ಹೈದರಾಬಾದ್: ಟಾಲಿವುಡ್‌ನ ಅಲ್ಲು ಅರ್ಜುನ್‌ ಮತ್ತು ನಟಿ ರಶ್ಮಿಕಾ ಮಂದಣ್ಣ (Rashmika Mandanna) ನಟನೆಯ ʼಪುಷ್ಪಾ: ದಿ ರೈಸ್‌ʼ ಸಿನಿಮಾ ಭಾರತದಾದ್ಯಂತ ಹಿಟ್‌ ಆಗಿತ್ತು. ಇದೀಗ ʼಪುಷ್ಪಾ 2′ ಸಿನಿಮಾದ ಚಿತ್ರೀಕರಣಕ್ಕೆ ಸಿನಿ ತಂಡ ಸಿದ್ಧತೆ ಮಾಡಿಕೊಳ್ಳುತ್ತಿದ್ದು, ಇದರಲ್ಲಿ ರಶ್ಮಿಕಾ ಮಂದಣ್ಣ ಅವರನ್ನು ಕೈಬಿಡಲಾಗುವುದು ಎನ್ನುವ ಸುದ್ದಿಗಳು ಹರಿದಾಡಿವೆ.
ಇದನ್ನೂ ಓದಿ: Rashmika Mandanna | ದಕ್ಷಿಣದ ರೊಮ್ಯಾಂಟಿಕ್‌ ಹಾಡುಗಳನ್ನು ಕಡೆಗಣಿಸುವಷ್ಟು ಮೂರ್ಖಳಲ್ಲ : ರಶ್ಮಿಕಾ ಮಂದಣ್ಣ
ನಟಿ ರಶ್ಮಿಕಾ ಬದಲಾಗಿ ಸಾಯಿ ಪಲ್ಲವಿಯನ್ನು ನಾಯಕ ನಟಿಯನ್ನಾಗಿ ಮಾಡುವುದಕ್ಕೆ ಚಿತ್ರ ತಂಡ ನಿರ್ಧರಿಸಿದೆ. ಅದಕ್ಕಾಗಿ ಸಾಯಿ ಪಲ್ಲವಿ ಅವರ ಬಳಿ ಮಾತನಾಡುತ್ತಿದೆ ಎನ್ನುವ ವದಂತಿಯೊಂದು ಸಿನಿ ಕ್ಷೇತ್ರದಲ್ಲಿ ಹರಿದಾಡಿದೆ. ಈ ಬಗ್ಗೆ ನಟಿ ರಶ್ಮಿಕಾ ಅವರೇ ಮಾತನಾಡಿದ್ದು, ಎಲ್ಲ ಅನುಮಾನಗಳಿಗೆ ತೆರೆ ಎಳೆದಿದ್ದಾರೆ.
ಇತ್ತೀಚೆಗೆ ಸಂದರ್ಶನವೊಂದರಲ್ಲಿ ಮಾತನಾಡಿರುವ ರಶ್ಮಿಕಾ, ʼಪುಷ್ಪಾ 2ʼ ಸಿನಿಮಾದ ಚಿತ್ರೀಕರಣ ಶೀಘ್ರವೇ ಆರಂಭವಾಗಲಿದ್ದು, ಅದರಲ್ಲಿ ತಾವು ಭಾಗಿಯಾಗುವುದಾಗಿ ಹೇಳಿಕೊಂಡಿದ್ದಾರೆ. ಈ ಸಿನಿಮಾ ಮೊದಲನೇ ಭಾಗಕ್ಕಿಂತ ಅದ್ಭುತ ಕಥಾಹಂದರವನ್ನು ಹೊಂದಿದ್ದು, ಅಭಿಮಾನಿಗಳಿಗೆ ಇಷ್ಟವಾಗುವುದರಲ್ಲಿ ಅನುಮಾನವಿಲ್ಲ. ಪುಷ್ಪಾ ಸಿನಿಮಾದಂತೆಯೇ ಪುಷ್ಪಾ 2 ಕೂಡ ಹಿಟ್‌ ಲಿಸ್ಟ್‌ ಸೇರಲಿದೆ ಎಂದು ನಟಿ ಹೇಳಿಕೊಂಡಿದ್ದಾರೆ. ಆ ಮೂಲಕ ಸಿನಿಮಾದಲ್ಲಿ ತಾವೇ ನಾಯಕ ನಟಿಯಾಗಿ ನಟಿಸಿರುತ್ತಿರುವುದಾಗಿ ಸ್ಪಷ್ಟನೆ ಕೊಟ್ಟಿದ್ದಾರೆ.
ಇದನ್ನೂ ಓದಿ: Rashmika Mandanna | ಪುಷ್ಪ-2ಗೆ ನಟಿ ಸಾಯಿ ಪಲ್ಲವಿ ಎಂಟ್ರಿ: ರಶ್ಮಿಕಾ ಮಂದಣ್ಣ ಕೈ ಬಿಟ್ಟಿತಾ ಚಿತ್ರತಂಡ?
ಪುಷ್ಪಾ ಸಿನಿಮಾ ಮೂಲಕ ಯಶಸ್ಸು ಕಂಡಿರುವ ನಿರ್ದೇಶಕ ಸುಕುಮಾರ್‌ ಇದೀಗ ಪುಷ್ಪಾ 2 ಸಿನಿಮಾದಲ್ಲಿ ದೊಡ್ಡ ತಾರಾಗಣವನ್ನೇ ಒಟ್ಟುಗೂಡಿಸಲಿದ್ದಾರೆ ಎನ್ನುವ ಸುದ್ದಿಗಳೂ ಇವೆ. ಈ ಹಿಂದೆ ರಾಮ್‌ಚರಣ್‌ ಅವರೊಂದಿಗೆ ʼರಂಗಸ್ಥಳಂʼನಂತಹ ಹಿಟ್‌ ಸಿನಿಮಾ ಕೊಟ್ಟಿದ್ದ ಅವರು ಈಗ ಈ ಸಿನಿಮಾಕ್ಕೂ ರಾಮ್‌ಚರಣ್‌ ಅವರನ್ನು ಎಳೆದುತರಲಿದ್ದಾರೆಯೇ ಎನ್ನುವ ಚರ್ಚೆಗಳೂ ನಡೆಯುತ್ತಿವೆ. ಈ ಬಗ್ಗೆ ಸಿನಿಮಾ ತಂಡ ಯಾವುದೇ ಮಾಹಿತಿ ಬಿಟ್ಟುಕೊಟ್ಟಿಲ್ಲ.