ಬೆಂಗಳೂರು: ಬಾಂದ್ರಾದಲ್ಲಿರುವ ಶಾರುಖ್ ಖಾನ್ (Shah Rukh Khan) ಅವರ ಬಂಗಲೆ ಮನ್ನತ್‌ಗೆ ಇಬ್ಬರು ಯುವಕರು ಅಕ್ರಮವಾಗಿ ನುಗ್ಗಿದ್ದಾರೆ. ಮಾರ್ಚ್ 2ರಂದು ಬೆಳ್ಳಂಬೆಳಗ್ಗೆ ಈ ಘಟನೆ ಸಂಭವಿಸಿದ್ದು ಮನೆಯ ಕಾಂಪೌಂಡ್ ಗೋಡೆಯನ್ನು ಜಿಗಿದು ಶಾರುಖ್ ಮನೆಗೆ ಪ್ರವೇಶಿಸಿದ್ದಾರೆ. ನಂತರ ಯುವಕರನ್ನು ಶಾರುಖ್ ಭದ್ರತಾ ಸಿಬ್ಬಂದಿ ಹಿಡಿದು ಬಾಂದ್ರಾ ಪೊಲೀಸರಿಗೆ ಒಪ್ಪಿಸಿದ್ದಾರೆ. ಶಾರುಖ್ ಅವರು ಜವಾನ್ ಚಿತ್ರೀಕರಣದಲ್ಲಿದ್ದಾಗ ಅಭಿಮಾನಿಗಳು ಕಾಂಪೌಂಡ್‌ಗೆ ನುಗ್ಗಿರುವುದಾಗಿ ವರದಿಯಾಗಿದೆ.
ಮತ್ತೊಂದು ವರದಿ ಪ್ರಕಾರ ಈ ಘಟನೆ ಮುಂಜಾನೆ 4 ಗಂಟೆಯ ಸುಮಾರಿಗೆ ಸಂಭವಿಸಿದ್ದು, ಮತ್ತು ಇಬ್ಬರು ವ್ಯಕ್ತಿಗಳು ಭಾರತೀಯ ದಂಡ ಸಂಹಿತೆಯ (IPC) ಅಡಿಯಲ್ಲಿ ಬಂಧನಕ್ಕೆ ಒಳಗಾಗಿದ್ದಾರೆ. ಇದೀಗ ಹೆಚ್ಚಿನ ತನಿಖೆ ನಡೆಸಲಾಗುತ್ತಿದೆ ಎಂದು ಬಾಂದ್ರಾ ಪೊಲೀಸ್ ಠಾಣೆಯ ಅಧಿಕಾರಿಯೊಬ್ಬರು ಬಹಿರಂಗಪಡಿಸಿದ್ದಾರೆ.
ಪೊಲೀಸ್ ಅಧಿಕಾರಿಗಳು ಈ ಬಗ್ಗೆ ಮಾಹಿತಿ ನೀಡಿದ್ದು, ʻʻಶಾರುಖ್ ಖಾನ್ ಅವರನ್ನು ಯುವಕರು ಹತ್ತಿರದಿಂದ ನೋಡಲು ಬಯಸಿದ್ದರು. ಇದುವರೆಗಿನ ವಿಚಾರಣೆಗಳ ಪ್ರಕಾರ ಇದನ್ನು ಬಿಟ್ಟು ಅಪರಾಧಿಗಳು ಯಾವುದೇ ದುರುದ್ದೇಶವಿರಲಿಲ್ಲ. ನಾವು ಅವರ ಕುಟುಂಬದ ಸದಸ್ಯರ ವಿವರಗಳನ್ನು ತೆಗೆದುಕೊಂಡಿದ್ದೇವೆ. ಮತ್ತು ಅವರಿಗೆ ಕರೆ ಮಾಡುತ್ತಿದ್ದೇವೆ ಮತ್ತು ಅವರು ಯಾವುದೇ ರೀತಿಯ ಕ್ರಿಮಿನಲ್ ದಾಖಲೆಯನ್ನು ಹೊಂದಿದ್ದರೆ ಗುಜರಾತ್ ಪೊಲೀಸರೊಂದಿಗೆ ಪರಿಶೀಲಿಸುತ್ತೇವೆ. ಮುಂಬೈ ಪೊಲೀಸರು ಪ್ರಕರಣದ ಕುರಿತು ಹೆಚ್ಚಿನ ತನಿಖೆ ನಡೆಸುತ್ತಿದ್ದಾರೆʼʼ ಎಂದಿದ್ದಾರೆ. 22 ಮತ್ತು 25 ವರ್ಷದ ಯುವಕರು ಆಗಿರುವುದಾಗಿ ಮಾಹಿತಿ ಹಂಚಿಕೊಂಡಿದ್ದಾರೆ.
ಇದನ್ನೂ ಓದಿ: Shah Rukh Khan : ಶಾರುಖ್ ಖಾನ್ ಬಳಿ ಐಷಾರಾಮಿ ಕಾರುಗಳೇ ಇಲ್ಲವಂತೆ! ಹೌದಾ?
ಇವರಿಬ್ಬರು ಗುಜರಾತ್‌ನ ಸೂರತ್‌ ಮೂಲದವರಾಗಿದ್ದು, ಅವರ ಕುಟುಂಬದವರನ್ನು ಸಂಪರ್ಕಿಸಲಾಗುವುದು ಎಂದು ತನಿಖೆಯಿಂದ ತಿಳಿದುಬಂದಿದೆ. ಶಾರುಖ್ ಅವರು ಅಟ್ಲೀ ನಿರ್ದೇಶನದ ಜವಾನ್‌ನಲ್ಲಿ ನಯನತಾರಾ ಮತ್ತು ವಿಜಯ್ ಸೇತುಪತಿ ಅವರೊಂದಿಗೆ ನಟಿಸಲಿದ್ದಾರೆ. ಚಿತ್ರ ಪೋಸ್ಟ್-ಪ್ರೊಡಕ್ಷನ್ ಹಂತದಲ್ಲಿದ್ದು, ಈ ವರ್ಷ ಜೂನ್‌ನಲ್ಲಿ ಬಿಡುಗಡೆಯಾಗುವ ನಿರೀಕ್ಷೆಯಿದೆ.