ಬೆಂಗಳೂರು: ನಟ ಶಾರುಖ್ ಖಾನ್ (Shah Rukh Khan) ಅವರ ಮುಂಬರುವ ಚಿತ್ರ ʻಜವಾನ್ʼ ಸಿನಿಮಾ ಬಿಡುಗಡೆಯ ಬಗ್ಗೆ ಚರ್ಚೆಗಳು ಆಗುತ್ತಿತ್ತು. ಇದರ ಬೆನ್ನಲ್ಲೇ ಶಾರುಖ್ ನಿರ್ದೇಶಕ ಅಟ್ಲೀ ಅವರ ಮನೆಗೆ ಭೇಟಿ ಕೊಟ್ಟಿದ್ದಾರೆ. ಇದೀಗ ನಟ ಟ್ವೀಟ್‌ನಲ್ಲಿ ಜವಾನ್ ಬಿಡುಗಡೆಯ ದಿನಾಂಕವನ್ನು ಪ್ರಕಟಿಸಿದ್ದಾರೆ. ಅಟ್ಲೀ ನಿರ್ದೇಶನದ ಜವಾನ್ ಸಿನಿಮಾ ಸೆಪ್ಟೆಂಬರ್ 7ರಂದು ಥಿಯೇಟರ್‌ಗಳಲ್ಲಿ ಬಿಡುಗಡೆಯಾಗಲಿದೆ. ಇದಕ್ಕೂ ಮೊದಲು ಜೂನ್‌ನಲ್ಲಿ ಬಿಡುಗಡೆ ಮಾಡಲು ಚಿತ್ರತಂಡ ನಿರ್ಧರಿಸಿತ್ತು.
ಶಾರುಖ್ ಅವರು ಹಂಚಿಕೊಂಡ ಹೊಸ ಲುಕ್‌ನಲ್ಲಿ ಮೆಸ್ಸಿ ಹೇರ್‌ನೊಂದಿಗೆ ಕಾಣಿಸಿಕೊಂಡಿದ್ದಾರೆ. ಫೋಟೊವನ್ನು ಹಂಚಿಕೊಂಡ ಶಾರುಖ್ ಅಭಿಮಾನಿಗಳಿಗೆ, “ಎಲ್ಲರಿಗೂ ಧನ್ಯವಾದಗಳು. ಜವಾನ್ ಪೋಸ್ಟರ್‌ನಲ್ಲಿ ನನ್ನ ಮುಖ ಕಾಣಿಸುತ್ತಿಲ್ಲ ಎಂದು ಕೆಲವರು ಹೇಳಿದ್ದಾರೆ. ಹೀಗಾಗಿ ನನ್ನ ಮುಖವನ್ನು ಕಾಣಿಸುವಂತೆ ಇಲ್ಲಿ ಪೋಸ್ಟ್‌ ಮಾಡಿದ್ದೇನೆ. ನಿರ್ದೇಶಕರಿಗೆ ಮತ್ತು ನಿರ್ಮಾಪಕರಿಗೆ ಹೇಳಬೇಡಿ. ಸೆಪ್ಟೆಂಬರ್ 7ರಂದು ಚಿತ್ರಮಂದಿರದಲ್ಲಿ ನಿಮ್ಮನ್ನು ಭೇಟಿಯಾಗಲು ಆಶಿಸುತ್ತೇನೆ. ಲವ್ ಯು ಮತ್ತು ಬೈ.”ಎಂದು ಬರೆದುಕೊಂಡಿದ್ದಾರೆ. ಇದಕ್ಕೂ ಮೊದಲು, ಶಾರುಖ್ ಜವಾನ್ ಸಿನಿಮಾದ ಹೊಸ ಟೀಸರ್ ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಂಡಿದ್ದಾರೆ.
ಇದನ್ನೂ ಓದಿ: Shah Rukh Khan: ʻಜವಾನ್ʼ ರಿಲೀಸ್‌ ವಿಳಂಬ ವದಂತಿಗಳ ಬೆನ್ನಲ್ಲೇ ಅಟ್ಲೀ ಮನೆಯಲ್ಲಿ ಕಾಣಿಸಿಕೊಂಡ ಶಾರುಖ್
ಶಾರುಖ್ ಪೋಸ್ಟ್‌
ಜವಾನ್ ಹಿಂದಿ, ತಮಿಳು ಮತ್ತು ತೆಲುಗು ಭಾಷೆಗಳಲ್ಲಿ ವಿಶ್ವದಾದ್ಯಂತ ಬಿಡುಗಡೆಯಾಗಲಿದೆ. ಚಿತ್ರದಲ್ಲಿ ನಯನತಾರಾ ನಾಯಕಿಯಾಗಿ ನಟಿಸಿದ್ದಾರೆ. ಸುನಿಲ್ ಗ್ರೋವರ್, ಪ್ರಿಯಾಮಣಿ, ವಿಜಯ್ ಸೇತುಪತಿ, ಸನ್ಯಾ ಮಲ್ಹೋತ್ರಾ ಮತ್ತು ರಿದ್ಧಿ ಡೋಗ್ರಾ ಕೂಡ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ದೀಪಿಕಾ ಪಡುಕೋಣೆ, ವಿಜಯ್ ದಳಪತಿ, ಸಂಜಯ್ ದತ್ ಮತ್ತು ಅಲ್ಲು ಅರ್ಜುನ್ ಕೂಡ ಚಿತ್ರದಲ್ಲಿ ವಿಶೇಷ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ ಎಂದು ಹೇಳಲಾಗಿದೆ. ಕೆಲವು ದಿನಗಳ ಹಿಂದೆ, ಚಿತ್ರದ ಸೆಟ್‌ಗಳಿಂದ ಶಾರುಖ್ ಮತ್ತು ದೀಪಿಕಾ ಅವರ ಕೆಲವು ಚಿತ್ರಗಳು ಲೀಕ್‌ ಆಗಿದ್ದವು.
ಜವಾನ್ ಸಿನಿಮಾದ ಹೊಸ ಟೀಸರ್
ಶಾರುಖ್ ಅವರ ಪಠಾಣ್‌ ಸಿನಿಮಾ ರಿಲೀಸ್‌ ಆಗಿ ಸಖತ್‌ ಹಿಟ್‌ ಕಂಡಾಯ್ತು. ಇನ್ನು ಎರಡನೇ ಸಿನಿಮಾ ಅಟ್ಲೀ ನಿರ್ದೇಶನದ ‘ಜವಾನ್’. ಹಾಗೇ ಮೂರನೇ ಸಿನಿಮಾ ರಾಜ್‌ಕುಮಾರ್ ಹಿರಾನಿ ನಿರ್ದೇಶನದ ‘ಡಂಕಿ’ ಬಿಡುಗಡೆಯಾಗಬೇಕಿದೆ.