ್ಟ ಮರದ ಪೆಟ್ಟಿಗೆ. ನನ್ನ ಚಿತ್ರರಂಗದ ಪಯಣದುದ್ದಕ್ಕೂ ನಿರಂತರವಾಗಿ ಆಪಲ್ ಬಾಕ್ಸ್ ಜೊತೆಗಿದೆ. ಸೆಟ್ನಲ್ಲಿ ಕೂರಲು ಕುರ್ಚಿಗಳಿಲ್ಲದೇ ಇದ್ದಾಗ ಅಥವಾ ಕ್ಯಾಮರಾದ, ಇಲ್ಲವೇ ನಟರ ಎತ್ತರ ಹೆಚ್ಚಿಸಬೇಕಾದಾಗ ಆಪಲ್ ಬಾಕ್ಸ್ ನೆರವಿಗೆ ಬಂದಿದೆ. ಈ ಪೆಟ್ಟಿಗೆಯ ಸರಳತೆ ನನಗೆ ಸದಾ ಸ್ಫೂರ್ತಿಯಾಗಿ ಪ್ರೇರೇಪಿಸಿದೆ.’ ಎಂದಿದ್ದಾರೆ ಅಭಿಮಾನಿಗಳ ಪಾಲಿನ ‘ಡಿಂಪಲ್‌ ಕ್ವೀನ್’ ನಟಿ ರಮ್ಯಾ.
2 ಸಿನಿಮಾ ರೆಡಿ..!
ಮತ್ತೊಂದು ಕಡೆ ಪ್ರೊಡಕ್ಷನ್‌ ಹೌಸ್‌ ಲಾಂಚ್‌ ಮಾಡುವ ಜೊತೆಗೆ 2 ಚಿತ್ರಗಳನ್ನು ನಿರ್ಮಿಸುತ್ತಿರುವ ಬಗ್ಗೆ ಮಾಹಿತಿ ನೀಡಿದ್ದಾರೆ. ಕೆಜಿಎಫ್‌ ಖದರ್‌ನ ಕೆ.ಆರ್‌.ಜಿ ಸಂಸ್ಥೆ ಜೊತೆಗೆ ರಮ್ಯಾ ಪ್ರೊಡಕ್ಷನ್‌ ಹೌಸ್‌ ಕೈಜೋಡಿಸಿದೆ. ನಟಿ ರಮ್ಯಾ ನಿರ್ಮಿಸಲಿರುವ ಎರಡೂ ಸಿನಿಮಾಗಳನ್ನ ಕೆ.ಆರ್‌.ಜಿ ಸಂಸ್ಥೆ ವಿತರಣೆ ಮಾಡಲಿದೆ. ಇಷ್ಟು ಮಾತ್ರವಲ್ಲದೆ ಒಟಿಟಿ ಪ್ಲಾಟ್‌ ಫಾರಂನಲ್ಲೂ ಸಿನಿಮಾ ಮತ್ತು ವೆಬ್‌ ಸೀರಿಸ್‌ ನಿರ್ಮಿಸಲು ರಮ್ಯಾ ನಿರ್ಧರಿಸಿದ್ದಾರೆ.
ತಮ್ಮ ಹೊಸ ಪ್ರಯತ್ನಕ್ಕೆ ಕೈಜೋಡಿಸಿದವರಿಗೂ ರಮ್ಯಾ ಧನ್ಯವಾದ ಅರ್ಪಿಸಿದ್ದಾರೆ. ನಿರ್ಮಾಪಕ ವಿಜಯ ಕಿರಗಂದೂರ್, ಜಯಣ್ಣ, ಯೋಗಿ ಜಿ ರಾಜ್ ಮತ್ತು ಕಾರ್ತಿಕ್ ಗೌಡ ಅವರಿಗೂ ವಿಶೇಷ ಧನ್ಯವಾದ ಅರ್ಪಿಸಿದ್ದಾರೆ ರಮ್ಯಾ. ಒಟ್ಟಾರೆ ಹಬ್ಬದ ದಿನವೇ ಅಭಿಮಾನಿಗಳಿಗೆ ರಮ್ಯಾ ಶುಭಸುದ್ದಿ ಕೊಟ್ಟಿದ್ದು, ಅಭಿಮಾನಿಗಳು ನೆಚ್ಚಿನ ನಟಿಯ ಪ್ರಯೋಗಕ್ಕೆ ಒಳ್ಳೆಯದಾಗಲಿ ಎಂದು ಹಾರೈಸಿದ್ದಾರೆ. ಆದರೆ ರಮ್ಯಾ ನಟನೆಯನ್ನೂ ಮಾಡ್ತಾರಾ? ಕೇವಲ ಸಿನಿಮಾಗಳ ನಿರ್ಮಾಣ ಮಾಡ್ತಾರಾ? ಎಂಬ ಬಗ್ಗೆ ಸ್ಪಷ್ಟನೆ ಸಿಕ್ಕಿಲ್ಲ. ಮುಂದಿನ ದಿನಗಳಲ್ಲಿ ಈ ಕುರಿತು ನಟಿ ರಮ್ಯಾ ಸಂಪೂರ್ಣ ಮಾಹಿತಿ ನೀಡುವ ಸಾಧ್ಯತೆ ಇದೆ.
ಇದನ್ನೂ ಓದಿ: ರಮ್ಯಾ ‘ಪ್ರೊಡಕ್ಷನ್‌ ಹೌಸ್‌’ ಲಾಂಚ್‌; ನಿನ್ನೆಯೇ ಸುದ್ದಿ ಪ್ರಕಟಿಸಿದ್ದ ‘ವಿಸ್ತಾರ ನ್ಯೂಸ್’!