ಬೆಂಗಳೂರು: ಮೋಹಕ ತಾರೆ ರಮ್ಯಾ ಹೊಸ ಅವತಾರ ಕೊನೆಗೂ ರಿವೀಲ್‌ ಆಗಿದೆ. ಅವರು ತಮ್ಮದೇ ಪ್ರೊಡಕ್ಷನ್‌ ಹೌಸ್ ಮೂಲಕ ಸ್ಯಾಂಡಲ್‌ವುಡ್‌ಗೆ ರೀಎಂಟ್ರಿ ಕೊಟ್ಟಿದ್ದಾರೆ. ಬುಧವಾರ ಸಿಹಿಸುದ್ದಿ ನೀಡುವುದಾಗಿ ಮಂಗಳವಾರ ಟ್ವೀಟ್‌ ಮಾಡಿ ಸಂಚಲನ ಸೃಷ್ಟಿಸಿದ್ದ ರಮ್ಯಾ ಅಲಿಯಾಸ್‌ ದಿವ್ಯಸ್ಪಂದನ ಈಗ ನಿರ್ಮಾಪಕಿಯಾಗಿ ಹೊರಹೊಮ್ಮಿದ್ದಾರೆ.
ತಮ್ಮ ಪ್ರೊಡಕ್ಷನ್‌ ಹೌಸ್ ಅನ್ನು ಗಣೇಶ ಹಬ್ಬದಂದು ಲಾಂಚ್‌ ಮಾಡಿರುವ ನಟಿ ರಮ್ಯಾ, ‘ಆ್ಯಪಲ್ ಬಾಕ್ಸ್‌ ಸ್ಟುಡಿಯೋಸ್’ ಎಂದು ಹೆಸರಿಟ್ಟಿದ್ದಾರೆ.
ಒಂದು ಕಾಲದಲ್ಲಿ ಚಂದನವನದಲ್ಲಿ ಮಿಂಚು ಹರಿಸಿದ್ದ ನಟಿ ರಮ್ಯಾ ಕೆಲಕಾಲ ಸ್ಯಾಂಡಲ್‌ವುಡ್‌ ಅಂಗಳದಿಂದ ಮರೆಯಾಗಿದ್ದರು. ಆದರೆ, ಇದೀಗ ಗ್ರ್ಯಾಂಡ್‌ ಕಂಬ್ಯಾಕ್‌ ಮಾಡಲು ನಟಿ ರಮ್ಯಾ ಕಹಳೆ ಮೊಳಗಿಸಿದ್ದಾರೆ. ‘ಆ್ಯಪಲ್ ಬಾಕ್ಸ್‌ ಸ್ಟುಡಿಯೋಸ್’ ಹೆಸರಲ್ಲಿ ಗಣೇಶ ಚತುರ್ಥಿಯ ದಿನ ಶುಭ ಸಮಾಚಾರ ತಿಳಿಸಿದ್ದಾರೆ. ಸದ್ಯ ರಮ್ಯಾ ಟ್ವೀಟ್‌ ಸೋಷಿಯಲ್‌ ಮೀಡಿಯಾದಲ್ಲಿ ಟ್ರೆಂಡ್‌ ಕ್ರಿಯೇಟ್‌ ಮಾಡುತ್ತಿದೆ.
ಇದನ್ನೂ ಓದಿ | ಡಿಂಪಲ್‌ ಕ್ವೀನ್‌ ಕೊಡೋ ಸ್ವೀಟ್‌ ನ್ಯೂಸ್ ಏನು? ರಿವೀಲ್‌ ಆಯ್ತಾ ರಮ್ಯಾ ಹೊಸ ಪ್ಲ್ಯಾನ್!
ಫ್ಯಾನ್ಸ್‌ಗೆ ಗಿಫ್ಟ್..!
ಪವರ್‌ ಸ್ಟಾರ್‌ ಡಾ. ಪುನೀತ್‌ ರಾಜ್‌ಕುಮಾರ್‌ ಜತೆ ʼಅಭಿʼ ಸಿನಿಮಾ ಮೂಲಕ ರಮ್ಯಾ ಚಿತ್ರರಂಗಕ್ಕೆ ಎಂಟ್ರಿ ಕೊಟ್ಟಿದ್ದರು. ಇದಾದ ಬಳಿಕ ರಮ್ಯಾ ಹಿಂದಿರುಗಿ ನೋಡಿದ್ದೇ ಇಲ್ಲ. ಬಳಿಕ ಎಕ್ಸ್‌ಕ್ಯೂಸ್‌ಮಿ, ಅಮೃತಧಾರೆ, ಆಕಾಶ್‌, ಅರಸು, ಜಸ್ಟ್‌ ಮಾತ್‌ ಮಾತಲ್ಲಿ, ಸಂಜು ವೆಡ್ಸ್‌ ಗೀತಾ ಸೇರಿದಂತೆ ಅನೇಕ ಸೂಪರ್‌ ಹಿಟ್‌ ಮತ್ತು ಬ್ಲಾಕ್‌ ಬಸ್ಟರ್‌ ಸಿನಿಮಾಗಳಲ್ಲಿ ನಟಿಸಿದ್ದರು.
2014ರ ಬಳಿಕ ರಮ್ಯಾ ಸಿನಿಮಾ ಜೀವನ ನಿಧಾನಗತಿಯಲ್ಲಿ ಸಾಗಿತ್ತು. ಬಳಿಕ ಅವರು ರಾಜಕೀಯಕ್ಕೆ ಎಂಟ್ರಿ ಕೊಟ್ಟು, ಸಂಸದೆಯೂ ಆಗಿದ್ದರು. ಈ ನಂತರ ರಮ್ಯಾ ಸಿನಿಮಾ ಜೀವನದಿಂದ ಬಹಳವೇ ದೂರ ಉಳಿದಿದ್ದರು. ಆದರೆ, ಈಗ ನಿರ್ಮಾಣ ಕ್ಷೇತ್ರಕ್ಕೆ ಕಾಲಿಡುವ ಮೂಲಕ ಮತ್ತೆ ಸಿನಿಜರ್ನಿಯನ್ನು ಆರಂಭ ಮಾಡಿದ್ದು, ಅಭಿಮಾನಿಗಳಿಗೆ ಬಿಗ್‌ ಗಿಫ್ಟ್ ಕೊಟ್ಟಿದ್ದಾರೆ.
ರಾಜ್ ಬಿ. ಶೆಟ್ಟಿ ನಿರ್ದೇಶನದಲ್ಲಿ ಮೊದಲ ಚಿತ್ರ?
ಇದರ ಬೆನ್ನಲ್ಲೇ ಮತ್ತೊಂದು ಸುದ್ದಿ ದಟ್ಟವಾಗಿದೆ. ‘ಆ್ಯಪಲ್ ಬಾಕ್ಸ್‌ ಸ್ಟುಡಿಯೋಸ್’ನ ಪ್ರಥಮ ಸಿನಿಮಾಗೆ ರಾಜ್ ಬಿ. ಶೆಟ್ಟಿ ನಿರ್ದೇಶನ ಮಾಡುವ ನಿರೀಕ್ಷೆ ಇದೆ. ಆದರೆ ಈ ಕುರಿತು ಇನ್ನೂ ಅಧಿಕೃತ ಹೇಳಿಕೆ ಲಭ್ಯವಾಗಿಲ್ಲ. ಆದರೆ ಗಾಂಧಿನಗರ ಗಲ್ಲಿಗಳಲ್ಲಿ ನಟಿ ರಮ್ಯಾ ತೀರ್ಮಾನ ಸಖತ್‌ ಸದ್ದು ಮಾಡುತ್ತಿದೆ. ಸದ್ಯದಲ್ಲೇ ರಮ್ಯಾ ತಮ್ಮ ಮೊದಲ ಪ್ರಾಜೆಕ್ಟ್‌ ಲಾಂಚ್‌ ಮಾಡಲಿದ್ದಾರೆ.
ಇದನ್ನೂ ಓದಿ | ‘ಕೆಜಿಎಫ್-2’ ಸರಿಯಿಲ್ಲ ಎಂದಿದ್ದ ವಿವಾದಾತ್ಮಕ ಸಿನಿಮಾ ವಿಮರ್ಶಕ ಜೈಲುಪಾಲು!