ಹೈದರಾಬಾದ್‌: ಸತತ ಸೋಲಿನಿಂದ ಕಂಗೆಟ್ಟ ಟಾಲಿವುಡ್‌ ರೆಬೆಲ್‌ ಸ್ಟಾರ್‌ ಪ್ರಭಾಸ್ (Actor Prabhas) ಕಳೆದ ತಿಂಗಳು ತೆರೆಕಂಡ ಸಲಾರ್‌: ಪಾರ್ಟ್‌ 1-ಸೀಸ್‌ಫೈರ್‌ (Salaar: Part 1 – Ceasefire) ಚಿತ್ರದ ಮೂಲಕ ಭರ್ಜರಿ ಕಮ್‌ ಬ್ಯಾಕ್‌ ಮಾಡಿದ್ದಾರೆ. ತೆಲುಗು, ಕನ್ನಡ, ಹಿಂದಿ, ತಮಿಳು ಮತ್ತು ಮಲಯಾಳಂನಲ್ಲಿ ಬಿಡುಗಡೆಯಾದ ಈ ಚಿತ್ರ ಈಗಾಗಲೇ ಬಾಕ್ಸ್‌ ಆಫೀಸ್‌ನಲ್ಲಿ ಉತ್ತಮ ಕಲೆಕ್ಷನ್‌ ಮಾಡಿದೆ. 650 ಕೋಟಿ ರೂ.ಗಿಂತ ಹೆಚ್ಚಿನ ಗಳಿಕೆ ಕಂಡು ಮುನ್ನುಗ್ಗುತ್ತಿದೆ. ಹೊಂಬಾಳೆ ಫಿಲ್ಮ್ಸ್‌ನ ಬ್ಯಾನರ್ ಅಡಿ ಪ್ರಶಾಂತ್‌ ನೀಲ್‌ ಈ ಚಿತ್ರಕ್ಕೆ ಆ್ಯಕ್ಷನ್‌ ಕಟ್‌ ಹೇಳಿದ್ದರು. ಈ ಯಶಸ್ಸಿನ ಅಲೆಯಲ್ಲಿ ತೇಲುತ್ತಿರುವ ಪ್ರಭಾಸ್ ಸಂಕ್ರಾಂತಿ ಹಬ್ಬದ ಸಂದರ್ಭದಲ್ಲಿ ಹೊಸ ಚಿತ್ರದ ಫಸ್ಟ್‌ ಲುಕ್‌ ರಿಲೀಸ್‌ ಮಾಡಿ ಅಭಿಮಾನಿಗಳಿಗೆ ಇನ್ನೊಂದು ಗುಡ್‌ ನ್ಯೂಸ್‌ ಕೊಟ್ಟಿದ್ದಾರೆ.
ಯಾವ ಚಿತ್ರ?
ಈ ಚಿತ್ರಕ್ಕೆ ‘ದಿ ರಾಜಾ ಸಾಬ್’ (The Raja Saab) ಎಂದು ಹೆಸರಿಡಲಾಗಿದ್ದು ಮಾರುತಿ ನಿರ್ದೇಶಿಸಲಿದ್ದಾರೆ. ಇದು ಕೂಡ ಪಕ್ಕಾ ಮಾಸ್‌ ಚಿತ್ರ ಎನ್ನುವ ಸುಳಿವು ಪೋಸ್ಟರ್‌ನಲ್ಲೇ ಕಂಡು ಬಂದಿದೆ. ಈ ಸಿನಿಮಾ ರೊಮ್ಯಾಂಟಿಕ್ ಹಾರರ್ ಶೈಲಿಯಲ್ಲಿ ಮೂಡಿ ಬರಲಿದೆ ಎನ್ನಲಾಗುತ್ತಿದೆ. ಈ ಚಿತ್ರವನ್ನು ಪೀಪಲ್ ಮೀಡಿಯಾ ಫ್ಯಾಕ್ಟರಿ ಬ್ಯಾನರ್ ಮೂಲಕ ಟಿ.ಜಿ. ವಿಶ್ವ ಪ್ರಸಾದ ನಿರ್ಮಿಸಲಿದ್ದಾರೆ. ಕಪ್ಪು ಶರ್ಟ್‌ ಮತ್ತು ಲುಂಗಿ ಸುತ್ತಿದ ಪ್ರಭಾಸ್ ಪೋಸ್ಟರ್‌ ಇದೀಗ ವೈರಲ್‌ ಆಗಿದೆ. ಇದು ಕೂಡ ಪ್ಯಾನ್‌ ಇಂಡಿಯಾ ಚಿತ್ರವಾಗಿ ತೆರೆ ಬರಲಿದೆ. ತೆಲುಗು, ಕನ್ನಡ, ಹಿಂದಿ, ತಮಿಳು ಮತ್ತು ಮಲಯಾಳಂನಲ್ಲಿ ʼದಿ ರಾಜಾ ಸಾಬ್ʼ ಬಿಡುಗಡೆಯಾಗಲಿದೆ ಎಂದು ಚಿತ್ರತಂಡ ತಿಳಿಸಿದೆ.
