ಬೆಂಗಳೂರು: ಕಳೆದ ಎರಡು ದಿನಗಳಿಂದ ಸ್ಯಾಂಡಲ್‌ವುಡ್ ಹಲವು ಸೆಲೆಬ್ರಿಟಿಗಳು ಒಂದಷ್ಟು ವಿಚಾರಗಳನ್ನು ಹೇಳಿಕೊಂಡು ‘ಮರ್ಯಾದೆ ಪ್ರಶ್ನೆ’ (Maryade Prashne) ಎಂದು ಪೋಸ್ಟ್ ಮಾಡಿದ್ದರು. ನಿರ್ದೇಶಕ ಸಿಂಪಲ್ ಸುನಿಯಿಂದ ಹಿಡಿದು ನಿರೂಪ್ ಭಂಡಾರಿವರೆಗೂ ತಮಗೆ ಎದುರಾಗುತ್ತಿರುವ ಪ್ರಶ್ನೆಗಳನ್ನು ತಮ್ಮ ಇನ್‌ಸ್ಟಾಗ್ರಾಂ ಖಾತೆಗಳಲ್ಲಿ ಶೇರ್ ಮಾಡಿಕೊಳ್ಳುತ್ತಿದ್ದರು. ಇದೀಗ ಈ ಬಗ್ಗೆ ಉತ್ತರ ಸಿಕ್ಕಿದೆ. ‘ಮರ್ಯಾದೆ ಪ್ರಶ್ನೆ’ ಇದು ಚಿತ್ರದ ಶೀರ್ಷಿಕೆ. ‘ಸಕ್ಕತ್ ಸ್ಟುಡಿಯೊ’ ಮೂಲಕ ಆರ್ಜೆ ಪ್ರದೀಪ್ ಅವರು ನಿರ್ಮಾಣ ಮಾಡುತ್ತಿದ್ದಾರೆ. ಪೋಸ್ಟರ್ನಲ್ಲಿರುವ ‘ದುಡ್ಡಿರೋರಿಗೆ ಎಲ್ಲಾ ದುಡಿಯೋರಿಗೆ ಏನೂ ಇಲ್ಲ’ ಲೈನ್ ಕೂಡ ಇದೆ.
ಯಾರೆಲ್ಲ ಏನೆಲ್ಲ ಪೋಸ್ಟ್ ಹಾಕಿದ್ರು?
ನಟಿ ನಿಶ್ವಿಕಾ ನಾಯ್ಡು “ಹಿತ್ತಲಕ ಕರಿಬ್ಯಾಡ ಮಾವ.. ಮರ್ಯಾದೆ ಪ್ರಶ್ನೆ” ಎಂದು ಪೋಸ್ಟ್ ಮಾಡಿದ್ದರು. ಇದು ‘ಕರಟಕ ದಮನಕ’ ಸಿನಿಮಾದ ಹಾಡಿನ ಸಾಲು. “ತಪ್ಪು ಮಾಡಿಲ್ಲ ಅಂದರೆ, ತಲೆ ತಗ್ಗಿಸಬೇಡ.. ಮರ್ಯಾದೆ ಪ್ರಶ್ನೆ” ಎಂದು ನಟ ನಿರೂಪ್ ಭಂಡಾರಿ ಪೋಸ್ಟ್ ಮಾಡಿದ್ದರು.ನಟಿ ಸಂಯುಕ್ತಾ ಹೊರನಾಡು ” ಒಳ್ಳೆಯವರಾಗಿ ಇರುವುದಕ್ಕೆ ಕಾಸು ಬೇಕಾ? ಮರ್ಯಾದೆ ಪ್ರಶ್ನೆ” ಎಂದು ಪ್ರಶ್ನೆ ಮಾಡಿದ್ದರು. ಹಾಗೇ ನಿರ್ದೇಶಕ ಸಿಂಪಲ್ ಸುನಿ “ಅವತಾರ ಪುರುಷ 2 ಸಿನಿಮಾ ಗೆಲ್ಲಲೇ ಬೇಕು. ಮರ್ಯಾದೆ ಪ್ರಶ್ನೆ” ಎಂದು ಪೋಸ್ಟ್ ಮಾಡಿದ್ದರು. ಅದೇ ಸೋನು ಗೌಡ “ಶ್ರೀನಿವಾಸನ ಕೃಪೆ ಫಿಟ್ ಆಗ್ಬೇಕು.. ಮರ್ಯಾದೆ ಪ್ರಶ್ನೆ” ಎಂದು ಪೋಸ್ಟ್ ಮಾಡಿದ್ದರು. “ಕಾಸು ಕೊಡ್ತೀರ. ಆದರೆ, ಜಿಮ್ಗೆ ಬರೋದೇ ಇಲ್ಲ.. ಮರ್ಯಾದೆ ಪ್ರಶ್ನೆ” ಎಂದು ಸೆಲೆಬ್ರಿಟಿ ಟ್ರೇನರ್ ಶ್ರೀನಿವಾಸ್ಗೌಡ ಪೋಸ್ಟ್ಹಾಕಿದ್ದರು.
ಇದನ್ನೂ ಓದಿ: Arbbie Movie: ಅಣ್ಣಾಮಲೈ ನಟಿಸಿದ ಮೊದಲ ಕನ್ನಡದ ಸಿನಿಮಾ ಟ್ರೈಲರ್‌ ಔಟ್‌!
ಈ ರೀತಿ ಪೋಸ್ಟ್ ಯಾಕೆ?
ಈ ಬಗ್ಗೆ ಪ್ರದೀಪ್ ಮಾತನಾಡಿʻʻಈ ಮರ್ಯಾದೆ ಪ್ರಶ್ನೆ ಎನ್ನುವುದು ಸಿನಿಮಾ ಟೈಟಲ್‌. ಮಧ್ಯಮವರ್ಗದವರ ಭಾವನೆಗಳನ್ನು ಹೇಳುವ ಸಿನಿಮಾ. ‘ದುಡ್ಡಿರೋರಿಗೆ ಎಲ್ಲಾ ದುಡಿಯೋರಿಗೆ ಏನೂ ಇಲ್ಲ’ ಎಂಬ ಲೈನ್ ಮೇಲೆ ಸಿನಿಮಾದ ಕಥೆ ಸಾಗಲಿದೆ. ಒಮ್ಮೆ ದುಡ್ಡು ಮಾಡುತ್ತೇವೆ. ಆ ಹೋಪ್ನಲ್ಲೇ ಎಲ್ಲರೂ ಬದುಕುತ್ತಿರುತ್ತೇವೆ. ಆ ಎಮೋಷನ್ ಸಿನಿಮಾದಲ್ಲಿದೆʼʼಎಂದರು.
ಈ ಚಿತ್ರಕ್ಕೆ ನಾಗರಾಜ ಸೋಮಯಾಜಿ ನಿರ್ದೇಶನ ಮಾಡಿದ್ದಾರೆ. ಅವರು ಈ ಮೊದಲು ಸಂಚಾರಿ ವಿಜಯ್ ನಟನೆಯ ‘ಪುಗ್ಸಟ್ಟೆ ಲೈಫು’ ಚಿತ್ರವನ್ನು ನಿರ್ಮಾಣ ಮಾಡಿದ್ದರು.