ಮುಂಬೈ: ಸಲ್ಮಾನ್‌ ಖಾನ್‌ (Salman Khan) ನಟಿಸುತ್ತಿದ್ದ ಎಲ್ಲ ಸಿನಿಮಾಗಳು ಹಿಟ್‌ ಆಗುತ್ತಿದ್ದ ಕಾಲವೊಂದಿತ್ತು. ಆದರೆ ಈಗ ಕಾಲ ಬದಲಾಗಿದೆ. ಇತ್ತೀಚೆಗೆ ಬಿಡುಗಡೆಯಾದ ಸಲ್ಮಾನ್‌ ಅವರ ‘ಕಿಸಿ ಕಾ ಭಾಯ್ ಕಿಸಿ ಕಿ ಜಾನ್’ ಸಿನಿಮಾ ಕೂಡ ಮಕಾಡೆ ಮಲಗಿದೆ. ಅದರಿಂದಾಗಿ ನಟ ಹೊಸದೊಂದು ತೀರ್ಮಾನವನ್ನು ಮಾಡಿದ್ದಾರೆ. ಇನ್ನುಮುಂದೆ ಯಾವುದೇ ಕಾರಣಕ್ಕೂ, ಸಕ್ಸೆಸ್‌ ಸಿಗದೆ ಒದ್ದಾಡುತ್ತಿರುವ ನಿರ್ದೇಶಕರ ಸಿನಿಮಾಗಳಲ್ಲಿ ನಟಿಸುವುದಿಲ್ಲ ಎಂದು ಪ್ರತಿಜ್ಞೆ ಮಾಡಿದ್ದಾರೆ.
ಹೌದು. ಈವರೆಗೆ ಸಲ್ಮಾನ್‌ ಅವರ ಸಿನಿಮಾಗಳು ಸೋತಿದ್ದಕ್ಕೆ ಕಾರಣ ಅವರ ಸ್ಕ್ರಿಪ್ಟ್‌ ಆಯ್ಕೆಯಲ್ಲಿನ ಲೋಪ. ಸಲ್ಮಾನ್‌ ಕರುಣಾಮಯಿ ಆಗಿರುವುದರಿಂದ ಯಶಸ್ಸಿಗಾಗಿ ಒದ್ದಾಡುತ್ತಿದ್ದ ನಿರ್ದೇಶಕರ ಸಿನಿಮಾಗಳನ್ನೂ ಒಪ್ಪಿಕೊಳ್ಳುತ್ತಿದ್ದರಂತೆ. ಆದರೆ ಇನ್ನು ಮುಂದೆ ಆ ರೀತಿ ಮಾಡುವುದಿಲ್ಲವಂತೆ. ಹಾಗೆಯೇ ಸ್ನೇಹಿತರು ಮತ್ತು ಸಂಬಂಧಿಗಳ ಸಿನಿಮಾವನ್ನೂ ಅವರು ಒಪ್ಪಿಕೊಳ್ಳದಿರಲು ನಿರ್ಧರಿಸಿದ್ದಾರೆ ಎಂದು ಅವರ ಸ್ನೇಹಿತರೊಬ್ಬರು ಮಾಧ್ಯಮಗಳಿಗೆ ತಿಳಿಸಿದ್ದಾರೆ.
ಇದನ್ನೂ ಓದಿ: Viral News : ಮಳೆಯಲ್ಲಿ ಜೊಮೆಟೊ ಡೆಲಿವರಿ ಏಜೆಂಟ್ ಡ್ಯಾನ್ಸ್! ಈ ಫೋಟೋ ಹಿಂದಿನ ರಹಸ್ಯ ಏನು?
ಇನ್ನು ಮುಂದೆ ಒಳ್ಳೆಯ ಕಥೆಗಾಗಿ ಸಲ್ಮಾನ್‌ ಕಾಯಲಿದ್ದಾರೆ. ಈವರೆಗೆ ಮಾಡಿರದಂತಹ ಪಾತ್ರಗಳಿಗಾಗಿ ಅವರು ಕಾಯಲಿದ್ದು, ಅಂತಹ ಕಥೆಯನ್ನಿಟ್ಟುಕೊಂಡು ಬರುವವರಿಗೆ ಮಾತ್ರ ಓಕೆ ಎಂದು ಹೇಳಲಿದ್ದಾರೆ ಎಂದು ಅವರ ಸ್ನೇಹಿತರು ತಿಳಿಸಿದ್ದಾರೆ.
