ಬೆಂಗಳೂರು: ಡಾನ್ ಮತ್ತು ಡಾನ್ 2 ಸಿನಿಮಾಗಳನ್ನು ಇಂದಿಗೂ ಜನರು ಮರೆತಿಲ್ಲ. ಶಾರುಖ್ ಖಾನ್ (Shah Rukh Khan) ಅವರು ಮಾಸ್‌ ಲುಕ್‌ನಲ್ಲಿ ಡಾನ್ ರೂಪದಲ್ಲಿ ಕಾಣಿಸಿಕೊಂಡಿದ್ದ ಸಿನಿಮಾಗಳು ಸಾಕಷ್ಟು ಯಶಸ್ಸು ಕಂಡಿದ್ದವು. ಆದರೆ ಇದೀಗ ಬಾಲಿವುಡ್‌ಗೆ ಶಾರುಖ್ ಖಾನ್ ಬದಲಾಗಿ ಹೊಸ ಡಾನ್ ಎಂಟ್ರಿ ಕೊಡುತ್ತಿದ್ದಾರೆ. ಫರ್ಹಾನ್ ಅಖ್ತರ್ ಅವರ ನಿರ್ದೇಶನದ ಡಾನ್ 3 ಸಿನಿಮಾದ (Don 3 Movie) ಟೀಸರ್‌ ಬಿಡುಗಡೆ ಮಾಡಲಾಗಿದ್ದು, ಅದರಲ್ಲಿ ರಣವೀರ್ ಸಿಂಗ್ (Ranveer Singh) ಅವರನ್ನು ಡಾನ್ ಆಗಿ ಪರಿಚಯಿಸಲಾಗಿದೆ. ಆದರೆ ಟೀಸರ್‌ ರಿಲೀಸ್ ಆದಾಗಿನಿಂದ ಟ್ರೋಲಿಗರ ಬಾಯಿಗೆ ಆಹಾರವಾಗುತ್ತಿದೆ. ಟೀಕೆ ಮಾಡುವವರಿಗೆ ನಿರ್ದೇಶಕ ಫರ್ಹಾನ್ ಅಖ್ತರ್ (Farhan Akhtar) ಸಂದರ್ಶನವೊಂದರಲ್ಲಿ ತಿರುಗೇಟು ನೀಡಿದ್ದಾರೆ.
ನಿರ್ದೇಶಕ ಫರ್ಹಾನ್ ಅಖ್ತರ್ ಡಾನ್ 2 ಬಿಡುಗಡೆಯಾದ 12 ವರ್ಷಗಳ ನಂತರ ಹೊಸ ಯೋಜನೆಯಲ್ಲಿ ಮತ್ತೆ ಮುಂದುವರಿಯುತ್ತಿರುವುದು ನನಗೆ ಸಂತೋಷವಾಗುತ್ತಿದೆ. ಡಾನ್ 3 ಚಿತ್ರಕಥೆ ರೆಡಿಯಾಗಿದೆ ಎಂದು ಹೇಳಿದರು. ರಣವೀರ್ ಈ ಪಾತ್ರಕ್ಕೆ ಸೂಟ್‌ ಆಗುವುದಿಲ್ಲ ಎಂಬುದು ಕೆಲವರ ವಾದ. ಈ ಬಗ್ಗೆ ನಿರ್ದೇಶಕ ಫರ್ಹಾನ್ ಅಖ್ತರ್ ಮಾತನಾಡಿ ʻʻಅಮಿತಾಭ್ ಬಚ್ಚನ್ ಅವರ ಪಾತ್ರವನ್ನು ಶಾರುಖ್ ವಹಿಸಿಕೊಂಡಿದ್ದಕ್ಕಾಗಿ ಅವರನ್ನೂ ಕೆಲವರು ನಿಂದಿಸಿದ್ದೂ ಇದೆ. ಆದರೆ ಡಾನ್ 2 ಕೂಡ ಹಿಟ್ ಆಯಿತುʼʼ ಎಂದು ಹೇಳಿಕೊಂಡಿದ್ದಾರೆ.
ʻʻಡಾನ್ 3ಗೆ ರಣವೀರ್ ಆಯ್ಕೆ ತಪ್ಪು ಎಂದು ಸಾಕಷ್ಟು ಜನ ಹೇಳಿದ್ದರು. ರಣವೀರ್ ಸಿಂಗ್ ಈ ಪಾತ್ರಕ್ಕೆ ಸೂಕ್ತರು. ಅವರು ಈ ಪಾತ್ರ ಮಾಡಲು ಎಗ್ಸೈಟ್ ಹಾಗೂ ನರ್ವಸ್ ಎರಡೂ ಆಗಿದ್ದಾರೆ. ಮಹಾನ್ ನಟರು ಮಾಡಿದ ಪಾತ್ರವನ್ನು ರಣವೀರ್ ಮಾಡುತ್ತಿದ್ದಾರೆ. ಆರಂಭದಲ್ಲಿ ಶಾರುಖ್ ಖಾನ್ ಡಾನ್ ಪಾತ್ರ ಮಾಡುವಾಗ ಇದೇ ರೀತಿಯ ಮಾತು ಕೇಳಿ ಬಂದಿತ್ತು. ಅಮಿತಾಭ್ ಬಚ್ಚನ್ನ ಬದಲು ಶಾರುಖ್ ಖಾನ್ ಹೇಗೆ ನಟಿಸಲು ಸಾಧ್ಯ ಎಂದು ಕೇಳಿದ್ದರು. ನಂತರ ಸಿನಿಮಾ ಹಿಟ್ ಆಯಿತು’ ಎಂದಿದ್ದಾರೆ ಫರ್ಹಾನ್.