ರಾಷ್ಟ್ರ ಚಲನಚಿತ್ರ ಪ್ರಶಸ್ತಿ ಪುರಸ್ಕೃತ ಎಸ್‌.ತಮನ್‌ ಈ ಸಿಮಾಕ್ಕೆ ಸಂಗೀತ ನೀಡಲಿದ್ದಾರೆ. ನಾಯಕಿ ಸೇರಿದಂತೆ ಇನ್ನುಳಿದ ಪಾತ್ರಗಳ ಆಯ್ಕೆ ಇನ್ನಷ್ಟೇ ಆಗಬೇಕಿದೆ. ಶೀಘ್ರದಲ್ಲೇ ಚಿತ್ರೀಕರಣ ಆರಂಭವಾಗುವ ನಿರೀಕ್ಷೆ ಇದೆ.
2012ರಲ್ಲಿ ತೆರೆಕಂಡ ʼಈ ರೋಜುಲುʼ ತೆಲುಗು ಚಿತ್ರದ ಮೂಲಕ ಮಾರುತಿ ಚಿತ್ರ ನಿರ್ದೇಶನ ಆರಂಭಿಸಿದ್ದರು. ಮೊದಲ ಚಿತ್ರದಲ್ಲೇ ಅವರು ಗಮನ ಸೆಳೆದಿದ್ದರು. 2017ರಲ್ಲಿ ಬಿಡುಗಡೆಯಾದ, ಮಾರುತಿ ನಿರ್ದೇಶನದ ತೆಲುಗು ಚಿತ್ರ ʼಮಹಾನುಭಾವುಡುʼ ಸೂಪರ್‌ ಹಿಟ್‌ ಆಗಿತ್ತು. ಮಾರುತಿ ಕೊನೆಯ ಬಾರಿ ಆ್ಯಕ್ಷನ್‌ ಕಟ್‌ ಹೇಳಿದ್ದ ಚಿತ್ರ ತೆಲುಗಿನ ʼಪಕ್ಕಾ ಕಮರ್ಷಿಯಲ್‌ʼ. ಗೋಪಿಚಂದ್‌, ರಾಶಿ ಖನ್ನಾ ಅಭಿನಯದ ಈ ಚಿತ್ರ ಬಾಕ್ಸ್‌ ಆಫೀಸ್‌ನಲ್ಲಿ ಮುಗ್ಗರಿಸಿತ್ತು. ಸದ್ಯ ‘ದಿ ರಾಜಾ ಸಾಬ್’ ಚಿತ್ರವನ್ನು ಮಾಸ್‌ ಆಗಿ ತೆರೆಗೆ ಮೇಲೆ ಮೂಡಿಸಲು ತಯಾರಿ ನಡೆಸಿದ್ದಾರೆ.
ಇದನ್ನೂ ಓದಿ: Kalki 2898 AD: ಪ್ರಭಾಸ್, ದೀಪಿಕಾ, ಅಮಿತಾಭ್‌ ಮುಖ್ಯಭೂಮಿಕೆಯ ʻಕಲ್ಕಿ 2898 ADʼ ರಿಲೀಸ್‌ ಡೇಟ್‌ ಅನೌನ್ಸ್‌!
ʼಸಲಾರ್‌ ಪಾರ್ಟ್‌ 1ʼ ಯಶಸ್ಸಿನಲ್ಲಿ ತೇಲುತ್ತಿರುವ ಪ್ರಭಾಸ್ ಅವರ ಮುಂದಿನ ʼಕಲ್ಕಿ 2898 ಎಡಿʼ ಚಿತ್ರದ ಬಿಡುಗಡೆ ದಿನಾಂಕ ಇತ್ತೀಚೆಗೆ ಘೋಷಣೆಯಾಗಿದೆ. ಇದು ಕೂಡ ಪ್ಯಾನ್‌ ಇಂಡಿಯಾ ಚಿತ್ರವಾಗಿರಲಿದ್ದು, ದೀಪಿಕಾ ಪಡುಕೋಣೆ, ಅಮಿತಾಭ್‌ ಬಚ್ಚನ್‌, ಕಮಲ್‌ ಹಾಸನ್‌ ಅವರಂತಹ ಘಟಾನುಘಟಿ ಕಲಾವಿದರು ನಟಿಸುತ್ತಿದ್ದಾರೆ. ನಾಗ್‌ ಅಶ್ವಿನ್‌ ನಿರ್ದೇಶನದ ಈ ಚಿತ್ರ ಮೇ 9ರಂದು ತೆರೆಗೆ ಬರಲಿದೆ.
ಈ ಸಂಗತಿಯ ಕುರಿತು ನಿಮ್ಮ ಅನಿಸಿಕೆ ಏನು? ಕಮೆಂಟ್ ಮೂಲಕ ತಿಳಿಸಿ