ಈ ಹಿಂದೆ ಸಲ್ಮಾನ್‌ ಖಾನ್‌ ಮತ್ತು ಖ್ಯಾತ ನಿರ್ದೇಶಕ ಸಂಜಯ್‌ ಲೀಲಾ ಭನ್ಸಾಲಿ ಅವರು ಜತೆಗೂಡಿ ಸಿನಿಮಾವೊಂದನ್ನು ಮಾಡಲಿದ್ದಾರೆ ಎಂದು ಸುದ್ದಿಯಾಗಿತ್ತು. ಅದಕ್ಕೆ ʼಇನ್ಶಾಅಲ್ಲಾಹ್’ ಎಂದು ಹೆಸರನ್ನೂ ಕೊಡಲಾಗಿತ್ತು. ಆದರೆ ಸಿನಿಮಾ ವಿಚಾರದಲ್ಲಿ ಸಲ್ಮಾನ್‌ ಮತ್ತು ಭನ್ಸಾಲಿ ನಡುವೆ ವೈಮನಸ್ಸು ಉಂಟಾಗಿ ಆ ಕಥೆ ಅಲ್ಲೇ ಉಳಿದುಕೊಂಡಿತ್ತು. ಆದರೆ ಆ ಸ್ಕ್ರಿಪ್ಟ್‌ ಸಲ್ಮಾನ್‌ಗೆ ಇಷ್ಟವಾಗಿದ್ದ ಹಿನ್ನೆಲೆಯಲ್ಲಿ ಇದೀಗ ಅವರು ಮತ್ತೆ ಭನ್ಸಾಲಿ ಅವರ ಬಳಿ ಹೋಗಲಿದ್ದಾರೆ ಎಂದು ಹೇಳಲಾಗಿದೆ.
ಇದನ್ನೂ ಓದಿ: Viral News : ಮಂಡ್ಯದಲ್ಲಿ ಬೈಕ್‌ ರೈಡಿಂಗ್‌ ವೇಳೆ ಎದ್ದುಬಂದ ಹಾವು; ಗಾಬರಿಯಾಗಿ ಜಿಗಿದೇ ಬಿಟ್ಟ ಸವಾರ
ಇನ್ಶಾಅಲ್ಲಾಹ್ ಸಿನಿಮಾದಲ್ಲಿ ಕೆಲಸ ಮಾಡಲು ಆರಂಭಿಸಿದ್ದ ಪ್ರೊಡಕ್ಷನ್ ಡಿಸೈನರ್ ಮತ್ತು ಸೆಲೆಬ್ರಿಟಿ ಇಂಟೀರಿಯರ್ ಡಿಸೈನರ್ ರೂಪಿನ್ ಸುಚಕ್ ಅವರು ಸಿನಿಮಾ ಕೆಲಸ ನಿಂತುಹೋಗಿದ್ದರ ಬಗ್ಗೆ ಈ ಹಿಂದೆ ಮಾಹಿತಿ ಹಂಚಿಕೊಂಡಿದ್ದರು. “ಸಲ್ಮಾನ್‌ ಸಿನಿಮಾ ಸೆಟ್‌ನಿಂದ ವಾಪಸ್‌ ಹೋಗಿದ್ದಾರೆ. ಸಲ್ಮಾನ್‌ ಮತ್ತು ಭನ್ಸಾಲಿ ಒಟ್ಟಿಗೆ ಸಿನಿಮಾ ಮಾಡುವುದಿಲ್ಲ. ನಾನು ಈ ಸಿನಿಮಾದ ಪ್ರಿ ಪ್ಲಾನಿಂಗ್‌ಗೆಂದು ಒಂದು ವರ್ಷ ಕಳೆದಿದ್ದೆ. ಅಮೆರಿಕದಲ್ಲಿ ಲೊಕೇಶನ್‌ ಹುಡುಕಾಟಕ್ಕೆಂದೇ ಮೂರು ತಿಂಗಳು ಕಳೆದಿದ್ದೆವು” ಎಂದು ಅವರು ಹೇಳಿಕೊಂಡಿದ್ದರು.
ಪ್ರೇಮ ಕಥೆಯನ್ನು ಹೊಂದಿರುವ ಈ ಸಿನಿಮಾದಲ್ಲಿ ನಟಿಸುವುದಕ್ಕೆ ಸಲ್ಮಾನ್‌ ಮತ್ತೆ ಮನಸ್ಸು ತೋರಿರುವುದಾಗಿ ಹೇಳಲಾಗುತ್ತಿದೆ. ಹಾಗೊಂದು ವೇಳೆ ಆದರೆ ಸದ್ಯದಲ್ಲೇ ಇನ್ಶ್‌ಅಲ್ಲಾಹ್‌ ಮತ್ತೆ ಸೆಟ್ಟೇರಲಿದೆ.