ಇದನ್ನೂ ಓದಿ: Don 3 Movie : ಬಾಲಿವುಡ್‌ಗೆ ಶಾರುಕ್‌ ಬದಲು ಹೊಸ ಡಾನ್ ಎಂಟ್ರಿ! ಡಾನ್ 3 ಟೀಸರ್‌ ರಿಲೀಸ್
ಡಾನ್ 3 ಸಿನಿಮಾ ಬಗ್ಗೆ ಈ ಹಿಂದೆಯೇ ಘೋಷಣೆಯಾಗಿದ್ದು, ಅದರಲ್ಲಿ ಶಾರುಖ್ ಇರುವುದಿಲ್ಲ ಎನ್ನುವುದೂ ಸುದ್ದಿಯಾಗಿತ್ತು. ಫರ್ಹಾನ್ ಅವರು ಡಾನ್ ಆಗಿ ನಟಿಸಲು ಹೊಸ ನಟನ ಹುಡುಕಾಟದಲ್ಲಿದ್ದಾರೆ ಎಂದೂ ವರದಿಯಾಗಿತ್ತು. ಅದರಂತೆ ಇದೀಗ ಫರ್ಹಾನ್ ಅವರು ಬಾಲಿವುಡ್‌ನ ಪ್ರಸಿದ್ಧ ನಟ ರಣವೀರ್ ಅವರನ್ನು ಡಾನ್ ಆಗಿ ಪರಿಚಯಿಸಿದ್ದಾರೆ. 2025ಕ್ಕೆ ಡಾನ್ 3 ಸಿನಿಮಾ ಮೂಲಕ ಅಬ್ಬರಿಸುವುದಾಗಿಯೂ ಘೋಷಿಸಿದ್ದಾರೆ. ಫರ್ಹಾನ್ ಅವರು ಡಾನ್ 3 ಸಿನಿಮಾದ ಮೊದಲ ಟೀಸರ್‌ ಅನ್ನು ಟ್ವಿಟರ್‌ನಲ್ಲಿ ಹಂಚಿಕೊಂಡಿದ್ದಾರೆ. ಅದರಲ್ಲಿ ಮೊದಲಿಗೆ ರಣವೀರ್ ಅವರು ಕ್ಯಾಮೆರಾಗೆ ಬೆನ್ನು ಹಾಕಿ ಕುಳಿತುಕೊಂಡಿರುವುದನ್ನು ಕಾಣಬಹುದು. ಲೆದರ್‌ ಜಾಕೆಟ್‌ ತೊಟ್ಟು ಮಾಸ್‌ ಲುಕ್‌ನಲ್ಲಿ ಕಾಣಿಸಿಕೊಂಡಿರುವ ರಣವೀರ್ ತನ್ನನ್ನು ತಾನು ಡಾನ್ ಎಂದು ಟೀಸರ್‌ನಲ್ಲಿ ಪರಿಚಯಿಸಿಕೊಂಡಿದ್ದಾರೆ.
ಇದನ್ನೂ ಓದಿ: Rani Kii Prem Kahaani: ಶೀಘ್ರದಲ್ಲೇ ಸೆಂಚುರಿಯತ್ತ ಆಲಿಯಾ-ರಣವೀರ್ ಸಿನಿಮಾ; 5ನೇ ದಿನದ ಕಲೆಕ್ಷನ್‌ ಎಷ್ಟು?
ಶಾರುಖ್ ಖಾನ್, ಪ್ರಿಯಾಂಕಾ ಚೋಪ್ರಾ ಮತ್ತು ಬೊಮನ್‌ ಇರಾನಿ ಅವರು ಡಾನ್ ಸಿನಿಮಾದಲ್ಲಿ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು. 2006ರಲ್ಲಿ ಬಿಡುಗಡೆಯಾದ ಆ ಸಿನಿಮಾ ನ್ಯೂಚಾಟೆಲ್ ಇಂಟರ್ನ್ಯಾಷನಲ್ ಫೆಂಟಾಸ್ಟಿಕ್ ಫಿಲ್ಮ್ ಫೆಸ್ಟಿವಲ್‌ನಲ್ಲಿ ಅತ್ಯುತ್ತಮ ಏಷಿಯನ್‌ ಸಿನಿಮಾ ಪ್ರಶಸ್ತಿಯನ್ನು ಗೆದ್ದುಕೊಂಡಿತ್ತು. ಸಿನಿಮಾದ ಎರಡನೇ ಭಾಗವಾಗಿ ಡಾನ್ 2, 2011ರಲ್ಲಿ ಬಿಡುಗಡೆಯಾಯಿತು. ಅದರಲ್ಲಿ ಶಾರುಖ್ ಅವರೊಂದಿಗೆ ಹೃತಿಕ್‌ ರೋಷನ್‌ ಅವರೂ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು.