ಬೆಂಗಳೂರು: ನಟಿ ಶೆಹನಾಜ್ ಗಿಲ್ (Shehnaaz Gill) ಹಿಂದೊಮ್ಮೆ ನಟ ಸಲ್ಮಾನ್ ಖಾನ್ (Salman Khan) ಅವರ ನಂಬರ್ ಬ್ಲಾಕ್‌ ಮಾಡಿರುವ ಸಂಗತಿಯನ್ನು ಕಪಿಲ್ ಶರ್ಮಾ ಶೋನಲ್ಲಿ ಹೇಳಿಕೊಂಡಿದ್ದಾರೆ. ಸಲ್ಮಾನ್ ಖಾನ್ ಅವರ ಮುಂಬರುವ “ಕಿಸಿ ಕಾ ಭಾಯ್ ಕಿಸಿ ಕಿ ಜಾನ್” ಚಿತ್ರದಲ್ಲಿ ಶೆಹನಾಜ್ ಮತ್ತು ಸಲ್ಮಾನ್ ಒಟ್ಟಿಗೆ ಕಾಣಿಸಿಕೊಳ್ಳಲಿದ್ದಾರೆ. ಈ ಹಿನ್ನೆಲೆಯಲ್ಲಿ ಶಹನಾಜ್‌ ಗಿಲ್ ಅವರು ಸಲ್ಲು ನಂಬರ್ ಅನ್ನು ಬ್ಲಾಕ್‌ ಮಾಡಿರುವುದು ಏಕೆ ಎಂಬ ಸಣ್ಣ ಚರ್ಚೆ ಸೋಷಿಯಲ್‌ ಮೀಡಿಯಾದಲ್ಲೂ ನಡೆದಿದೆ.
ನಂಬರ್ ಬ್ಲಾಕ್‌ ಮಾಡಿದ್ಯಾಕೆ?
ಶೆಹನಾಜ್ ಅವರು ಕಿಸಿ ಕಾ ಭಾಯ್ ಕಿಸಿ ಕಿ ಜಾನ್ ತಂಡದ ಜತೆಗೆ ಚಿತ್ರದ ಪ್ರಚಾರಕ್ಕಾಗಿ ಕಪಿಲ್ ಶರ್ಮಾ ಶೋನಲ್ಲಿ ಭಾಗಿಯಾಗಿದ್ದರು. ಈ ವೇಳೆ ಶೆಹನಾಜ್ ಮಾತನಾಡಿ ʻʻನಾನು ಅಮೃತಸರದಲ್ಲಿ ಗುರುದ್ವಾರಕ್ಕೆ ಭೇಟಿ ನೀಡಿದಾಗ, ನನಗೆ ಅಪರಿಚಿತ ಸಂಖ್ಯೆಯಿಂದ ಕರೆ ಬಂದಿತ್ತು. ನನಗೆ ಯಾವುದೇ ಅಪರಿಚಿತ ಸಂಖ್ಯೆಗಳಿಂದ ಕರೆ ಬಂದರೆ ಬ್ಲಾಕ್‌ ಮಾಡುವ ಅಭ್ಯಾಸವಿದೆ, ಹಾಗಾಗಿ ನಾನು ಅದೇ ರೀತಿ ಮಾಡಿದೆ. ಕೆಲವು ನಿಮಿಷಗಳ ನಂತರ, ಸಲ್ಮಾನ್ ಸರ್ ನನಗೆ ಕರೆ ಮಾಡಲು ಪ್ರಯತ್ನಿಸುತ್ತಿದ್ದಾರೆ ಎಂಬ ಸಂದೇಶ ಬಂದಿತು” ಎಂದು ಶೆಹನಾಜ್ ಹೇಳಿದರು.
ನಟಿ ಮಾತು ಮುಂದುವರಿಸಿ, ʻʻಆದರೂ ನಾನು ಮತ್ತೆ ನಂಬರ್ ಪರಿಶೀಲಿಸಲೆಂದು ಟ್ರೂಕಾಲರ್ ಅಪ್ಲಿಕೇಶನ್‌ನಲ್ಲಿ ಸಂಖ್ಯೆಯನ್ನು ಹಾಕಿದೆ. ತಕ್ಷಣ ಅವರ ಹೆಸರು ಕಂಡೊಡನೆ ನನಗೆ ಅದು ಸಲ್ಮಾನ್ ಖಾನ್ ನಂಬರ್ ಎಂದು ಖಚಿತವಾಯಿತು. ತಕ್ಷಣ ನಂಬರ್ ಅನ್‌ಬ್ಲಾಕ್ ಮಾಡಿದೆʼʼ ಎಂದು ಹೇಳಿದ್ದಾರೆ. ʻʻಅನ್‌ಬ್ಲಾಕ್ ಮಾಡಿದ್ದೆ ತಡ ಸಲ್ಮಾನ್ ಖಾನ್ ಕಡೆಯಿಂದ ಕರೆ ಬಂತು. ಬಳಿಕ ಸಲ್ಮಾನ್ ಚಿತ್ರದಲ್ಲಿ ನಟಿಸಲು ಆಫರ್ ನೀಡಿದ್ದರುʼʼ ಎಂದು ನಟಿ ತಿಳಿಸಿದ್ದಾರೆ.
ಕಾರ್ಯಕ್ರಮದಲ್ಲಿ ಪೂಜಾ ಹೆಗ್ಡೆ, ಪಾಲಕ್ ತಿವಾರಿ, ರಾಘವ್ ಜುಯಲ್, ಜಸ್ಸಿ ಗಿಲ್, ವಿನಾಲಿ ಭಟ್ನಾಗರ್, ಸಿದ್ಧಾರ್ಥ್ ನಿಗಮ್ ಮತ್ತು ಸುಖ್ಬೀರ್ ಸಲ್ಮಾನ್ ಮತ್ತು ಶೆಹನಾಜ್ ಜತೆಗಿದ್ದರು.
ಇದನ್ನೂ ಓದಿ: Salman Khan: ʻಕಿಸಿ ಕಾ ಭಾಯ್ ಕಿಸಿ ಕಿ ಜಾನ್ʼ ಸಿನಿಮಾದ ನೈಯೋ ಲಗ್ಡಾ ಸಾಂಗ್‌ ಟೀಸರ್‌ ಔಟ್‌
ಇದೇ ಏ.21ಕ್ಕೆ ತೆರೆಗೆ
ಸಲ್ಮಾನ್ ಖಾನ್ ಫಿಲ್ಮ್ಸ್ ಪ್ರೊಡಕ್ಷನ್‌ನಲ್ಲಿ ಮೂಡಿಬಂದಿರುವ “ಕಿಸಿ ಕಾ ಭಾಯ್ ಕಿಸಿ ಕಿ ಜಾನ್” ಸಿನಿಮಾವನ್ನು ಫರ್ಹಾದ್ ಸಾಮ್ಜಿ ನಿರ್ದೇಶಿಸಿದ್ದಾರೆ. ಚಿತ್ರದಲ್ಲಿ ಸಲ್ಮಾನ್ ಖಾನ್, ವೆಂಕಟೇಶ್ ದಗ್ಗುಬಾಟಿ, ಪೂಜಾ ಹೆಗ್ಡೆ, ಜಗಪತಿ ಬಾಬು, ಭೂಮಿಕಾ ಚಾವ್ಲಾ, ವಿಜೇಂದರ್ ಸಿಂಗ್, ಅಭಿಮನ್ಯು ಸಿಂಗ್, ರಾಘವ್ ಜುಯಲ್, ಸಿದ್ಧಾರ್ಥ್ ನಿಗಮ್, ಜಸ್ಸಿ ಗಿಲ್, ಶೆಹನಾಜ್ ಗಿಲ್, ಪಾಲಕ್ ತಿವಾರಿ ಮತ್ತು ವಿನಾಲಿ ಭಟ್ನಾಗರ್ ಚಿತ್ರದಲ್ಲಿ ಬಣ್ಣ ಹಚ್ಚಿದ್ದಾರೆ. ಸಿನಿಮಾ ಇದೇ ಏ.21ಕ್ಕೆ ತೆರೆಗೆ ಬರಲಿದೆ.