ಆರ್ಆರ್ಆರ್ ಸೀಕ್ವೆಲ್ (RRR Movie) ಸ್ಕ್ರಿಪ್ಟ್ ಕೆಲಸ ನಡೆಯುತ್ತಿದೆ ಎಂದು ನಿರ್ದೇಶಕ ಎಸ್ಎಸ್ ರಾಜಮೌಳಿ ಅವರ ತಂದೆ ವಿಜಯೇಂದ್ರ ಪ್ರಸಾದ್ ಸಂದರ್ಶನವೊಂದರಲ್ಲಿ ಬಹಿರಂಗಪಡಿಸಿದ್ದಾರೆ. ಬರಹಗಾರ ವಿಜಯೇಂದ್ರ ಪ್ರಸಾದ್ ಇಬ್ಬರು ನಾಯಕರೊಂದಿಗಿನ ಮುಂದಿನ ಭಾಗವನ್ನು ಆಫ್ರಿಕಾದಲ್ಲಿ ಶೂಟಿಂಗ್‌ ಮಾಡಬಹುದು ಎಂದು ಸುಳಿವು ನೀಡಿದ್ದಾರೆ. ಇತ್ತೀಚಿನ ಸಂದರ್ಶನವೊಂದರಲ್ಲಿ ನಿರ್ದೇಶಕ ಎಸ್ಎಸ್ ರಾಜಮೌಳಿ ಅವರ ತಂದೆ ಲೇಖಕ ವಿಜಯೇಂದ್ರ ಪ್ರಸಾದ್ ಅವರಿಗೆ ಆರ್ ಆರ್ ಆರ್ ಸೀಕ್ವೆಲ್ ಕುರಿತು ಪ್ರಶ್ನೆ ಎದುರಾಯಿತು. ಆರ್ ಆರ್ ಆರ್ 2 ನಿರ್ಮಿಸಲು ಯೋಜಿಸುತ್ತಿದ್ದೀರಾ? ಎಂದು ಕೇಳಲಾಯಿತು. ಈ ಪ್ರಶ್ನೆಗೆ ಪ್ರತಿಕ್ರಿಯಿಸಿದ ವಿಜಯೇಂದ್ರ ಪ್ರಸಾದ್ ಅವರು, ”ಹೌದು ಮತ್ತು ಇಲ್ಲ” ಎಂದು ಉತ್ತರಿಸಿದರು.
ಈ ಬಗ್ಗೆ ವಿಜಯೇಂದ್ರ ಪ್ರಸಾದ್ ಮಾತನಾಡಿ “ಆರ್ಆರ್ಆರ್ ಬಿಡುಗಡೆಯಾದ ನಂತರ ನಾನು ರಾಮ್ ಚರಣ್, ಜ್ಯೂನಿಯರ್‌ ಎನ್‌ಟಿಆರ್‌ ಜತೆಗೆ ಆಫ್ರಿಕಾದಲ್ಲಿ ಕಥೆ ಮುಂದುವರಿಯುವ ಮುಂದಿನ ಭಾಗದ ಕಲ್ಪನೆಯನ್ನು ಹಂಚಿಕೊಂಡಿದ್ದೇನೆ” ಎಂದು ಅವರು ಹೇಳಿದರು. ನಿರ್ದೇಶಕರು ಈ ಕಲ್ಪನೆಯನ್ನು ಇಷ್ಟಪಟ್ಟಿದ್ದಾರೆ , ಇನ್ನೂ ಡೆವಲಪ್‌ ಮಾಡಿ ಎಂಬ ಉತ್ತರ ನೀಡಿದರು ಎಂದರು.
ಇದನ್ನೂ ಓದಿ: RRR Movie: ಜಪಾನ್‌ನಲ್ಲಿ 200 ದಿನಗಳ ಕಾಲ ಪ್ರದರ್ಶನ ಕಂಡ ಆರ್ಆರ್ಆರ್: ಕಲೆಕ್ಷನ್‌ ಎಷ್ಟು?
ರಾಜಮೌಳಿ ಅವರು ಪ್ರಸ್ತುತ ಸೂಪರ್ ಸ್ಟಾರ್ ಮಹೇಶ್ ಬಾಬು ಅವರೊಂದಿಗೆ ಕೆಲಸ ಮಾಡುತ್ತಿದ್ದಾರೆ. ಮುಂಬರುವ ತಮ್ಮ ಈ ಯೋಜನೆ ಪೂರ್ಣಗೊಳಿಸಿದ ನಂತರ ಬೇರೆ ಸಿನಿಮಾ ಬಗ್ಗೆ ಯೋಚಿಸುತ್ತಾರೆ ಎಂದು ವಿಜಯೇಂದ್ರ ಪ್ರಸಾದ್ ತಿಳಿಸಿದ್ದಾರೆ. ಇಬ್ಬರೂ ನಟರಿಗೆ ಸ್ಕ್ರಿಪ್ಟ್ ಇಷ್ಟವಾದಲ್ಲಿ, ಅವರಿಗೆ ಸಮಯವಿದ್ದರೆ ರಾಜಮೌಳಿ ಈ ಕಥೆಯ ಮೇಲೆ ಕೆಲಸ ಮಾಡಲಿದ್ದಾರೆ ಎಂದು ಸಹ ತಿಳಿಸಿದ್ದಾರೆ.